Read Western Dani Yunut 4 Bible Online

Yunut 4 - Western Dani bible

Yunut 4

¹Teppiige mbareegi, at Yunut nen, “Abu neebi a!” yinuk, anini mbareegerak.

² Anini mbake nagagerik, Aliku ALA yoge logonet, “Kaliku ALA wae. Kat koone yanggorogon yo'nirage, nit aakumi ninabuwa mbake, kiniki aanaganggenggwi lek liippunuk eeppinanege, kiniki kunik lombok ee'ninabit unggwage, eekwi onggo aaninggin ninoba pinanege logonet, Yi eeppigi ao, yinuk, mbake, eeke menggendak an neenu me, an yime waga'lek name awo logonet, Time yora naminggirak kwe, Ala nen maluk eeppiyaagin lek teppiyaagin mbaki o, yinuk, yagarak nogo lek a? Alom ti paga an mbet-mbet aret kole mbaganit o Taritit nagagerak nogo o.

³ Togop aret me, Kaliku nogoba Ala o. An neenik logorak neebi o. Ndi, kambuurak ti op aret, mbake me, nggaruk togon kambikit nduk, eeppanu o.”

⁴Yoreegerak kwe, Aliku ALA nen at yoge logonet, “Kat kanini mbake ti, op aret mbake agandik ya?” yoreegerak.

⁵Yoge mbareegi, Yunut nogo o kota nogome mbo punuk, wundi nage nagagerik, o kota oonegen lagi wage menggim pa'nggwe time kwi'nagagerak. Time ooliya ambi wuppake nagagerik, ngguna'me time kwi'na'nuk logonet, “O kota time nano age kaamun?” yinuk, enegen wagangge puk wonagagerak.

⁶Ooliyana nogome wonage kagak, Aliku Ala nen nggiyo ambi wunduwak nduk kooneegerak me, at Yunut mo andi anobak tele-tele eeke kenok, ngguna'me logowak nduk, anggup-engga paga nobarogo pege mbareegi, Yunut nogo nggiyo wundeegerak paga ale'nggen ambik mbareegerak.

⁷Ale'nggen mbareegerak kwe, nogo yinuk, ko'lu o wigangge kagak, Ala nen nggoon ambi nappi wagagerak nggiyo ero nogo mbanogo pege mbareegi, mbuk agagerak.

⁸Mbuk age kagak, oonegen lagi wage mbareegi, Ala nen kooneegerak paga o wiya oonegen lagi wage menggim pa'nggwe nen aganggen ambik lombok warit wage logonet, mo andiigwi lombok tele agan Yunut anobak paga kere-kere eeke logonet, eebe ndeyak a'nuk, “Kambikit aret,” mbake logonet, “An neenik logorak neebi me, kambuurak op aret o,” yinuk, yereegerak.

⁹Yereegerak kwe, Ala nen Yunut yoge logonet, “Nggiyo mbuk agaarak ti paga kanini wungge logorak op mbaken?” Yoge mbareegi, at nen, “Nanini wundiyak op aret mbake agarik o. Nanini mbake logonet, aret kambi o.”

¹⁰Yoge mbareegi, Aliku ALA nen ari logonet, “Nggiyo nogo ti, kat nen awi yake, ligak wuundamo wola yege, eerulik ne ambit oonikiya paga alik en mbilambunuk, lagangge, ti'nuk, o liingge paga mbuk age, eekerak ti paga kanini wundiyak op aret mbake kwe,

¹¹o kota nggwok Niniwe time aakumi nen, Yi op kagi, yi maluk kagi, maloppega'lek ineebe ambik lombok seratus dua puluh ribu wonogwe inom, inaanggumi ambik inom, wonogwe me, an nen o kota nggwok Niniwe nogo, inabuwa mbaka'lek nonggoti mbo piyoobok kenok, liippunuk eeppiyoorak koongge ti, meek nombake agandik ya?” yinuk, yoreegerak o.