Read Western Dani Yunut 3 Bible Online

Yunut 3 - Western Dani bible

Yunut 3

¹Ti'nuk, Aliku ALA nen ne ambinom Yunut yoreegerak.

²Yoge logonet, “Kat o kota nggwok Niniwe time nage logomenggendik, It ndogop yoret o, yokkege nogo, koone nggwok paga yoraamunggun o.”

³Yoge mbareegi, at Yunut nogo, “Aliku ALA nen yo'negerak ti, eerikit aret o,” yinuk, o Niniwe nagagerak. O kota Niniwe nogo ti, o nggwok aret nenaarak me, irip me nen irip me noorak kenok, nogo kenagan yegak nogo menggaarak me,

⁴ Yunut nogo, o kota time unggwi nage nagagerik, nage kagak nogo ambit yegak nage nagagerik, wone yorage logonet, “Nogo 40 yinuk, o kota Niniwe yi, mondok lek eerogo pigin o,” yinuk, yoragagerak.

⁵Yorage mbareegi, it aakumi o Niniwe mendek nogo, “Ala nen yegerak ti, abet aret o,” yinuk, inendage warak inom, inendage lek inom, abok aret inayum maluk nibinik mendek yikkologo nogogwaarik, “Ninambe mage negen eeppunuk logowok o,” yinuk, yereegwaarak.

⁶At Yunut wone yoragagerak nogo, aap endagembogut o kota Niniwe mendek aruk konengge nagagerik, kwi'ndak logonet wone lengganogo yorage menggim nen wambi wa'nuk, aap inendagembogut inayum yiko menggaarak yirik nogo, nggoorogo punuk, yum maluk nibinik mendek yikkolage nagagerik, liirubu paga kwi'nagagerak.

⁷Kwi'ndak logonet, it o kota Niniwe eeko logorak wone lengganogo wumbereegerak nogo yi aret. “Aap inowe endagembogut inom, awuri nagawan-nagawan inom, wone lengganogo wumbogo logonet, Kit aakumi inom, wam inom, lembu-tapi inom, kambin-ndomba inom, abok aret nen yi mendek ndi mendek nunggwi, niyo nunggwi, eeriyak mage o. Ambit iluk ambi ombat wakkoorak mondok mage o.

⁸At Ala anini nen lek eerogo pinaniyak mbakerak nogo, iniki yanggo yinuk, ninabuwa nen teppinanege kagak eerukwak, kit aakumi yum maluk nibinik mendek yikkologwe, kinaanggumi purok yikut eerogo piigwi, eeko logomonggotik, kinalitak lombok maluk eerit nugwi, kinanini paga eerit nugwi, eeko monggotak nogo, abok aret nggonenogo mbo punuk, yungguninuk, Ala owagam wogo logomonggotik, kinoone nggwok paga Ala yogo logonip o,” yinuk, wone lengganogo wumbereegwaarak ti aret.

¹⁰Eerogo wumbogo mbareegwa, Ala nen it maluk eekwi nogo mbo punuk, yungguninuk, at owagam wogwe maloppiige nagagerik, aaninggin inoba piyaakit mbareegerak nogo, “Eeppiyaagin lek o,” yinuk, inabuwa nen teppiyareegerak.