Read Western Dani Oteya 10 Bible Online

Oteya 10 - Western Dani bible

Oteya 10

¹It Iterali ti, eyo anggur eno'mbak wiganogo punuk, anggen abe yege menggi kwak wonogogwaarak o. Anggen ambik aret yi'nage kagak, inayuk wukwi inake warogo wogoragak kunduk, ambik ogobakkigirogo pit nogwe, Inanggween mili lubunit nage kagak, inagugiwak kunduk, etenggen abe eerogo mippit nogwe, Eeko nogogwaarak.

²It ti, inoone abe yogwe kwe, iniki alik koombunuk yogwe me, It maluk eekwi onggo inobaalombok aret nggelenogo pako agaarik o. It inayuk wukwi inake warogo wogoragak ogobakkigirogo pit nogogwaarak nogo, Aliku ALA nen yinik-minik eerogo pit nage, inagugiwak ogobakkigirogo mippit nogogwaarak nogo, yigirik-noonom eerogo pit nage, Eerigin o.

³Ti eeke kenok, it nen yogo logonet, “At Aliku ALA ninagabiti mba'nuk mugurok naga'lek me, Yogondak ninowe endagembogut ninarum wonage lek aret o. Ndi, ninowe endagembogut wonage nen nano eeppinaniyak me, mi'ndak logorak? Lek aret o,” yinuk, yogo agaarik o.

⁴It nen, “Nit ndogop eeppinagago logogun o,” yinuk, koonogo pugwi, Pilit kagak, “Wone abet aret o,” yinuk, kumbuk mbanggwi, “Ninom ndogop aret eeko logowok o,” yinuk, wone koonogo pugwi, Eeko menggaarak kwe, Yagaatak nogo eekwi lek me, yabu wogo paga iri'ngga abe lek alok mendek mban pilak ari menggi kwak, It inabu'me piinok menggam wonogwe nogo nen inom wone wako menggaarak.

⁵It o Tamariya menggaarak nen inayuk wuka tapi aagaluk ogut eerak o Mbet-Awen wonage nogo, Wonok o nda time pi nogwe iyo, inagabiti mbakwi, Iniki wakkologo logonet, le yogwe, It aap inagugi ogut eerak abu abe eerak me, pi wakwi it kugi unde nogo nen kunduk, le yogwe, Eerugun o.

⁶Tapi aagaluk ogut aago ti, wonok o Atiyut pi nanuk, Aap endagembogut abu tiyanak lombok wonage nogo, inarum wonage onggo wogorugun o. Ti eeremenggaarak paga it Eparayim mendek inendage maluk age, Ndi, Iterali mendek eyo paga ogut aago kagak iniki panggombereegwaarak me, inenggali age, Eerugun o.

⁷Eyo ira'nggup mbanak niyo ogombaga lunik wonok nage menggi kwak, It Tamariya mendek inowe endagembogut inom togop aret wogoren nagun o.

⁸ O Mbet-Awen puut-puut kugi awi wuppunuk maluk eerit nugwi ti, Iterali maluk eeko menggam aret me, Lek eerogo pit nagun o. It inayuk wukwi inake warogo wogoragak ogobakkigirik nogo paga iri'ngga alok-palok mban yinik-kunik eerogo pege kenok, It nen, “Nit nineebe noba'ninabu o,” yinuk, puut-puut yorogwe, Ndi, puut-puut teberogon nogo yorogo logonet, “Kit nen aan wogonogo nineebe lebembinaninuk logonip o,” yinuk, yorogwe, Eerugun o.

⁹ Aliku ALA nen ari logonet, “It Iterali ti, o Nggibeya time maluk eeko nogogwaarak kuli nen nok maluk mban eerit wundi wogo nogogwaarak o. Eerit wogwe iigak, o Nggibeya time inawim nen inoba kwi'nari woroolik mbakop?

¹⁰It maluk eekwi onggo aaninggin inoba kwippiyaakit, mbake kenok, aret eeppiyaagin o. It maluk oba luk-luk eerit nogwe paga aaninggin inoba kwippiyaawak nduk, An nen it aakumi inanebunu lombok inayonggo piminggirak kuwak ari woraagun o.

¹¹It Eparayim mendek ti, aa'nduk tapi ndugum yabu eeriyak mamunik me, Gandum anggen mbelaniyak inikilom wonagagi kwak wonogwe me, It inabuwa nen eyo aaninggin inuum paga piiga'lek wonagagirak kwe, Yogondak perak, yabu aaninggin mendek eeruwak nduk, eyo aaninggin inuum paga kwippiige, It Yekura mendek nggween kabunuwak nduk yoraminggirak kabunggwi iigak, it Yakup mendek nen nggween kabunik nogo amini mbanuwak nduk yorage, Eerigin o.

¹² An mu'neren woroorak eyom muk panggoni wagaarak me, Mayu wuppi wage menggi kwak, Naliku ALA wage logominggirik, obeelom eerogo piyaakit nduk, A'me nggelok eeka eeppiyoorak awi kwak yumbunit nogwe, Aakumi iniki kunik aganaburak anggen kwak mbanit nugwi, Ineyabu nggulaame yabu eerit unggwogwe, Eeko logowak o.

¹³Togop aret eeko logowak mbakirak kwe, it nen awi yumbunggwi kwak maluk eerit nugwi, Anggen mbanggwi kwak, maluk eekkologwe, Eeko agaarik o. It pilit pugunit nogo nogogwaarak ti, anggen mbanak kwak nenet nogo agaarik o. It inomaawi paga, inawuri ineegin warak ineebe ambik paga, iniki panggombunuk wonogwe me,

¹⁴Wim eeriyak nduk anggut-nggut wakkogo logomenggaarik, it Iterali inoba kwi'nari unggwogo logonet, Inawi yugum pak wurik nogo yigirogo wurabit nogo logogun o. Ti eerugun nogo ti, aap Talaman wim eerit unggwage logonet, kota Mbet-Areben yigirogo pege, Kumi inaagalogwe awo ndarak inom yimbinik-nggunik eerogo nggween paga mbo piige, Eereegi kwak, eeginabigin o.

¹⁵It o Mbeten wonogwe ti, maluk mondok iya eekwi me, togop aret eerogo piyaagun o. Ti eeriyak nogo ti, it Iterali inowe endagembogut enggaawak muk lek aremenggerak kagak, o kilim nagabigin o, yinuk, yegerak me, yokkiragi o,” yoragagirak.