Read Western Dani Amot 6 Bible Online

Amot 6 - Western Dani bible

Amot 6

¹It aakumi Iterali mendek nen, “Yeenggwa niraawak o,” yinuk, Aakumi ando tebenak iigak, it ambi abu tiyanak menggaarak inenggela'me nen kit kinengga warak kiya wogo menggaarak abok aret O Tiyon paga, “Niniki ugun obeelom wonogwe,” mbakwi inom, Puut Tamariya paga, “Niniki ugun tayenak nu'lek aret wonogwe,” mbakwi inom, kinabuwa o!

²Kit nen o Kalene nogo logomonggotik, kinigen yambonit nugwi, Time nen o kota nggwok lombok Kamat nogo pekka nogwe, Ti'nuk, it aap Pilitin wonogo menggam o Nggat pekka nogwe, Eeko logonip o. Eeko logomonggotik, it inabu'me piinok menggam ti abe, ndi, kit kinabu'me piinok monggo'nom ti meek, It inanggween ti nggwok, ndi, kit kinanggween ti mbuuluk, kaamunggup mbakop?

³“Aaninggin ninoba kwippinani woroorak ti, abu nda lombok wonage,” mba'nuk, eerit nugwi kwe, Kinogogumbuk logonet eerit nugwi paga aaninggin kinoba pinagarak nogo, koorok panggonogo pati wogo ogotik o.

⁴Kit nogo yogo monggo'nom abu abe wanggalep meeli nabenak paga windak wonogwe, Kwi'nagak abe ndoonak paga kwi'ndak wonogwe, Tapi-ndomba inaagalogwe inamok tigiluk inoorogo larogo nunggwi,

⁵Nggitat eeko logonet, we lek ndawi wakwi, Ndawut ndawi tiyangge logonet, nggitat eeke nagagi kwak, “Nit togop aret eeruwi,” mba'nuk, eerit nugwi,

⁶Anggur amburu niyoowak eno korok togon toologo nenggak mban eekwi, Kinagabolo anen pera yuwak nduk, amburu abu abe kinagabolo paga mbenanggologwe, Eekwi kwe, It Yutup paga wiganak nogo inenggaawak lek ogogwaarak paga, “Yi ee'ninakerak, ao,” mbaka'lek aret wonogwe kiigi o.

⁷Togop aret me, aa'nduk lombok wokkiren mbo pinagi noorak nogo kit aret me, Kinale'nggen nen laago lakwi inom, we ugun tayenak-mbayenak nugwi inom, ti lek aret arigin o.

⁸At Aliku Itok Menggerak ALA owak mbanggolage logonet, Omaawi Lombok Menggerak Aliku Ala nen yegerak nogo yi aret. “It Yakup mendek iniki wogoppakwi nogo ogole mbake, Yugum pak wurik me, inarum logorak inawi wurik nogo neebi lombok mbake, Eeke me, O kota yi inom, yi mendek ndi mendek o kota wonage inom, abok aret inawim ineenggime piyaagin o,” yinuk, yegerak o.

⁹Aap ineebe 10 o ambime kiraarak wonogwe iigak kwe, it kunduk kambugun o.

¹⁰Kanggwi iinok, inowe-inawot nen wogo logomenggaarik, ineebe kambemenggaarak nogo, oome time nen wogoren wundi nogo logonet, aap kangga'lek awo kiraarak wonage kero yogwi, “It aap eegu ineenik o yime ambi wonogwe ilik?” Yogo mbaremengga, at nen, “Lek o,” ari kenok, it nen at yogwi, “Koone yugun o. At Aliku ALA endage kunduk ari mage o,” yinuk, yorugun o.

¹¹At Aliku ALA nen wone lengganogo wumbegerak me, o nggwok abe wurik nogo yigirik-noonom eerogo pit nugwi, O mbuulogwe wurik nogo yinik-minik eerogo pit nugwi, Eerugun o.

¹²Kuda puut-puut yugum paga mbe agan nogwe, Lembu nen yugum anggen nggininik paga nggween amok mbanogo pugwi, Eeriyak op mbakop? Lek kwe, kit nen eekaatak a'me nggelok eeppiinet nugwi nogo mbo punuk, obaane'me kanggo menggaarak mendek eeppiinet nugwi, Ndi, obeelom eeppiinet nugu logorak anggen yuurak nogo obaane'me ale-pale eerogo piinet nugwi, Eekotak o.

¹³Kit nen o Lorabat tebenggologo nogotik, ale'nggen mbakwi, Ndi, o Karanayim kunduk tebenogo punuk, yogo logonet, “O ti, nit ninomaawi lombok paga tebenggologoorak nogo lek a?” yinuk, wogoppakwi, eekwi kiigi o.

¹⁴Kit togop aret eekwi me, at Omaawi Lombok Menggerak Aliku Ala nen ari logonet, “It Iterali ti, tebenogo piyaawak nduk, aakumi alik mendek ambi inikime mambiyaminggirak wogo logonet, Ineebe ya yigirogo piigak nda yigirogo piigak eerit o Kamat tu unggwogo menggam nen nok, niyo Araba aa'nggi paga kuli piya nagun o,” yinuk, yegerak me, yokkiragi o.