Read Western Dani Amot 7 Bible Online

Amot 7 - Western Dani bible

Amot 7

¹Aliku Itok Menggerak ALA nen nabinggaanggo paga yo'nereegerak nogo yi aret. Aap endagembogut ake iri'ngga mbanogo wogogo mbareegwa, obaane'me yarak nogo agarit lagangge kagak, nabinggaanggo paga Aliku Itok Menggerak ALA nen wurin ambik lombok kuwak eerogo piinet nage kagagirak.

²Kuwak eerogo piyareegerak nogo, “Nenet nanip o,” yorage mbareegi, wurin ti nen iri'ngga o time wonage abok aret pup eerogo nenet nugwi iige nagagirik, “Kaliku Kitok Menggendak ALA wae. Kapuri inomaluk kami eerogo piyet o. It Yakup mendek ineebe mbuuluk me, inenggaawak lek arukwak nonggop togon eeko logogun o?”

³Yoge mbareegi, Aliku ALA nen eeppiyoorak mbareegerak nogo tayoppunuk, “Eeke kagandak ti, an nen eeppiyaagin lek o,” yinuk, Aliku ALA nen aret an yo'nege kagagirak.

⁴Aliku Itok Menggerak ALA nen nabinggaanggo paga yo'nereegerak nogo yi aret. Aliku Itok Menggerak ALA nen aaninggin inoba piyoorak nduk, kani kunik wiireegerak nogo wage logonet, niyo kole yenggenak laut nggween abu'na wonage nogo, porok togon nenet wambi nage, nggween inom nenet nage, eeke kagagirak.

⁵Ti eeke kage nagagirik, an nen, “Kaliku Kitok Menggendak ALA wae. Kat togop eeke mage ubi! Puk aru o. It Yakup mendek ineebe mbuuluk me, inenggaawak lek arukwak nonggop togon eeko logogun o?”

⁶Yoge mbareegi, at Aliku ALA nen inoba piyoorak mbareegerak nogo tayoppunuk, “Eeke kagandak ti kunduk, an nen eeppiyaagin lek o,” yinuk, Aliku Itok Menggerak ALA nen aret an yo'nege kagagirak.

⁷Nabinggaanggo paga ambi yo'nereegerak nogo yi aret. At Aliku ALA keele paga yugum pugunik wakkagak nogo eenggime keele wakkagak paga yugum pak wurik me, koorok taati mi'ndak wonage kagagirak.

⁸Kage mbareegi, at Aliku ALA nen an yo'nege logonet, “Amot wae. Kat nano mendek kenegen kagan o?” Yo'nege mbareegi, an nen, “Keele wakkagak paga yugum pugunik keenggime wonage kagi o.” Yoge mbareegi, at nogoba nen an yo'nege logonet, “An napuri Iterali ti, keele wakkagak paga yugum pugunik nogo inenggela'me wuppiminggirak ndak-ndak lek kenok, an nen it teppiyaagin lek, aaninggin inoba kwippiyaagin o.

⁹Aaninggin inoba kwippiige logonet, it Itak paga wiganak nen puut-puut paga warogo wogorogo menggam nogome abok aret yigirik-noonom eerogo pege, It Iterali inagugi ayuk wurit nogo menggam alik leenak wonage nogo minogo pit nage, Eeke logonet, At aap endagembogut Yerobeyam paga wiganak kunduk, nawooluwak paga nggaluk nawak nduk, mi'narigin o,” yinuk, an yo'nege kagagirak.

¹⁰Kage mbareegi, o Mbeten ogut ogobakkigirik inaluut eeko menggam unde Amatiya nogo nen Iterali inowe endagembogut Yerobeyam nogo, wone wonok yori woraawak nduk, nappiya wagagerak wogo nogogwaarik, at yogo logonet, “At Amot nogo, kat kimbirak ogookkoloorak nduk, aakumi Iterali inom wone koonogo pege me, at nen ari nogo paga aakumi pilak yogo logonet, ineebi nen kat koone mbo puurak nduk eeko agaarik o.

¹¹At Amot nen ari logonet, Aap Yerobeyam nogo wooluwak paga warak kangge, Ndi, it Iterali nogo inanggween paga nen kugun wogoren mbo piya nogwe, Eerugun abet mbako logonip o, yinuk, ari wonage agaarik o.”

¹²Yogo mbareegwa, wiireegerak nage mbareegi, at Amatiya nen Amot nogo yoge logonet, “Abinggaanggo kaga yi, nak a! O Yekura paga time nak. Kambi noorak time kwaakkolage, time nen kogoba Ala nen yokkege kagak, yoranet nege, eeke a nak o.

¹³O yime ti, aap endagembogut nen ayuk wuke, aakumi at abu'me piinok menggim nen ayuk wukwi, eeko menggam alik leenak o Mbeten yime aret me, o Mbeten yime kogoba Ala nen yokkege kagak, yoragak eeriyak ti mondok mage o!”

¹⁴Yoge mbareegi, at Amot nen aap Amatiya nogo yoge, “An yi, aap Ala nen yorage kagak yoraga nogo mendek wonageelik o. Ndi, it aap ti mendek inaput kunduk wonageelik mban. An ti, ndomba ndegeninake, eyo wuli yarak unde wake, eeka an aret wonagagirak o.

¹⁵Togop aret wonagagirak kwe, at Aliku ALA nen an ndomba ndegeninabit nege me, wo'nake nagagerik, yo'nege logonet, An nen yokkege neegak napuri Iterali yorage logonok nduk, nak o.

¹⁶Yo'nereegerak me, yogondak Aliku ALA nen wone yokkege yi, karuk konengge logot o. Kat nen ari logonet, Kit Iterali eeppinagarak, Ala nen yo'nege kenok yokkiragi o, yinuk, yorage, At Itak ombowologwe wiganak paga, Yogop eeppinagagin o, yinuk, yorage, Eeriyak ti mage o, Yinuk, yo'negendak me,

¹⁷At Aliku ALA nen ari logonet, At aap Amatiya akwe nogo, o kota time terak wuka aret age, Apuri wologwe-komologwe wooluwak paga inoorak kanggwi, At anggween nogo keele wakkagak paga wakkaanuk, tumbukkologwe, At eebe lombok kambuwak nduk, aakumi Ala abu ineenggo'lek wonogo menggam paga pi nogwe, Eerugun o. Ndi, it Iterali ti, inanggween lombok paga nen abet aret kugun wogoren mbo piya nagun, yegerak me, yokkigi o,” yinuk, yoreegirak.