Read Western Dani Yowen 3 Bible Online

Yowen 3 - Western Dani bible

Yowen 3

¹At Aliku ALA nen ari logonet, Ne ti ariyak age eyom paga o Yerutalem inom, Yekura inom, aa'nduk obeelom wonogogwa kwak eerogo piige logonet,

²It yi aakumi ndi aakumi nen an napuri nogo aakumi inanebunu lombok inenggela'me mak eerogo piinok, Nanggween napuri wogoragagirak nogo tumbukkologwe, Ninayeloman mini logorak ta age kaamun? yinuk, yugum wakkogwe, Iterali inapuri wologwe nogo terak wuginakak aruwak nduk, eerogo piigwi, Anggur amburu neenok, kumili kunuwak nduk Iterali inapuri komologwe nogo anggur amburu onggo mbanogo wogorogwe, Eeko nogogwaarak me, Yi aakumi ndi aakumi abok aret kuwak eerogo piinok, wogoren o Yotapat Kobappaga piya wangge logominggirik, It an neyate kwak napuri Iterali eeppiigo nogogwaarak paga inawone mbambunuk, eereegwaarak onggo aaninggin inoba kwippiyaagin o.

⁴ An ngge eeppiigirak paga it Tirut mendek inom, Tiron mendek inom, o Pilitin paga menggaarak abok aret inom, nogo nen an ninom wone yuurak eeko agaarik? An ngge eekirak me, onggo eeppaniyak nduk eeko agaarik o? An ambi eekirak paga eeppaniyak mbakwi iinok, it eeko nogogwaarak onggo an logonuk lek mbet-mbet aret melak togon inoba kwippiyaagin o.

⁵It aakumi ti nen aret an namendek mbuti emas inom, namendek mbuti perak inom, namindik-namendek abu abe onggo mondok iya lombok nogo inom, wonok it inagugi ayuk wurit nogo menggam pit nogwe,

⁶it aakumi o Yekura menggaarak inom, o Yerutalem menggaarak inom, Iname logorak lek o nda time logorak nappiyaawok, mba'nuk, it aakumi Yunani mendek inoba kuninakwi, eereegwaarak me yagi o.

⁷Napuri aakumi inoba kuninabeegwaarak inenggela'me wonogwe me time nen wogoren piya wage logominggirik, it eeppiyareegwaarak onggo ndak-ndak yogondak inoba kwippiige neyaagun o.

⁸It inapuri wologwe-komologwe nogo, aakumi Yekura mendek inoba kuniminggirak me, ti'nuk, it Yekura mendek nen inapuri ti, waganogo aakumi Teba mendek o nda time wonogwe nogo inoba kuninabugun o, yinuk, Aliku ALA nen aret yegerak me, yagi o.

⁹Wone yi, yi aakumi ndi aakumi yoranet noorak nogo yi aret. Wim eeriyak nduk, li'luk eeppunuk wonogwe, It aap wim wakaa'ngget abok aret mi'nogwe, Eeko logonip o. It aap wim eeka abok aret panggo yi wa'nuk, wim eeri unggwogwe,

¹⁰ Yabu tege wooluwak ngget kenenggwi, Kinowaruk nogo wooluwak paga kunggwi, It aap ineebe ndeyak mendek nen, Nit wim wakaa'ngget aret aruwi o, yinuk, yogwe,

¹¹Yi aakumi ndi aakumi o ilin-ilin wonogwe abok aret mbet-mbet wogo logomenggaarik, o kobappaga time kuwak eeri wogwe, Eeko logowak nduk, Yoranet nogo logonip o. Kaliku ALA wae. Kawuri wim eeka wogoren mbet wura mok o.

¹²O Yotabat Kobappaga time an kwi'na'nuk, Aakumi inanebunu lombok o ilin-ilin nen kuwak ari woramenggaarak nogo inawone mbanogo inowak loonigin me, Aakumi inanebunu lombok mi'nogwe, Mi'na'nuk o Yotabat Kobappaga time ari wogwe, Eeruwak o.

¹³ Anggur anggen aambiranggo menggam abu yagabit age, Amburu tooko menggam eno korok yinuk, kilu-kilu wangge, Eeke ti kwak, It aakumi maluk mondok iya lombok eerit nogwe me, Anggen abu kole agaarak nogo mbaniyak nduk paloowi yomonogo nappugwi, Anggur anggen aambirani wogwe, Eeruwak nduk, yoret, yegerak o.

¹⁴Aliku ALA nen aakumi inowak looniyak ne abu aret koorok panggoni wagaarak me, Inowak loonggo logowam kobappaga nogome aakumi ambik, ineebe apit aago kuwak eeri woraagun o.

¹⁵Oonegen inom, tut inom, abinak lek age, Laaluguragan abok aret inabi'nak nogo lek age, Eerigin o.

¹⁶ Aliku ALA abuut Tiyon paga nen singa oone nggwok ari menggi kwak oone nggwok ari, O ngguurubu eeke menggi kwak o Yerutalem nen oone ari, Eeke kenok, Mbogut-nggween na'ndo-wa'ndo eerigin kwe, At Aliku ALA perak, apuri nobarogo piinok wonage, It Iterali mendek yugum pak negen wurogo piinok wonage, Eerigin o.

¹⁷Aliku ALA nen ari logonet, Togop eeke neenok, it nen Naliku inogoba Ala an nogo, nabuut alik leenak Tiyon paga minggirak ineenu arugun o. Ndi, Yerutalem ti, o abu alik leenak lombok arigin me, It aakumi inambik nen o time ambinom tebenggola wogo logogun mondok lek aret o.

¹⁸Ne ti eyom paga puut-puut yabume eyo anggur amburu nggi-nggi wambit nage, Ndi, puut-puut teberogon inaanggumi inagari'ngga abe mban mbanogo nenet nugwi paga inelak amburu tene-tene wambit nage, O Yekura nggelok-nggobok me abok aret niyo nage nogo porok yaga'lek nage mban wonage, An nawi wurik me nen niyo eneeri kila-kila wungge logonet, o Titim Kobappaga time miin eerogo pit nage, Eeke logogin o.

¹⁹Togop eerigin kwe, it Metit mendek inom, Erom mendek inom, nen inogogumbuk logonet, It Yekura mendek maluk eeppiinet nogwe, It Yekura mendek maluk eeka'lek iigak, inanggween paga inamiya kilirogo piinet nogwe, Eeko nogogwaarak paga O Metit time yi oone ndi oone lek age, Ndi, o Erom time eerilek karume aret age, Eerigin o.

²⁰It Yekura mendek nen inanggween Yekura paga mondok-mondok wonogwe, Inagota Yerutalem wonogwe iigak, nda'narit wundi wogwe, Eeko logogun o,

²¹Ndi, it nen maluk eeppiigo nogogwaarak an onggo eeppiiga'lek nogo, ti eyom paga eeppiige logogin o, yinuk, yegerak me, yokkiragi o. Aliku ALA ti, o Tiyon mondok-mondok logogin o, yinuk, wone yoragagerak ti aret.