Read Western Dani Oteya 1 Bible Online

Oteya 1 - Western Dani bible

Oteya 1

¹OTEYA WONE It aap Utiya inom, Yotam inom, Akat inom, Kitikiya inom, nen it aakumi Yekura mendek inoweewi inendagembogut a'nuk, wone lengganogo yoragak eekwi, ndi, at Yowat aput Yerobeyam nogo Iterali inowe endagembogut a'nuk wone lengganogo yorage, eekwi iigak, at Aliku ALA nen aap Mbeeri aput Oteya wone yoreegerak nogo yi aret.

²Aliku ALA nen at Oteya yoge kagak yoroorak yorikit nduk yoge logonet, “It aakumi o yime wonogwe nogo, an inogoba Naliku ALA inambokan paninuk, kumi eeginakulik mendek kagak ugun-ugun eeginabit nugu mengga kwak eerit nugwi me, kat kwe ya wukak ambi woppunuk, kapuri ti mendek awi aret ndaganabenok nduk, kola nak o.”

³Yoge mbareegi, at Oteya nogo, nage nagagerik, akwe aap Ndibalayim apuluk kolaga endage Nggomet aret waganeegerak. Waganeegerak kwe nogo, abila age nagagerik, aagaluk ogoba obaane'me aap aret ndareegerak.

⁴ Ndake mbareegi, at Aliku ALA nen Oteya yoge logonet, “At aap Yeku nen o Yiteren time aakumi kaliirubu pup eerogo inoorogo piyareegerak me, an nen at Yeku paga wiganak nogo aaninggin inoba kwippiige logonet, it Iterali wonogwe me wone lengganogo yorogo menggam nogo, lek eerogo pikit nduk eeke me, wulaga ti, endage Yiteren aret toonu o.

⁵Ti eeppiyoorak nogo eyom paga an nen it Iterali ineegin paga panggonak nogo, o Yiteren Kobappaga time kalenak-pugunik eerogo piyaagin o,” yinuk, yoreegerak.

⁶Ti'nuk, at Oteya akwe Nggomet nogo abila age nagagerik, kwe aret ndareegerak. Ndake mbareegi, at Aliku ALA nen Oteya yoge logonet, “An nen it aakumi Iterali mendek ti, ambinom inabuwa mbake, inomaluk lek eerogo piige, eerigin lek aret me, kolaga ti, endage, Abuwa Lek, toonu o.

⁷It Iterali mendek togop aret eerogo piyaagin kwe, it aakumi Yekura mendek perak, inabuwa mbake, inagap ndake, eeke logogin o. Ti eeke logogin nogo ti, yigin paga, wooluwak paga, wim eekwi paga, kuda paga, it aap kuda paga kwi'na'nuk wim eeka paga, inagap ndarigin lek o. Ata, inogoba Naliku an ALA nen aret inagap ndake logogin o,” yinuk, yoreegerak.

⁸At kwe Nggomet nogo kolaga endage, Abuwa Lek, nogo yilak mbanogo punuk, peebi abila age nagagerik, aagaluk aap aret ndareegerak.

⁹Ndake mbareegi, at Aliku ALA nen Oteya yoge logonet, “Kit Iterali ti, an napuri lek aret. Ndi, an kit kinogoba Ala lek mban me, wulaga ti, endage, Napuri Lek, toonu o.

¹⁰ Togop aret kwe, mbini niyo aa'nggi paga wonage nogo ambik me, aaninggin wakkogwe, ineenggi lingginggwi, eeriyak meek menggi kwak, it Iterali mendek ineebe togop aret arugun o. Ogo mbaremengga, Kit an napuri lek o, yinuk, yoragagim nogome, It an neenik minggirak Ala napuri aret o, yinuk, yoraagin o.

¹¹It aakumi Yekura mendek inom, Iterali mendek inom, aa'nduk iniki ambit a'nuk wonogogwa kwak, peebi iniki ambit a'nuk, inowe inarum logorak ambi leenogo mippunuk, it mbo piya namenggam nogome nen woraanuk, o yime it aret unde eeppatinuk logogun me, O Yiteren eeppuurak eyom nogo ti, mondok iya aret o, yinuk, yogo logogun o.