Read Western Dani Oteya 4 Bible Online

Oteya 4 - Western Dani bible

Oteya 4

¹Kit Iterali yi wae. Kit aakumi o yime wonogwe yi, ambi eekotak paga Aliku ALA nen yokkirage me, kinaruk konenggo logonip o. At Aliku ALA nen ari logonet, “O time it nen an noone liippunuk eekwi, iniki kunik ee'nakwi, Ninogoba Ala at aret, nombakwi, Eeka'lek aret agaarik o.

²It nen pulunogo piinet nugwi, pilit-pilit agan nugwi, Aap inoorogo piinet nugwi, yogoot kumaakwi, Kumi ugun-ugun eeginabit nugwi, maluk mban eerit nogo logonet, ambi wappunuk, kinok togon ambi wakwi, Eekwi mban me,

³o time nggween mbuk age, It aakumi o time wonogwe abok aret ineebe wururanet unggwage, Ndiimbu-nggwiya karume mendek inom, yi towe ndi towe wiga agan nugu menggaarak inom, yikwe niyo kole yenggenak laut inikime menggaarak inom, abok aret kambit nogwe, Eeko agaarik o, yinuk, yegerak me, yokkiragi o,” yoragagirak.

⁴“At ambi nen, Kat eekendak paga ee'ninake o, yinuk, at ambi yogak eekwi, Ndi, inenggali wa'wat yogwe, Eerugwaarik o. An eerigin ti, it aap an neebe unde menggaarak eekwi paga aret eeppiyaagin o.

⁵It nen o liingge paga, oonikiya paga, iniyogobit lik togon wanggwi, Ndi, aap an Ala nen yorage neegak yoraga nogo kunduk, inom iniyogobit lik togon wanggwi, Eekwi me, It inagalo Iterali ti, lek eerogo pigin o.

⁶Ndi, it an napuri kunduk, neebe liippanega'lek me, ineebe lek aret arugun o. It neebe unde nen an liippaniyak wone nogo, it yoraga'lek mbo pereegwaarak paga an nen it mbo piige, Eeko logorak wone an inogoba Ala nen yoragagirak nogo, Mari eerogo pereegwaarak paga an nen it inapuri liippiyaagin lek mbo piige, Eerigin o.

⁷It an neebe unde nogo ineebe ambik wigannarit nogwe, It an maluk eerogo panegak mban eekwi, Eerit nogo logonet, Inendage tiyanak nogo obaane'me inendage tebenogo pateegwaarak o.

⁸It an napuri maluk eekwi paga inambi nuurogo nonggo menggaarak me, It an napuri maluk eekwi iinok, inale'nggen mbako menggaarak o.

⁹It aakumi eeppiyaagin nogo ndak-ndak, it an neebe unde ti kunduk, togop aret eeppiyaagin o. It imbirak eerit nugwi paga aaninggin inoba kwippiige, Imbirak mban maluk eekwi onggo ndak-ndak eeppiige, Eerigin o.

¹⁰It inambi nonggo logomenggaarak kwe, ndonggoppiiga'lek aret logogun o. Naliku an Ala mbo paninuk, kumi ugun-ugun eeginabit noorak mba'nuk, eekwi kwak eerit nugwi, Anggur amburu maan toolak inom, ngget toolak inom, nenok, inanobako apit eerogo piige kagak kwe, Naakit, mban mbarit nugwi, Eekwi me, Kumi ugun-ugun eeginabit nugu mengga kwak eerit namenggaarak kwe, ineebe wigannarugun lek aret o.

¹²It an napuri ti, eeriyak kobak kenok yoraawak nduk, eyo paga kugi ogut aago nogo yogwi, Eyo obate mbanak kagak kwe, Onggo yo'nirage, mbakwi, Kumi ugun eeginaburak iniki nen yorage kenok, ugun-ugun eeginabit nugwi kwak, An inogoba Ala liirogon mu'neren naga'lek mbo paninuk, alik mendek muguren nugwi, Eeko agaarik o.

¹³It nen puut-puut tiyarogon paga inagugi inake warogo wogorogwe, Puut teberogon eyo teno inom, kilu inom, win inom, alome ngguna'me nogome inagugi inake inaanggo warogo kani kunggwi, Eeko agaarik o. Ti eerit nugwi paga it inapuri komologwe tawe nogo, terak wuginaka ogwe, Ndi, inapuri wologwe inakuwi nogo ya wuginakak ogwe, Eeko agaarik o.

¹⁴Togop kwe, it komologwe ti, inogobamini inom, inogonggelomini inom, nen it kumi terak wuginakak inom nogo yit nugwi, Ugun eeginakak yuwak nduk, inagugi awi wurik me wonogwe nogo inom kugi aanggo warogo wogorogwe, Eeko menggaarak me, It inapuri komologwe terak wuginakak yuwak nduk eekwi, Inapuri wologwe inakuwi ya wuginakak yuwak nduk eerit nugwi, Eekwi iinok, An aaninggin komologwe ti, inoba kwippiyaagin lek o. Ata, inogobamini inom, inogonggelomini inom, perak, aaninggin inoba kwippiyaagin o. An togop aret eeppiige neenok, it aakumi iniki kobak lombok yi, lek aret arugun o.

¹⁵It Iterali ti, kumi ya wuginakak kwak eerit nugwi kwe, it Yekura perak, togop eerugwaarik o. It o Nggiligan paga kugi alut eerit nogwe, O Mbet-Awen lagi nogwe, An neenik minggirak Naliku ALA nendage kumbunuk, kumbuk mbanggwi, Eerugwaarik o.

¹⁶It Iterali ti, tapi ndugum anobak yugum kwak wonogwe me, Ndomba aagalogwe kwak iri'ngga abe nenet nugu logowam time Naliku ALA nen nonggop togon piyoorak. Lek aret o.

¹⁷It Eparayim mendek ti, inagugi inom kunggologogwaarak wonogwe me, inobaalombok o!

¹⁸Anggur amburu ndonggok togon nenok, kumi ugun-ugun eeginabit nugwi kwak eerit nugwi me, It nen, Ninenggali wappinaniyak ti, op aret, mba'nuk eerit nugu agaarik o.

¹⁹Togop mbako menggaarak kwe, o wiya warit wage logonet, yi mendek ndi mendek kabe'nuk nggarek ari menggi kwak, it togop aret ogwe, Ndi, inagugi inake warogo wogogwi ti paga inenggali aret ogwe, Eerugun o, yinuk, yegerak me, yokkiragi o,” yoragagirak.