Read Western Dani Oteya 11 Bible Online

Oteya 11 - Western Dani bible

Oteya 11

¹ Aliku ALA nen ari logonet, “It Iterali ti, wologwe mbuulogwe kwak wonogwe iigak, an niniki kunik eeginake, An naput me, O Metit nen wundi omok o, yinuk, endage kunogo wiige, Eereegirak o.

²Wiiragak eeke neegak kwe, nomo agan mbaganit nogo logonet, kugi Mba'an nogo inake warogo wogorogwe, Inagugi ogut eerak nogo inake obari abe kaga kani kunggwi, Eeko nogogwaarak o.

³An nen it Eparayim mendek tu noorak mamunirage, Nawak nduk, neenggi pigiren nage, Ndi, yigeebu wanggwi iinok, mippiinok, obeelom eerogo piige, Eereegirak kwe, It liippanega'lek aret wonogogwaarak o.

⁴Wam keele luwi mbareniren nogo mengga kwak, an nen inabuwa mba'nuk wogoren nage, Niniki kunik eeginake logonet, pigiren nage, Eyo aaninggin tapi enggaanok me pugu mengga kwak, it aaninggin inoba age me, an nen teeluk eerogo piige, Niniki yanggonak paga inambi nawak nduk wogorage, Eeke nagagirak o.

⁵Eeke nagagirak kwe, it inomaluk mbo puurak ineebi mbareegwaarak paga iniyokan o Metit nogwe, Ndi, it aap Atiyut mendek nen inabu'me piinok, wone lengganogo yorogwe, Eeko logogun nogo lek a?

⁶Maale namburik it wonogo menggam kota-kota pinda agan wambit nage, Inawi pak wurik wa'mbit mbuti paga eerak narak nogo, kalenak-pugunik eerogo wurabit nage, It eeriyak koonit nugwi nogo, lek eerogo piinet nage, Eerigin o.

⁷It an napuri nen an abu mbo paniyak kooneegwaarak me, An Tiyanak Lombok Minggirak nendage kumbunuk, Yeenggwa niret o, yinuk, yo'nirimenggaarak kwe, Noone onggo ambi yoraga'lek puk aret arigin o.

⁸ It togop eekwi iigak kwe, an nonggop togon it Eparayim ti teppiige, It Iterali ti, nenegen aanggot iinok, nonggoti mbo piige, Eeriyak mbakop? It aakumi Arama mbo piyareegi kwak, it Eparayim mbo piige, It Teboyim eeppiyareegi kwak it Iterali eeppiige, Eeriyak ti nonggoti o? Niniki nenaame ari wage logonet, inabuwa lombok mbake me,

⁹An nanini kani omoonuk negen mi'nage logonet, it inoba kwippiige, It Eparayim mendek ambinom lek eerogo piige, Eerigin lek o. An aakumi kwak lek o. An Ala kikak nakeelik alik leenak it inenggela'me minggirak me, Nanini nen maluk eerogo piyaakit nduk, woraagin lek o.

¹⁰Singa nen oone kole agan nege menggi kwak, Naliku ALA noone nggwok ari neenok, napuri mu'neren wogwe, Noone kole ari neenok, an napuri oonegen kilu yi nage menggim pa'nggwe nen inaganak warit an neya wogwe,

¹¹Towe wiga agan nugu mengga kwak, it Metit nen inaganak nugiranet wogwe, Towe puume kwak, o Atiyut nen inaganak warit wogwe, Eekwi iinok, An nen it iname lombok logowak nduk piinet nagin o, yinuk, at Aliku ALA nen aret yegerak me, yokkiragi o,” yoragagirak.

¹²Wim eeriyak o panggerak mengga kwak, it Eparayim inoone pilit-pilit yogwe mban an wanggeppaninuk wonogwe, It Iterali mendek ti, nambokan laganggak mban eekwi, Ndi, it aakumi Yekura mendek nen inogoba Ala at yorage nogo, Eeriyak, ineebi mban mbakwi, At Kikak Nakeelik Alik Leenak nogo inom ogoorak mban wonogwe, Eeko agaarik o.