Read Western Dani Oteya 5 Bible Online

Oteya 5 - Western Dani bible

Oteya 5

¹Aliku ALA nen ari logonet, “It an neebe unde abok aret ti, wone yi, inaruk konenggwi, It aakumi Iterali mendek ti, yorage yi, liippugwi, Aap endagembogut akuwi-apuri inom ti, inaruk liirogon konenggwi, eeko logowak o. Keele o Mitapa paga pugwi, Puut Tabot paga towe yonggo'naruwak nduk yum mbiganogo pugwi, O Titim nggwiya wambuurak nggween ogurogon kabunggwi, Eeko mengga kwak, It ti, togop menggaarak me, Aaninggin eeppiyoorak wone yi ti, it inake aret yorage agarik o. It abok aret ti, eerit nugwi paga an nen aaninggin inoba kwippiyaagin o.

³It Eparayim mendek an abu liippiige, ndi, it Iterali mendek kumaarak lek kin paga iige, eeke agarik o. It Eparayim ti, kwe ya wukak kwak eerit nugwi, Ndi, it Iterali ti, inalik nen aret maluk eerogo pakwi, Eekaarak wonogo agaarik o, yinuk, yegerak me, yokkiragi o,” yoragagirak.

⁴“It eerit nugwi ti paga yilunogo pateegwaarak me, iniyokan inogoba an Ala neya woroorak meek aret agaarik o. Kumi ugun eeginaburak iniki nen yorage kenok, ugun-ugun eerit nugwi kwak eerit nugwi, Ninogoba Ala at aret, nombakwi lek mbo panugwi, Eeko agaarik o.

⁵It Iterali iniki tiyappakwi ti paga nen it maluk eekwi nogo kin aret age agaarik o. It Iterali mendek inanebunu Eparayim nen maluk eerit nugwi paga nggelenogo pakwi, Ndi, it Yekura kunduk, inom ndak-ndak aret nggelenogo pakwi, Eeko agaarik o.

⁶At Aliku ALA ninom lambunuwok o, yinuk, Inaanggumi tapi-ndomba wonok nake pi woramenggaarak kwe, an ninom lambungga'lek aret wonogwe, It inenggela'me nen mbo piinok mbaganggirak neegwi, Eerugun o.

⁷It nen Naliku ALA liirogon mu'neren naga'lek logonet, Kwe elege terak ndarogo piinet nage menggi kwak, Iterali togop aret eerogo piinet nugwi me, An mbo paninuk alik mugurok nogwe nogo nen ineebe ambeme yonggorinake logonet, ineyabu yarak inom ambeme yonggoligin o, yinuk, yegerak me, yokkiragi o,” yoragagirak.

⁸“O Nggibeya nen oone pu eeka trompet nogo oone pu eekwi, O Arama nen ndomba eyak nogo paga oone pu eekwi, O Mbet-Awen nen, Nawim niri mok o, yinuk, kuum-keek yogwe, It Mbeniyamin mendek nen wim eeriyak inaa'nduk ogobak wa'nuk nogwe, Eeko logowak o.

⁹Aaninggin inoba piyoorak ne ari wage kenok, Eparayim nogo kaliirubu pup eerogo piyaagin o. Togop aret me, it Iterali inanebunu lombok inenggela'me, Wone yi, abet aret eerigin, mbaruwak nduk, yorage agarik o.

¹⁰Aap Yekura inengga warak ti, nggween kuli pugu kagak ya langgok eerogo pogo mengga kwak wonogwe me, Niyo wu'nuk wage menggi kwak, nanini mondok nggwik togon inoba kwippiyaagin o.

¹¹It Eparayim ti, inanobak yugum kwak logonet tu alik we aanom warogo kagak mugurok noorak mbakwi me, Aaninggin inoba kwi'nagagerak mondok tebenak aret wonogo agaarik o.

¹²Togop aret me, yininuwo nen yi mendek ndi mendek mbanogo pit nage menggi kwak, It Eparayim eeppiyoorak an togop aret wonage, Ndi, nggoon nen eyo mbangge menggi kwak, it Yekura eeppiyoorak an togop aret wonage, Eerak aret agarik o.

¹³It Eparayim mendek nen andi lombok inoba kwi'nagagerak nogo kogwe, It Yekura mendek nen inawin kunik maloppakwi, Eeko nogogwaarik, It Eparayim mendek ti, O Atiyut nen yeenggwa nira woraawak o, yinuk, Aap endagembogut abu tiyanak nogo wonage me yonggo nappiyareegwaarak kwe, At nen obeelom eerogo piya wage, inawin nogo lek eerogo piya wage, Eerulik o.

¹⁴It Eparayim mendek eeppiyoorak an singa kwak wonage, Ndi, it Yekura mendek eeppiyoorak an singa awooluk eyak ambik menggi kwak wonage, Eerak logonet, An nen it ando nibinik-ndelenak eerogo piinok, nggarek ari, Ando neyak nggereneren nage, Eerigin me, Aap ambi neyak me nen ndinigin lek aret, yegerak me, yokkiragi o,” yinuk, yoragagirak.

¹⁵“Ti eeke neenok, it nen, Nit maluk aret eeko o, yinuk, inomaluk awo pagangga'lek iigak, an wonage minggim ari naminggirak wonage logogin o. Wonage neegak, it an mu'neren wogwe, Aaninggin-paaninggin inoba kwi'naremenggerak ti paga, At ninom lambunuwok lak, ao, yinuk, an kwaa'nabit nugwi, Eerugun o, yinuk, yegerak me, yokkiragi o,” yoragagirak.