Read Western Dani Ndaniyen 7 Bible Online

Ndaniyen 7 - Western Dani bible

Ndaniyen 7

¹At Mbelitiyatat nogo tahun aa'nduk paga aakumi o Mbaben mendek inowe endagembogut a'nuk, wone lengganogo yorage kagak, at Ndaniyen nogo, nogo yege menggim nogo yege me abi kage, abinggaanggo paga yoge nogo kage, eeke nagagerik, abi kagagerak nogo liiru mbaneegerak yi aret.

²At Ndaniyen nen liiru mbangge logonet, “An oonikiya paga nabi kagarak nogo yi o. O wiya 4 kuli mbogut oolo ya'i wake menggerak nogo agi-ogu nen, aru-ogwe nen warit wage logonet, niyo nggwok yenggenak laut nogo kilaarak-mogonik eerogo pege kagak,

³ yi nggwok yenggenak laut nogo inikime nen nggwiya negen ineebe 4 kuli yele-kole mban inete alitik-alitak lagi wogwe iigirak o.

⁴ Aa'nduk lombok lagi wage kagarak nogo ti, singa enete kwak me, towe nggindooni a'naabit warak menggi kwak a'naabit warak kagarak. Kage neegak a'naabit nogo wiirogo punuk, eebe nggween me nen mippege mbaki, aakumi iniyok mbere paga mi'nogo mengga kwak, mi'ndak wonage kagak, aap iniki menggi kwak iniki warak eeppege kagarak.

⁵Kage neegak, nggwiya negen alik ambi beruang nogo mendek kin age nagaarik, eenggi awiirak iyok paga mban mi'na'nuk, eebenowak kenagan ambeme eyak nggeremborogo wonage me, Enggaanggum ndonggok togon nenet nage logot o, yinuk, ambi nen at yoge kagarak.

⁶Ti'nuk, peebi alik ambi mba'ngge anini ambik nogo mendek negen lagi wage kagarak. Towe a'naabit warak kwak at ambokan a'naabit 4 kuli, ndi, anobak kunduk 4 kuli mban me, at ayuk warak logonet, wone lengganogo yorage logowak nduk, eeppege kagarak.

⁷ Ti kage nagarik, oonikiya nabi awo kage me, nggwiya negen alik ambi lagi wage kagarak o. Nggwiya negen kagarak ti, omaawi ambik, aakumi inagabiti nen inamineeri ne agan naga nogo mendek kagarak. At eyak ti, mbuti mendek nggwok lombok me, noorak mbaketak nogo eyak ti paga yigirik-noonom eerogo nengge logonet, ando yumbunogo pege nogo, iyok aan lebenogo pit nage kagarak. Nggwiya negen yi nogo ti, aa'nduk lagi wogwe iigirak nogo kwak lek at abu alik lombok me, eyak 10 kuli anobak me wonage kagarak.

⁸ Eyak 10 nogo ti, nonggoti o? yinuk, awo liippit unggwage neegak, eyak 10 ti, enggela'me nen eyak mbuuluk ambi wungge logonet, eyak kenagan aa'nduk mendek nogo kinogo wumbege kagarak. Eyak mbuuluk ti, aakumi inigen negen wonage, ndi, ambe paga yi wone ndi wone ambik lombok ari logonet wogoppake, eeke kagarak o.

⁹ Kage nagarik, ambi awo kage me, Kwi'ndak wone lengganogo yorage logorak koonogo pit nanuk, At Anggok Ageelik Itok Menggerak nogo eyo ti paga kwi'nage kagarak. Ayum ti, ndugu-ndugu negen lan ari wonage, At eeruwak ti, towe yanggwi eeruwak negen wonage, Kwi'na'nuk wone lengganogo yorage menggim ti, kani wuninik negen wonage, Ndi, kwi'ndak menggerak iyok ti, kani wunuk ari negen wonage, Eerak kagarak.

¹⁰ At kwi'ndak menggim time nen niyo nage menggi kwak kani wuninogo nagabit nage, Aap ineebe ambik ineenggi lingginiyak meek lombok at ake eekwi, Aap yogolik mendek aago at owagam mi'ndak wonogwe, Ndi, it aap aakumi inowak loongga nogo kwi'na'nuk, aakumi eeko nogogwaarak mbuku paga liiru mbanak nogo ponggonogo pit nogwe, Eekwi iigirak o.

¹¹Iige neegak, eyak mbuuluk eyak 10 enggela'me nen wungge kagarak nogo ti, yi wone ndi wone ambik lombok ari logonet, wogoppatit nage me, nenegen wonage neegak, eebe warogo punuk, enggaawak lek eerogo kani wunuk ari me time mbo mambege kagarak o.

¹²It nggwiya negen eegu nogo ti, inayuk warak logonet, wone lengganogo yorogo nogogwaarak nogo, lek eerogo piigerak kwe, it ineenik wonogwe iigak, Ne ndogop logorak op aret o, yinuk, yorage kagak eyak mbuuluk nogo kani wunuk ari me mbo mambege kagarak.

¹³ Oonikiya ti paga mban nabinggaanggo kage logonet, aakumi inaput ndarak negen ambi o mbogut ya'i ndugwi enggela'me wage nagaarik, at Anggok Ageelik Itok Menggerak kwi'ndak wonage me nogome wage mbaki, at enggaanom paga pi wogwe iigirak.

¹⁴ Pi wogo mbaka, at ayuk warak logonet, wone lengganogo yorage logowak nduk eerogo pege, endage tiyappege, endagembogut logonet unde logowak nduk eeppege, eeke mbaki, yi aakumi ndi aakumi inom, aakumi inanebunu lombok yi o ndi o wonogwe inom, aakumi inoone alitak inom, abok aret at abu'me tebe yinuk, alut eekwi iigirak o. At ayuk warak logonet, wone lengganogo yorage logorak ti, lek arigin lek mondok-mondok yorage, ndi, at abu'me piinok menggim ti, tebenogo pugun lek mondok omaawi wonage, eeke kagarak o.

¹⁵An Ndaniyen nen, Nabinggaanggo paga kagarak abok aret ti, nonggoti negen kagi, iya! yinuk, niniki piirik ee'nake mbaki,

¹⁶it taati mi'ndak wonogwe me, at ambi owagam nage nagarik, nabinggaanggo paga kagarak alom yo'niruwak nduk yoge mbaki, Alom ndogop aret o, yinuk, kin paga yo'negerak nogo yi aret.

¹⁷Nggwiya negen kole lombok ineebe 4 kuli iigendak nogo ti, o nggween paga yime aakumi inabu'me piinok logowam ineebe 4 mi'narugun nogo aret kagandak o.

¹⁸ Mi'narugun kwe, it aap at Tiyanak Lombok Menggerak apuri alik leenak mendek nen at abu'me piige menggim wone lengganogo yorogo logowak nduk, unde eeppiyaagin me, unde logonet, mondok aret wone lengganogo yorogo logogun o. Yorogwe iigak, lek arigin lek mondok-mondok aret logogin o, yinuk, yo'negerak.

¹⁹Yo'nege mbaki, nggwiya ineebe kenagan nogo lek ogwe iigak, ambi abu alik, ayilik warak lombok eyak mbutimanggen kunik, iyogobit mbuti tembaga aago linik, eerak me, at noorak mbaketak nogo, eyak ti paga yigirik-noonom eerogo nengge logonet, ando yumbunogo pege nogo, iyok paga aan lebenogo pit nage kagarak nogo ti, alom liirogon yo'niruwak nduk yoge,

²⁰ti'nuk, anobak paga eyak 10 kuli wunabak enggela'me nen eyak mbuuluk ambi wunggerak nogo nen eyak aa'nduk mendek kenagan nogo yabonogo wumbege, it ando tebenak iigak, at omaawi ambik enegen warak ambe paga agan nage logonet wogoppatit nage, eeke nogo

²¹ kage neegak, eyak ti nogo nen it Ala apuri alik leenak nogo inom wim eeke logonet, tebenogo piige me,

²² at Anggok Ageelik Itok Menggerak nogo wage nagaarik, At Tiyanak Lombok Menggerak apuri alik leenak yi, aap abe iigak maluk eeppiige o, yinuk, inagap ndarogo piinok, it wone lengganogo yorogo logorak eyom panggoni wagaarak me, unde eeppiige kagarak nogo kunduk, alom liirogon yo'niruwak nduk yoge, eekirak o.

²³Eeke mbaki, at nen, Alom ndogop o, yinuk, an yo'nege logonet, Nggwiya negen ineebe 3 lek ogwe iigak, ambi kagandak nogo ti, o nggween paga yime aap aakumi abu'me piinok logowam ambi kin ariyak nogo aret kagandak o. At abu'me piinok logowam ti, aap aakumi inabu'me piinok menggam kwak lek abu alik lombok kin a'nuk o nggween paga yime wonogwe abok aret ambeme yonggorinabit nage logonet, iyok paga aan lebenogo pit nage logogin o.

²⁴ Ndi, eyak 10 kuli kagandak nogo ti, aap inendagembogut ineebe 10 kuli at abu'me piige logowam enggela'me mi'na'nuk, aap aa'nduk aakumi abu'me piinok menggim nogo, tebenogo pit noorak nogo iigendak o. Tebenogo pit nogwe iinok, aap endagembogut alik ambi it aap inendagembogut a'nuk mi'naremenggaarak nogo kwak lek, at abu tiyanak alik lombok mi'nage logonet, it aap inendagembogut ineebe kenagan nogo, tebenogo piyoorak kagandak o.

²⁵ At nen at Tiyanak Lombok Menggerak nogo meek eerogo pege, at apuri alik leenak nogo aaninggin-paaninggin eerogo piige, eeke logonet, Ndi eyom paga ndogop eeriyak, wone yugu inom, eeko logorak wone yugu inom, mbo punuk, alik koongge logowak nduk wakkage, eeremenggerak me, at Tiyanak Lombok Menggerak apuri alik leenak nogo, eenggime piyamenggerak wonogwe iigak, tahun kenagan eeppunuk, ambi oolo aret eerigin o.

²⁶Togop eerigin kwe, it aakumi inowak loongga nogo kwi'na'nuk, at owak loonggo logonet, at ayuk warak nen wone lengganogo yorage logowak nduk unde eeppereegerak amunggat nogo, nggoorogo waganggwi, abu'me piinok logowam nogo mondok lek aret eerogo pugwi, eerugun o.

²⁷ Lek eerogo punuk, it aakumi inabu'me piinok logonet, it inalik iniki koombunuk wone lengganogo yoranet nugwi, inayuk warak logonet, inoone omaawi paga yoranet nugwi, inendage tiyanak logonet agan nugwi, eeko logowam o mbogut abu'me yime abok aret at Tiyanak Lombok Menggerak apuri alik leenak nogo unde eeppiyaagin o. Eeppiyamenggerak unde wonogwe iigak, at abu'me piinok logowam ti, lek arigin lek mondok aret logogin me, it unde eeppiyamenggerak nogo abok aret at abu'me tebe yinuk, ayuk wukwi, at oone ari kenok konenggwi, eeko logogun o, yinuk, yo'negerak o.

²⁸Nabi kagarak alom kin paga yo'negerak nogo ti aret. Yo'nege mbaki, Wone yi, nonggoti yo'nege kagi? yinuk, an Ndaniyen nen niniki koonit nage logonet, niniki piirik lombok ee'nake, nagap nggilaame nek togon eerogo panege, eekerak kwe, aakumi ambi yoroolik nalik mban ninikime wonagarak o,” yinuk, liiru mbaneegerak ti aret.