Read Western Dani Oteya 12 Bible Online

Oteya 12 - Western Dani bible

Oteya 12

¹O wiya mugurok nogo logonet, ambi kola nogolik aanom warogo mugurok nogo mengga kwak, It aakumi Eparayim mendek togop aret eerit nogwe, O wiya oonegen lagi wage menggim pa'nggwe nen warit wage nogo mugurok nogwe iigak, O kubondendok nen o kiyoma ari nage menggi kwak eerit nogwe, Eeko agaarik o. Togop eeko logonet, pilit pugunit nogwe nogo nggwok wigak ari, Aakumi maluk eeppiinet nugwi nogo mban pilak ari, Eeke kagak It aap Atiyut mendek ninom yogop eeruwok o, yinuk, iniki ambit eeppunuk wone koonogo pugwi, “Nit ninoreewi aret o,” mbaruwak nduk, tayitun amburu wonok o Metit nogwe, Eeko agaarik o.

²At Aliku ALA nen it Yekura mendek ambi eekwi paga yoroorak mbake, It Yakup mendek eekwi nogo mugurok eeppiige, It maluk eerit nugwi nogo onggo ndak-ndak eeppiige, Eerigin o.

³ At Yakup nogo agalo inikime nen nda'nage logonet, oreeluk iyok unggut eenggi pugu aret nda'nage, At eebe nggwok age nagagerik, Ala imbirak wuk eekkolage, Eereegerak nogo o.

⁴ At malayikat imbirak wuk eekkolage logonet, at Yakup aret omaawi tiyak ari, Le ari logonet, “Nabuwa mba'nuk, obeelom eeppanu o,” yinuk, yoge, O Mbeten paga abuk a'nuk, time nen imbirak wone mbangge, Eereegerak o.

⁵Imbirak eereegerak nogo ti, at Omaawi Lombok Menggerak Aliku Ala aret me, At endage nggwok agagerak ti, Aliku ALA aret o.

⁶Togop me, kit kiniyokan yungguninuk kinogoba Ala owagam wa'nuk, aakumi kinom kiniki kunik eeginabit nugwi, A'me nggelok liirogon mban eeppiinet nugwi, Kiniki kinogoba Ala paga mban panggombunuk, kiniki kwippunuk, tokkogwe, Eeko logomunggup o.

⁷It aap yi mendek ndi mendek kungga nogo nen aaninggin wakkaanuk ndak-ndak aga'lek kagak, “Ndak-ndak aga o,” Yinuk, aakumi wi-wi aganaburak inikilom mba'nuk eerit nugu mengga kwak,

⁸it Eparayim nen yogo logonet, “Nit nineenggi warak lombok age, Ninamendek ambik lombok kuwak eerogo pakwi, Eekoorak nogo Aakumi nen, Nit wi-wi ee'ninako logonet, ineenggi warak aga o, yinuk, yo'nirogwe, Aakumi maluk eeppiinet nogo logonet, inamendek ambik kolaga o, yinuk, yo'nirogwe, Eeriyak meek o,” Yinuk, iniki wogoppako menggaarak o.

⁹ Aliku ALA nen ari logonet, “O Metit nen wogoren wundi wagagirak Naliku inogoba Ala an aret o. It inale'nggen nen laago lariyak wone yugu nogo lako logonet, inawooliya wuppunuk lako nogogwa kwak, Peebi inawooliya wuppunuk logowak nduk, eerogo piyaagin o.

¹⁰It an nen yorage neegak yoraga nogo wone yorage, Inabinggaanggo paga yorage, An yorage neegak yoraga nogo wone eegu laarogo yorage, Eeke nagagirak o,” yinuk, yegerak me, yokkiragi o.

¹¹O Nggileyat time maluk eeko menggam aret me, it aakumi ti, we aanom warogo kagak eerit nugu menggaarak. Ndi, o Nggiligan time tapi ngguunok warogo inagugi ake wogorogwe me, Inagugi warogo wogoragak ogobakkigirik nogo ti, yugum yabume kalo logonogo pit nogo mengga kwak aret wonage agaarik o.

¹² At Yakup nogo mbaganit o Aram nage nagagerik, time logonet, At Iterali nen akwe kolaakit nduk aakumi inayeloman age, Akwe koloorak onggo ndomba ndegeninake, Eeke nagagerak o.

¹³ It Iterali o Metit nen wogoren wundi woraawak nduk, Aliku ALA nen yoge kagak yoraga ambi mippege, Iterali ndegeniren woraawak nduk, at yoge kagak yoraga ambi yoge, Eereegerak kwe,

¹⁴Kit Eparayim eekwi paga at iniki andi lombok eerogo pereegutak me, Kinogoba nen maluk eekwi onggo kinoorogo pinagamenggaarak kinamiya wunduwak nduk teppinagage, Ndi, at Ala meek ombakwi onggo eeppinagawak nduk, mbo pinagage, eerigin o.