Read Western Dani Linggineegwaarak 10 Bible Online

Linggineegwaarak 10 - Western Dani bible

Linggineegwaarak 10

¹At Aliku ALA nen Muta yoge logonet,

²“It Iterali mendek wiirogwe, tu noorak nduk yorogwe, eerit nogo logowak nduk, mbuti perak aan libik-lebek eerogo punuk, oone nggwok eeka trompet mbere ogobakkigiru o.

³Ogobakkigirogo punuk, trompet mbere nogo paga oone pu eekwi iinok, it Iterali mendek abok aret ninom lambungge minggim nawooliya wurik tungga paga time kat kowagam kuwak ari wogwe,

⁴ndi, trompet ambit paga oone pu eeke kenok ti, it Iterali kuwak eerak inarum menggaarak inoweewi nogo kat wonage me keya wogwe,

⁵ndi, trompet oone ne ambit pu eeke kenok ti, it aakumi oonegen lagi wage menggim pa'nggwe inawooliya wuppunuk wonogwe nogo nogwe,

⁶ndi, trompet oone ne mbere pu eeke kenok ti, it aakumi o ame pa'nggwe inawooliya wuppunuk wonogwe nogo, oone ti eeke konembunuk nogwe,

⁷ndi, trompet oone pu kunik-kunik aret eeke kenok perak, it aakumi Iterali apit aret kuwak eerak nogo kuwak ari wogwe, eeko logowak o.

⁸Ndi, trompet oone pu eeko logorak ti, it an neebe unde Karun apuri nogo nen mban eeko logowak o. Wone yi ti, kit inom, kinapuri nda'narit nogo logogun inom, mondok-mondok eeko logobagip nduk, lengganogo yokkigi o.

⁹Kit kiname wonogwe me, it kinawim nen kinooriyak eekwi nogo muguret wundi nogo logonet, trompet oone pu eekwi kiinok, Naliku kinogoba Ala an nen kinoba abeppunuk kinagap ndarigin o.

¹⁰Ne yi eyom ndi eyom kiniki ale'nggen paga laago lakwi, tut ambi penengge kenok eekwi, ndomba warogo nake kani kunggwi, an Ala ninom lambunik logowak nduk, nake warogo wo'nugwi, eeko logonet, trompet oone pu eeppunuk mban eeko logonu o. Ti eeko logorak ti, an kinogoba Ala nen niniki abekkinake logokit nduk, eeko logorak wone nogo ti aret o, yinuk, Naliku kinogoba Ala an nen aret yokkigi o,” yinuk, yoreegerak.

¹¹Tahun ambi abu eeppunuk, ambi eerak tut ambi penembunuk, ambi penenak tanggal 20 ti paga, ndugwi nogo wone yugu aloobut mbanak me yonggolak Ala awooliya wurik paga lenggenak wonagagerak nogo wonok lagangge mbareegi,

¹²it aakumi Iterali mendek nogo, inawot lombok ndegen-ndegen aago woroorak yugu nogo ndak-ndak aret mugurok wogwe me, ndugwi nogo o karume Paran time puk age mbareegi, it nogo time aret puk ogogwaarak.

¹³At Aliku ALA nen Muta yoge kagak, Muta nen Iterali yorage mbareegi, aa'nduk lombok wogogwaarak nogo yi aret.

¹⁴It inanebunu Yekura mendek inawot lombok aago nogo, at Aminarap aput Nakaton nogo nen inowe a'nuk, ineenu agak eyo paga pugunik wonok inaa'nduk lombok ogwe,

¹⁵at Tuwat aput Netanen nogo nen inowe a'nuk inanebunu Itakat mendek inawot lombok aago nogo wogoren inambokan ogwe,

¹⁶at Kelon aput Eliyap nogo nen inowe a'nuk it inanebunu Tebulon mendek inawot lombok aago nogo wogoren inambokan ogwe,

¹⁷it inanebunu Nggeroton mendek inom, Merari mendek inom, Ala awooliya wurik nogo minogo inuum paga piyaninuk inambokan ogwe,

¹⁸Ti'nuk, at Tiyereyut aput Elitut nogo inowe a'nuk it inanebunu Uruben mendek inawot lombok aago nogo, ineenu agak eyo paga pugunik wonok inambokan ogwe,

¹⁹at Turitiyarayi aput Telumiyen nogo inowe a'nuk it inanebunu Timeyon mendek inawot lombok aago wogoren inambokan ogwe,

²⁰at Erekuwen aput Eliyatap nogo inowe a'nuk it inanebunu Nggat mendek inawot lombok aago wogoren inambokan ogwe,

²¹it ando awo ari waga'lek iigak, Ala awooliya wuko logowak nduk, it aap Kekat mendek inawot lombok aago nogo, yi mendek ndi mendek obeelom alik leenak mendek Ala awooliya wurik me wonage menggerak nogo, inuum paga piyaninuk, oolo time ogwe,

²²Ti'nuk, at aap Amikut aput Elitama nogo nen inowe a'nuk it inanebunu Eparayim mendek inawot lombok aago nogo, ineenu agak eyo paga pugunik wonok inambokan ogwe,

²³at Peratut aput Nggamaliyen nen inowe a'nuk it inanebunu Manate mendek inawot lombok aago nogo wogoren inambokan ogwe,

²⁴at Nggireyoni aput Abiran nen inowe a'nuk it inanebunu Mbeniyamin mendek inawot lombok aago nogo wogoren inambokan ogwe,

²⁵Ti'nuk, inaa'nduk ndegek lombok aago wogwe iigak inambo'me age yobok ineebe ambi aago wogogwaarak nogo ti, aap Amitiyarayi aput Akiyetet nogo nen inowe a'nuk it aap inanebunu Ndan mendek nogo, ineenu agak eyo paga pugunik wonok inambokan ogwe,

²⁶at Okaran aput Pagiyen nogo nen inowe a'nuk inanebunu Atet mendek inawot lombok aago nogo wogoren inambokan ogwe,

²⁷at Enan aput Akira nen inowe a'nuk inanebunu Natali mendek inawot lombok aago nogo wogoren inambokan ogwe, eeruwak nduk koonogo piyareegwaarak.

²⁸It Iterali mendek tu paga nogo logonet inawuri ndegek lombok aago nugu logowak nduk, koonogo piyareegerak nogo ti aret o.

²⁹Eeko mbareegwa, at Muta aru aap Miriyan mendek Erekuwen aput Kobap nogo Muta nen yoge, “At Aliku ALA nen, Nggween wokkiraagin o, yinuk, yereegim nogome nogwe me, nit ninom nawok nduk omok o. Ninom nogo logomonggoorik, Aliku ALA nen nit aakumi Iterali obeelom eeppinaniyak, yo'niragagerak nogo obeelom eeppinanege kenok, nit nen kat obeelom eerogo pagagun o.”

³⁰Yoge mbareegi, Kobap nogo nen onggo yoge, “Lek o, naru. Op aret yo'negendak kwe, an nawi alom paga niyokan nowe-nawot iniya nagi o.”

³¹Yoge mbareegi, at Muta nen aru nogo yoge, “Nit o karume yime ninawooliya wurit noorak nineenggo'lek me, kat keenu nen, yo'niranet ninom noorak me, mbo pinaniyak ti mage ubi!

³²Ninom nogwe kenok, at Aliku ALA nen nit obeelom eeppinanege nogo nit nen kat obeelom eerogo pagagun o,” yinuk, yoreegerak.

³³Yoge mbareegi, it aakumi Iterali nogo at Aliku ALA abuut nogo mbo pogo nogogwaarik, Aliku ALA wone yugu aloobut mbanak me yonggolak wonage nogo aa'nduk inengga loolo punuk, inawooliya wuppunuk logorak kwaarit nogo logonet, nogo kenagan yit wogogwaarak.

³⁴Ooliya wuppunuk wonagaatik, ti'nuk, woraawak nduk wogwe iigak, o liingge paga Aliku ALA andugwi nogo it inirimbaga wonage nagagerak.

³⁵ Ndi, Ala aloobut mbanak nogo piyaninuk woraawak nduk eekwi iigak, at Muta nen, “Kaliku nogoba ALA wae. It aap kinom wim mbanak menggendak nogo ma'nogwe, It ineebi kombako menggaarak nogo mbaganggwi, Eeruwak nduk, Kat komaawi tiyak yu o,” yinuk, yoge,

³⁶ndi, Ala aloobut mbanak nogo taati porogo puk ogwe iinok, at Muta nen, “Kaliku nogoba ALA wae. Yogondak kapuri Iterali mendek ineenggi lingginiyak meek yi, Inoba nabi mok o,” yinuk, yoge, eeke nagagerak.