Read Western Dani Ndaniyen 1 Bible Online

Ndaniyen 1 - Western Dani bible

Ndaniyen 1

¹NDANIYEN WONE Aap Yoyakim aakumi Yekura mendek inowe endagembogut a'nuk, wone lengganogo yorage kagak, tahun mbere eeppunuk ambi eeke paga it aakumi Mbaben mendek inowe endagembogut Nebukanetat nogo, o Yerutalem nage nagagerik, yagaragi kumbiinok, oonda mbani unggwagagerak.

² Oonda mbani unggwage kagak, at Ala nen aakumi Yekura mendek inowe endagembogut Yoyakim tebenogo puwak nduk, eeppege mbareegi, tebenogo punuk, Ala awi wurik me eekak ake nogo ando waawak nduk eeppege mbareegi, wagangge nagagerik, wonok o Mbaben at agugi alut eeke menggim yime pi woranuk, at agugi awi wurik me yi mendek ndi mendek abe kenok pege menggim nogome mambereegerak.

³Mambege nagagerik, aap inowe endagembogut nogo nen ayeloman mini at awi arum menggaarak inowe endage Atepenat nogo yoge logonet, “It Iterali mendek inoweewi inendagembogut inapuri inom, aap nagawan-nagawan inapuri inom, wogoren woraanok nduk, leenogo piyet o.

⁴Leenogo piige logonet, it aap inawinde-inobaande eerak lek abe kigirikwe tawe kero, yi wone ndi wone mamuniyak inobam kero, yi wone ndi wone yereegerak-pereegerak apit ineenu kero, iniki ngget mendek kero, ti mendek mban an nawi nggwok abe wurik me yabu inobam eeko logowak nduk, leenogo piinok, kat Atepenat nen aret nit Mbaben mendek ninoone inom, ninoone paga liiru mbanggo monggoorak inom, mamunirage logomunggun o.

⁵Tahun kenagan paga abu aret mamuninake logomenggendik, it ineebe an nake eeko logowak nduk, wogoren piya woroorak me, it mamunggwi iigak, ko'lu-kii'me inambi noorak inom, inagi anggur amburu noorak inom, abok aret an napuri ninom nonggo monggoorak nogo mendek nonggo logowak nduk koonogo piige logogin o,” yinuk, yoreegerak.

⁶Yoge mbareegi, at Atepenat nen it aap ti mendek leeninake logonet, inenggela'me ando inanebunu Yekura mendek Ndaniyen inom, Kananiya inom, Mitayen inom, Atariya inom, leeninabeegerak.

⁷Leeninake nagagerik, at endagembogut ayeloman mini inowe Atepenat nogo nen inendage alik tooninake logonet, Ndaniyen endage Mbelatatat toongge, Kananiya endage Tarerak toongge, Mitayen endage Metak toongge, Atariya endage Abe'nego toongge, eerogo piyareegerak.

⁸Inambi inom, inagi anggur amburu inom, it nonggo logorak koonogo pereegerak nogo, at Ndaniyen iniki nen mbake logonet, “Aap endagembogut ambi nengge, aniyo anggur amburu nengge, eeke paga maluk noba lenggenggolookwak me, neebi o,” mbake nagagerik, aap endagembogut ayeloman mini inowe Atepenat nogo yoge logonet, “Ai, nogoba. Aap endagembogut ambi nengge, agi anggur amburu nengge, eeke paga an maluk eekkolookwak me, mbo puurak ti op ilik?” yoreegerak.

⁹At Ala eeppereegerak paga aap endagembogut ayeloman Atepenat nogo nen Ndaniyen iniki kunik mbake, abuwa nen obeelom eeppuurak mbake, eereegerak kwe,

¹⁰Ndaniyen nen at yoreegerak nogo onggo yoge logonet, “At ninowe endagembogut nen aret kit kinambi nonggo logorak inom, kinagi nonggo logorak noorak inom, muk punogo pegerak kagak alik eeriminggirak paga mbe'nirukwak nagabiti o. It kinom ndak-ndak ndarak koreewi ando ineebe op iigak kat pekkeege logomenggerik, keebe meek aremenggendak keyoorak op mbaken? Togop keege kenok, an nenggaanok mbanigin aret o,” yinuk, yoreegerak.

¹¹Ti'nuk, aap endagembogut ayeloman mini inowe Atepenat nen aap Ndaniyen inom, Kananiya inom, Mitayen inom, Atariya inom, inarum logowak nduk mippereegerak nogo, at Ndaniyen nen yoge logonet,

¹²“Ai, nogoba. Nineebe liippinanenok nduk, we niyo inom, mbi-mbiingga inom, mban nonggo logorak wo'nirage keegak, nogo 10 aret yuwok o.

¹³Nogo 10 yinuk, it aap tawe at aap endagembogut ambi inom, agi anggur amburu inom, nonggo logomenggaarak nogo, it ineebe op iyaamunggun a, nit nineebe op niyaamunggun a? Lomboppinanege logomenggendik, nit kayeloman mini yi, eeppinaniyak kiniki mbaremenggendak nogo aret eeppinanumunggun o,” yinuk, yoreegerak.

¹⁴Yoge mbareegi, “E o,” ari nagagerik, ineebe liippiige kagak nogo 10 yereegwaarak.

¹⁵Ne 10 abu aret ari nage mbareegi, pegiige nagagerik, it aap tawe at aap endagembogut ambi nonggo nogogwaarak nogo, ineebe abok aret meek negen iyareegerak kwe, at Ndaniyen oreewi inom perak, ineebe obeelom mondok inomaawi ambik wonogwe iyareegerak.

¹⁶Togop iige nagagerik, ne ti kuli nen at aap inarum menggerak nogo nen inambi abe aap endagembogut nengge menggerak inom, inagi anggur amburu inom, it nonggo logorak yereegerak nogo tayoppunuk, mbi-mbiingga mban wogorage nagagerak.

¹⁷It aap tawe ineebe 4 yi nogo, Ala nen yi wone ndi wone ineenu aruwak nduk eeppiige, it aap Mbaben mendek yogo nogogwaarak inom, eeko nogogwaarak liiru mbanak inom, yelok kaawak nduk eeppiige, eereegerak. Ndi, at Ndaniyen nogo, inabinggaanggo kogwe nogo mendek inom, inabi kogwe nogo mendek inom, abok aret alom telanogo yorage logowak nduk, eeppereegerak.

¹⁸Ndi, mamunggwi iigak, tahun kenagan eeppunuk, “Wogoren an wonage me, woraamunggun o,” yinuk, aap endagembogut nen yoreegerak nogo, abu aret age mbareegi, aap endagembogut ayeloman mini inowe Atepenat nen aap Nebukanetat wonage me piya unggwagagerak.

¹⁹Piya unggwage mbareegi, aap endagembogut nen inom wone mbangge logonet, aap eegu kwak lek at Ndaniyen inom, Kananiya inom, Mitayen inom, Atariya inom, abu iya negen yi wone ndi wone ineenu iige nagagerik, at ake eeko logowak nduk eeppiyareegerak.

²⁰Eeppiyareegerak eekwi me, aap endagembogut nogo nen wone kooniyak aaninggin wonage nogo, it yorage kenok, iniki warak lombok nen at yogwi, ambi eeriyak at kobak nen yorage kenok, yi wone ndi wone alom ineenu nogo paga nen at yogwi, eekwi iinok, “It aap kugi alom ineenu inom, inagugi nen yorage kenok yoraga inom, an nabu'me piige minggim wonogwe nogo abok aret mbuuluk negen ineenu logonet yo'nugwi, ndi, it aap 4 yi nogo perak, abu iya it aap 10 nen ineenu mengga kwak ineenu logonet yo'nugwi, eekwi iigi o,” mbareegerak.

²¹Ndi, at Ndaniyen nogo o Mbaben time wonage kagak aap inowe endagembogut Koreti aret mi'nagagerak.