Read Western Dani Yowen 1 Bible Online

Yowen 1 - Western Dani bible

Yowen 1

¹YOWEN WONE Aliku ALA nen aap Petuwen aput Yowen wone yoge mbareegi, yoragagerak nogo yi aret.

²“Aap Iterali inoweewi kit yi wae. Wone yokkirage yi, kinaruk konenggo logonip o. Kit aakumi o yime monggotak abok aret yi wae. Kinaruk logonip o. Kit wonogwe yi eyom paga inom, kinombomini wonogogwaarak ti eyom paga inom, yogondak eeke yogobi ambi eereegerak yogwe koneneegutak ilik?

³Lek aret me, yi arit wage nogo, kinapurilogwe mbininogo yorogo logonip o. Yorogwe kiinok, it kinapurilogwe nen it inapurilogwe kunduk mbininogo yorogwe, Ndi, it nen inapuri peebi ndappiigwi nogo mbininogo yorogwe, Eerit wundi wogo logowak o.

⁴Yibila kombogonak yi mendek ndi mendek uwiirogo nunggwi, Nenok, nogwe iigak, it wurin kole nogo mendek woraanuk, ando pereegwaarak nogo uwiirogo nunggwi, Nenok, nogwe iigak, lelembu kombogonak woraanuk, ando pugu nogo uwiirogo nunggwi, Nenok nogwe iigak, yalitom woraanuk, ando pugu nogo uwiirogo nunggwi, Eereegwaarak o.

⁵Kit niyo kumili aganaka mendek nengga yi wae. Kineenik a'nuk le yikkologwe, Kit anggur amburu nengga yi wae. Leenggu maakwi, Eeko logonip o. Anggur amburu ngget toolak nunggwi kiigak, kinambeme nen ndinogo nappegaarak me, Kit le yikkologo logonip o.

⁶ It aakumi ambi mendek mondok inomaawi ineebe ineenggi lingginiyak meek, Ineyak singa eyak kwak, Ineyak singa kooli eyak nggorek kwak, Wogo logonet, o an wonage minggim mondok kwi'nari unggwogogwaarak o.

⁷Kwi'nari unggunuk, nageyo anggur yarak abu lek eerogo pugwi, Nageyo wuli nogo obate mbanogo pugwi, Eeppunuk, Agabolo mbelanogo mbo pereegwaarak me, Eno'mbak agabolo mbelanak lan ari kagak mbaganeegwaarak.

⁸Togop me, kolaga ambi ogonggelo imbirak awo lambumbiigaarak imbirak iniki kunik nogo, Woronogo punuk kangge kenok, purok yikut eeppunuk, aleenggu maake menggi kwak, Kit leenggu maako logonip o.

⁹Gandum ake pi wogwe, anggur amburu ake kilirogo pugwi, eekwi nogo, Aliku ALA awi wurik me nen muk lek agaarak o. Ndi, it aap Ala eebe unde nen Aliku ALA enggaanom paga ake liirogon eeka nogo leenggu maako agaarik o.

¹⁰Yabu yarak nogo maluk age, Nggween nogo abu mbuk aret age, Gandum yarak nogo lek age, Anggur anggen awo yugu nogo mbuk age, Eyo tayitun anggen yugu lek me, amburu tooka'lek wonage, Eekerak wonage agaarik o.

¹¹Kit aap yabu eeka yi wae. Kiniki puru yogwe, Kit aap anggur awi yaka yi wae. Kinaleenggu maakwi, Eeko logonip o. Yarak anggen kole agaarak nogo, abu lek eerogo pegaarak me, gandum inom, waabuk kwak jelai inom, Lek agaarak paga kiniki wakkologo logonip o.

¹²Eyo anggur awi yarak abu mbuk age, Eyo wuli muk teebat eerogo pege, Eyo delima inom, apel inom, nggabu inom, yi eyo ndi eyo yarak abok aret mbuk age, Eekerak me, It aakumi inale'nggen abu lek agaarak wonogo agaarik o.

¹³Kit aap Ala unde yi wae. Kinayum maluk nibinik mendek yippunuk, kiniki wakkologwe, Kit aap Ala ake warogo wogogo menggam yabu eekwi yi wae. Leenggu maakwi, Eeko logonip o. Gandum anggen yigirik ake puurak inom, anggur amburu toolak ake kiliriyak inom, Kinogoba Ala awi wurik me ambinom pi wogo logogun lek me, Kit an nogoba Ala enggaanom paga yabu eekwi yi, Kinayum maluk nibinik mendek yippunuk, Ala awi wurik me unggwogo logomonggotik, Le yogwe kiigak nogo ambit yumunggup o.

¹⁴Maluk eeka'lek logonet, kinambe mage negen eeppunuk, logonip o, yinuk, yorogwe, Ala alut eeriyak kuwak ari woraawak nduk, yorogwe, Eeko logonip o. It aap kinoweewi kinarum menggaarak inom, It aakumi o yime wonogwe abok aret inom, Kinogoba Aliku Ala awi wurik me kuwak ari wa'nuk, inoone nggwok paga Aliku Ala yoruwak nduk inayonggo piyaanip o.

¹⁵ Ne ti nogo ti, aakumi inamineeri ne agan noorak aret me, iya! At Aliku ALA eeriyak eyom muk koorok panggoni wagaarak o. At Omaawi Lombok Menggerak wage logonet, nit aakumi lek eerogo pinanege, Yi mendek ndi mendek mondok lek eerogo pege, Eeriyak eyom aret ari wage agaarik o.

¹⁶Ninigen lo yogwe niigak, ninambi wonok nogwe iigwi, Ninogoba Ala awi wurik me, ninale'nggen yogwe, ndawi lubuk yogwe, eekwi nogo lek age kogwe, Eekoorak nogo lek a?

¹⁷Nggween inikime woloonak lombok me, anggen awi yarak nogo mbuk arit unggwage, Anggen mbanogo kuwak eerogo pogo menggam we aret wonage, Gandum anggen yega'lek mbuk arit unggwegerak me, pogo menggam mi-mi wanggerak wonage, Eerak aret agaarik o.

¹⁸Ninaanggumi mbi abu nen yinggwe-yanggwe agan nogwe, Inagari'ngga mbanogo nenet noorak lek kenok, lembu-tapi ambi me lingga nagak eerit nugwi, Ninandomba kunduk, mbi abu nen inoone nggininu-ngganinu agan nogwe, Eeko agaarik o.

¹⁹Togop me, Kaliku Ala wae. Tapi-ndomba inagari'ngga nenet nogo menggam nogo kani nen wiyanogo pit nage, Yi eyo ndi eyo yabume yarak wonage nogo, kani omoonuk nen nenet nage, Eekerak kenok, Noone nggwok paga yokkege agarik o.

²⁰Niyo nage menggim abok aret porok yi'nage, Inagari'ngga mbanogo nenet nogo menggam karume time kani nen pup eerogo nengge, Eekerak me, Ndiimbu-nggwiya kunduk, Eeppinanuwak lak, ao, yinuk, kat pekkeego logonet, iniki tat warit nogo agaarik o.