Read Western Dani Ndaniyen 6 Bible Online

Ndaniyen 6 - Western Dani bible

Ndaniyen 6

¹At Ndariyut abu'me piige menggim yi o ndi o time abok aret at abu'me logonet wone lengganogo yorogo logorak awuri ineebe seratus dua puluh leenogo mippiinok, inarum logorak inoweewi ineebe kenagan mippiyoorak inikilom mbake nagagerik, mippiyareegerak. Inoweewi inarum logorak ineebe kenagan mippiyareegerak ambi ti, at Ndaniyen aret. Aap endagembogut abu'me logonet, wone lengganogo yorogo logorak awuri nogo ti, at aap endagembogut amendek lek age, endage maluk age, eeke kero, unde logonet awone mbanggo logorak inoweewi ineebe kenagan ti, mippiyareegerak.

³Ineebe kenagan mippiyareegerak nogo inawuri inarum logonet, at Ndaniyen yi wone ndi wone iya negen koonogo yorage paga oreewi mbere iigak, at endage tiyak ari, ndi, aap endagembogut awuri yi o ndi o wone lengganogo yorogo logowak nduk, mippiyareegerak koonggwi nogo inobam lek negen iigak kwe, at Ndaniyen obam logonet, wone koongge kage nagagerik, aap endagembogut nogo nen at abu'me piige menggim abok aret unde logowak nduk, at Ndaniyen mippuurak kooneegerak.

⁴At Ndaniyen oreewi mbere inawuri inarum waka nogo inom, aap endagembogut awuri yi o ndi nappiyareegerak inom, nogo nen at Ndaniyen endage tiyak ari kenok, aap endagembogut nen yabu eeriyak yoge nogo, eeke logonet maluk ambi eekerak wonage kero, oba lenggeniyak nduk, kwaareegwaarak mendek, lek aret kogogwaarak. At aap endagembogut amendek ambi wagangge lek li'lak mban eeke, Eeriyak, yoge nogo taganogo mbo pege lek ndak-ndak aret eeke, eeke nagagerak me, at maluk eeke ambi kwaakkaga'lek aret wonogogwaarak.

⁵Maluk ambi eerulik aret mbareegi, it nen yogo logonet, “Aap endagembogut nen yoge eeke paga at Ndaniyen maluk eeke alom ambi yoriyak meek kogo o. Ata, at ogoba Ala yoge eeke ti paga ambi wonage kero, kwaaruwok o.”

⁶Yogo nogogwaarik, it aap ineebe mbere inawuri inarum waka nogo inom, aap endagembogut awuri yi o ndi o yorogo logorak mippiyareegerak nogo inom, ambugwi aret mbelek togon aap endagembogut Ndariyut owagam nogo nogogwaarik, at yogo logonet, “Ninowe kendagembogut yi wae. Kendage mondok ki aret logowak o.

⁷It kawuri mippiinet nagagindak inarum waka inom, it o nggwok pippunuk unde menggaarak inom, kabu'me logonet wone lengganogo yoraga inom, kat kinom wone koongga inom, o nggwok abok unde menggaarak inom, nit abok aret nen, Yogondak kuli nen nok, nogo 30 yit nage kagak, aap ambit ambi aap endagembogut yoga'lek at lombok agugi a, aap alik a, alut eeke logonet, yeenggwaaruwak nduk, nggino yoge kenok, keele maarogo mbuun ambena singa wonogwe me time mbo wuppuwak o, yinuk, at ninowe endagembogut nen liiru mbanogo wumbuwak nduk, yori nawi o, yinuk, kat yokkiri wogo o.

⁸Togop me, ninogoba kendagembogut wae. It aap Meriya mendek inom, Peretiya mendek inom, wone eeko logorak lengganogo pugu nogo ti, lek ageelik mondok wonage menggerak nogo ndak-ndak, wone yokkogoorak yi, liiru mbanogo wumbemenggendak nogo alik age kero, kat togop aret liiru mbanogo keenggi amburu punuk, wumbege logot o.”

⁹Yogo mbareegwa, at endagembogut Ndariyut nen wone yereegwaarak nogo togop aret liiru mbanogo punuk, eenggi amburu pereegerak.

¹⁰Wone liiru mbanogo punuk, wumbereegerak nogo, at Ndaniyen aruk konembunuk, ame nage nagagerik, ame irimbaga ko ambi ogoorak me, pugagi ena Yerutalem pa'nggwe mbanak nogo, pugagi paarak me time nen o ne ambit wege paga ne kenagan kuli tamban eeke menggerak nogo ndak-ndak, time ari unggunuk, endobanggun yindumbunuk, tamban eeke, Ala wa yoge, eeke nagagerak.

¹¹Eeke wonage me, it aap ti nogo ambugwi aret aap Ndaniyen wonage me nogo nogogwaarik, at Ndaniyen tamban eeke, Ala yeenggwaaruwak nduk, yoge, eeke kogogwaarak.

¹²Kogo nogogwaarik, aap endagembogut wonage me nanuk, wone lengganogo wumbereegerak nogo yogo logonet, “Ninogoba kendagembogut wae. Yogondak kuli nen nok, nogo 30 yit nogwe niigak, aap ambit ambi nen an nendagembogut yo'nega'lek at lombok agugi a, aap alik a, alut eeke logonet yeenggwaaruwak nduk, nggino yoge kenok, at keele maarogo mbuun ambena singa wonogwe me time mbo wuppigin o, yinuk, liiru mbangge nagandik, keenggi amburu punuk, wumbegendak nogo lek a?” Yogo mbareegwa, aap endagembogut nen onggo yorage logonet, “Wone ti, it aap Meriya mendek inom, Peretiya mendek inom, nen eeko logorak liiru mbanogo pereegwaarak lek ariyak lek mondok logorak nogo ndak-ndak, liiru mbanogo wumbigirak me, taganiyak lek o.”

¹³Yorage mbareegi, it nen aap endagembogut nogo yogo logonet, “Ninogoba kendagembogut wae. It aakumi o Yekura nen kugun wogoren piya wogogwaarak ambi Ndaniyen nogo, kat ninogoba kayuk wuke, wone lengganak liiru mbanogo wumbegendak nogo eeka'lek mbo pege, eeke logonet, o ne ambit wege paga tamban ne kenagan eeke menggerak nogo ndak-ndak aret eeke kogoorak o,” yinuk, yoreegwaarak.

¹⁴Yogwi at aap endagembogut nogo aruk konengge nagagerik, iniki abu maluk agagerak. Maluk age nagagerik, “Agap ndarikit o,” yinuk, iniki koonit nage kagak, oonegen aret lobok yi noorak eereegerak.

¹⁵Iniki koonit nage me, it aap ti nogo, ambugwi aret aap endagembogut ka nogo nogogwaarik, yogo logonet, “It aap o Meriya mendek inom, it Peretiya mendek inom, nen aap endagembogut wone eeko logorak koonogo punuk, lengganogo yorage, liiru mbanogo wumbege, eeke kenok, alik ambi eeriyak lek ti aret eeriyak yugume, kat ninogoba kendagembogut abe'nok nduk yokkogo o.”

¹⁶Yogo mbareegwa, at aap endagembogut nogo nen, “Ndaniyen wa nanuk, mbuun ambena singa wonogwe me mbo wuppinip o,” yoragagerak wuppugwi iigak, “Kat ko'lu-kii'me alut eekak mban eeke menggendak kogoba Ala nogo nen aret kagap ndarigin o,” yinuk, at aap endagembogut nogo nen Ndaniyen yoreegerak.

¹⁷Yoge mbareegi, mbuun ambena wuppereegwam nogome yugum tabak ambi waganogo ambe nogo nobappereegwaarak. Yugum nobappereegwaarak nogo paga aap endagembogut nen, “Wumbuurak mage,” ineenu aruwak nduk, at eenggime yirik nogo paga amburu pege, at awuri nagawan-nagawan ineenggime yirik nogo paga amburu pugwi, eereegwaarak.

¹⁸Pogo nogogwaarik, at aap endagembogut nogo awi nggwok abe wurik me nogome nage nagagerik, oonikiya paga mbi-niyo nengge, “Niniki ale'nggen eerogo pani wa'nip o,” yinuk, ambi yorage, eeka'lek, “Nonggop aga,” yinuk, iniki nggiluuge wonage kagak, o kilim nagabeegerak.

¹⁹O awo kilim nagake kagak aap endagembogut nogo eenik a'nuk, mbuun ambena singa wonogwe me mbet-mbet aret nagagerak.

²⁰Nage nagagerik, mbuun ambe paga koorok taati panggo yi nanuk, “Nonggop aga?” yinuk, iniki piirik logonet, oone nggwok paga, “At eenik menggerak Ala ayeloman kat Ndaniyen wae. Kat ko'lu-kii'me alut eekak mban eeke menggendak kogoba Ala nen singa inambeme nen kagap ndakerak ilik?”

²¹Yoge mbareegi, at Ndaniyen nen aap endagembogut nogo yoge logonet, “Nogoba kendagembogut wae. Kendage mondok ki aret logowak o,” yinuk,

²²yoge nagagerik, “Nogoba Ala nen an maluk ambi eeka'lek ugun wonage neege, ndi, kat nogoba kendagembogut kenggaanom paga kunduk, an maluk eeka'lek wonage neege, eeke nagaarik, singa inambe narogo puwak nduk, malayikat nogo ambi nappi wagaarak inambe narogo piigerak me, ineyak nibinnaka'lek an ugun agarik o.”

²³Yoge mbareegi, at aap endagembogut nogo iniki ale'nggen ambik age nagagerik, at Ndaniyen nogo mbuun ambena nen nippi woraawak nduk, yoragagerak nippi wogo mbareegwa, at Ndaniyen iniki at ogoba Ala oba panggonak wonage menggerak me, at agabolo ambiriluk ambi nibinik lek aret wundi wagagerak kogogwaarak.

²⁴Kogo nogogwaarik, at aap endagembogut nogo nen it aap, “Ndaniyen ndogop eekerak o,” yinuk, yereegwaarak nogo, wogonabi nawak nduk, yoragagerak wogoren wogo mbareegwa, it aap ti inom, inakuwi-inapuri inom, mbuun ambena singa wonogwe me nogome mbo wuppiyareegwaarak mbuun o'luwam awo ari wangga'lek iigak, singa nogo nen ineebe ineyak nggerembiinok inowak abok aret yigirik-noonom eerogo piyareegwaarak.

²⁵Piigo mbareegwa, at aap endagembogut Ndariyut nogo nen yi aakumi ndi aakumi inom, yi o ndi o aakumi inanebunu lombok inom, inoone alitak inom, it o nggween paga wonogwe abok aret liiru mbanogo nappiinet nagagerak nogo yi aret. “Napuri wa! Kit eerit nogwe paga kinale'nggen nggwok mbarit wundi wogo logomunggup o.

²⁶At Ala ti, kanggeelik mondok-mondok eenik wonage, At abu'me piinok menggim lek ageelik mondok wonage, At wone lengganogo yorage menggim kuli pugu lek itok wonage, Eerak aret agaarik o. At nen wondet eerogo piige, inagap ndarogo piige, Mbogut paga inom, nggween paga inom, ineenu agak eeke, Eerubok mendek iya tit eeke, Eeke menggerak o. At Ndaniyen singa inambeme yonggoliyak nduk aago me, agap ndakerak o. Togop me, an wone lengganogo yokkirage yi, kit yi o ndi o an nabu'me pinaganuk minggim wonogwe abok aret nen at Ndaniyen ogoba Ala kinagabiti mbakwi, at mban ayuk wukwi, eeko logomunggup nduk, wone yi liiru mbanogo wumbigi o,” yinuk, liiru mbanogo wumbereegerak.

²⁷

²⁸At Ndariyut o Mbaben mendek inowe endagembogut logonet yorage, ndi, aap Peretiya mendek Koreti nogo o Peretiya inowe endagembogut logonet, yorage, eekwi iigak, at Ndaniyen inabu'me logonet, ale'nggen paga wone lengganogo yorage nagagerak.