Read Western Dani Amot 1 Bible Online

Amot 1 - Western Dani bible

Amot 1

¹AMOT WONE O mi awo waga'lek kagak tahun mbere eeppunuk, ambi awo eeke paga at aap Utiya aakumi Yekura mendek inowe endagembogut a'nuk wone lengganogo yorage, ndi, at aap Yowat aput Yerobeyam nogo, aakumi Iterali mendek inowe endagembogut a'nuk wone lengganogo yorage, eekwi iigak, aap ndomba ndegeninaka o Tekowa mendek ambi endage Amot nogo nen it Iterali mendek eeppiyoorak abi paga kage nagagerik, yoragagerak nogo yi aret o.

² At Amot nen ari logonet, “Singa oone nggwok ari menggi kwak Aliku ALA o Tiyon paga nen oone nggwok ari, O ngguurubu eeke menggi kwak, Yerutalem nen oone ari, Eeke logonet, It aap ndomba ndegeninaka nen inandomba inagari'ngga nenet nugu logowak nduk piigo menggam nogome mbuk age, Iri'ngga o puut Karemen paga wonage nogo teebat neyo-neyo nage, Eeke agaarik o,” yinuk, yereegerak o.

³ Aliku ALA nen ari logonet, “It aakumi o Ndamitik menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. Eyo mbanak paga paku kumbunuk, woromo anggen yigiko mengga kwak, it aakumi Ndamitik mendek nen togop aret inogogumbuk lombok logonet, It Nggileyat mendek inoorit nogogwaarak paga

⁴Aap Katayen wonage menggim kani nen lek eerogo nengge, Yugum pak wurik me aap endagembogut Mben-Karat awi wurik nogo kani nen lek eerogo nengge, eeruwak nduk, Kani kunik nappi woraagin o.

⁵O kota Ndamitik pak ambe mbanak tu omaawi narak nogo yigirogo pege, It aakumi o Awen Kobappaga wonogwe nogo lek eerogo piige, At aap aakumi Mbet-Eren mendek abu'me piinok ambim mbanak eenggime porogo menggerak nogo lek eerogo pege, Eeke neenok, It aakumi o Aram menggaarak nogo kugun wogoren o Kit mbo piya nagun o,” yinuk, Aliku ALA nen aret yegerak o.

⁶ Aliku ALA nen ari logonet, “It aakumi o Nggata menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It aakumi Nggata mendek nen aakumi ambi mendek abok aret wogoren aap Erom mendek inayeloman mini logowak nduk ineenggime piya nogogwaarak me,

⁷An nen o Nggata kani nappi woraminggirak paga yugum pak wurik me inarum logorak inawi wurik nogo kani nen lek eerogo nagin o.

⁸Aakumi o Atorot wonogwe nogo lek eerogo piige, At aap it Atekelon mendek abu'me piinok, ambim mbanak eenggime porogo menggerak nogo lek eerogo pege, Aakumi o Ekeron menggaarak nogo, an neenggi omaawi paga yigirogo piige, Eerit nage logonet, It aakumi Pilitin mendek eegu yumbunogo piyaminggirak nogo ambit iluk ambi teppigin lek abok aret inenggaawak lek eerogo piyaagin o,” yinuk, Aliku Itok Menggerak ALA nen aret yegerak o.

⁹ At Aliku ALA nen ari logonet, “It aakumi o Tirut menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. Ninom kunik logorak wone yugu nogo kobak eerogo punuk, It aakumi ambi mendek abok aret wogoren aap Erom mendek inayeloman mini logowak nduk ineenggime piya nogogwaarak me,

¹⁰An nen o kota Tirut yugum pak wurik paga kani nappi woraminggirak me, Yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.

¹¹ Aliku ALA nen ari logonet, “It aakumi o Erom menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It Erom mendek ti nen inawuri inabuwa mbaka'lek wooluwak nutik muguren nogwe, Inanini mi'nagak mban eekwi, Kani kunik wunuk mban ari menggi kwak inawuri inanini mban eeppiinet nogwe, Eeko nogogwaarak me,

¹²An nen o Teman kani nappi woraminggirak paga o Mbotera yugum pak wurik me inarum logorak inawi wurik nogo kani nen lek eerogo nagin o,” yinuk, yegerak o.

¹³ Aliku ALA nen ari logonet, “It aakumi o Amon menggaarak ti, ne kenagan mban maluk eerulik, ne ambi inom eekak mban eeko nogogwaarak me, An nanini eeppiyoorak koonak wonage nogo teppiyaagin lek eeppiyaagin aret o. It Amon mendek nen inanggween nggwok aruwak nduk, kuli pugu kagak ya langgok eerogo pogo logonet, Kumi o Nggileyat mendek inabila wonogwe nogo, inaagalogwe kilirik-ndowanak eerogo wumbiinet nogo nogogwaarak me,

¹⁴An nen o Araba yugum pak wurik paga kani nappi woraminggirak me, Yugum pak wurik me inarum logorak inawi wurik nogo kani nen lek eerogo nagin o. Wim inoba kwi'nari unggwogwe eyom paga kumi-wa'le inoone ya-kwa agan nogwe, O wiya oone pu warit wage menggi kwak, wim eeko logonet, keekok piyanggogwe, Eekwi iigak,

¹⁵It inowe endagembogut inom, at awuri inom eeko menggaarak inom, ambugwi aret wogoren mbo piya nagun o, yinuk, Aliku ALA nen wone yi abok aret yegerak me, yagi o,” yinuk, yoragagirak.