Read Western Dani Linggineegwaarak 14 Bible Online

Linggineegwaarak 14 - Western Dani bible

Linggineegwaarak 14

¹Yorogo mbareegwa, ne oonikiya ti eyom paga it aakumi Iterali wonogwe nogo abok aret noone-koone yogo logonet, leenggu maako nogogwaarak.

²Togop yogo logonet, it aakumi Iterali wonogwe abok aret nogo nen Muta Karun imbirak ineebi-ineeba yorogo logonet, “Nit o Metit time aret kanggwi, o karume akuna taati kanggwi, eeriyak op aret kagak,

³nonggop nduk at Aliku ALA nen o yime wo'niren pinani wagaarak? Pinani wagaarak me, nit ninooko logonet, ninakuwi-ninapurilogwe ninawim nen kugun wogoren nookwak, nit o Metit niniyokan nawok o,” yinuk,

⁴at ambi nen at ambi yogak eeko logonet, “Nit ninowe ambi nen wo'niren o Metit pinani nawak nduk miirogo punuk, leenogo patuwok o,” yinuk, yereegwaarak.

⁵Yogo mbareegwa, at Muta Karun imbirak it aakumi Iterali wonogwe abok aret inenggaanom paga enete wanduk ngginnogogwaarak.

⁶Ngginnogo mbareegwa, it aap inom inigen yombooni nogogwaarak at Nun aput Yotuwa inom, Yepune aput Kalep inom, it imbirak inayum nibinogo pako nogogwaarik,

⁷aakumi Iterali wonogwe nogo abok aret yorogwe, “O nit ninigen yomboombunuk wogoorak nogome ti, nggween mondok amburu warak iya lombok kogoorak o.

⁸Ndi, at Aliku ALA nen inikilom ninombake kenok, time wo'niren pinani nanuk, nggween nggiin amburu inom, yilak amburu inom, niyo eneeri negen kila-kila wungge menggim time aret wo'niraagin o.

⁹ Togop aret me, kit nen at Aliku ALA kineebi-kineeba yogwi, it aakumi time wonogwe nogo paga kinagabiti mbakwi, eerugup o. It inagugi inomaawi wogorogo menggaarak nogo teppiinok mbaganggwi iigak, nit perak, Aliku ALA ninarum wonage kagak, aakumi ti, ninambeme yonggorinabugun me, it ineebe paga kinagabiti mbarugup o,” yinuk, yorogogwaarak.

¹⁰Yorogo mbareegwa, it aakumi Iterali mendek abok nen it aap ineebe mbere nogo yugum paga inooriyak nduk wone mbanggwi iigak, Aliku ALA inom lambungge menggim awooliya wurik nogo paga abinak pindanogo pege kogogwaarak.

¹¹Kogwe iigak, at Aliku ALA nen Muta yoge logonet, “It aakumi Iterali yi, inenggela'me eerubok mendek iya tit eerit wagagirak kwe, it iniki abet nombariyak, Nineebi o, yinuk, miyuk-kayuk eerogo panugwi iigak, ne mande logogun?

¹²Togop me, it aakumi yi, inomaawi nggwok ineebe ambik aret kwe, andi inoba piyaminggirak paga inenggaawak lek ogwe iigak, kat perak, komaawi nggwok lombok age, kanebunu ambik lombok wigak ari, eeruwak nduk, teppagagin o,” yinuk, yoreegerak.

¹³ Yoge mbareegi, at Muta nen Aliku ALA yoge, “Kat komaawi paga it aakumi Metit mendek inenggela'me nen wogoren wundi wagagindak kwe, kat ti eeke keenok, it aakumi Metit mendek nen konenggo logomenggaarik, it nen aakumi yime wonogwe nogo kat kabok mbininogo yorogo logogun o. Ndi, kat Kaliku ALA nen wo'niren wundi wage logonet, ninarum wonage, Kaliku ALA ninom ninengga kunna'nuk, wone mbanggwi, kandugwi ninirimbaga logonet, o liingge paga wo'niren nage, oonikiya kandugwi logonak abinak nirimbaga wonage nogo nage kenok, mugurok nogwe, eerit wogwe nogo it aakumi yime mendek muk keegaarak me,

¹⁴

¹⁵kat nen it aakumi Iterali mendek yi, abok aret ne ambit liingge lek eerogo inoorumunggun kenok, it aakumi yime nen inaruk konembunuk yogo logonet,

¹⁶At Aliku ALA nen, It Iterali yi, o Kanan wokkiraagin o, yinuk, kumbuk mbanogo yoragagim nogome piya naakit nduk wogoren wundi nage mbakoorak kwe, o karume yime aret inoorogo piigerak yi, Ala omaawi lek obambok aret kogo o, yinuk, yugun o.

¹⁷ Togop me, kat nen ari logonet, Naliku ALA niniki yanggo punuk wonage, aakumi inabuwa nggwok lombok mbake, it an noone taganggwi inom, maluk eekwi inom, inomaluk lek eerogo piige, eeke minggirak kwe, it maluk mban eekwi iinok perak, teppiigeelik, maluk eekwi onggo it inoba piige logonet, inapuri inom, inombowologwe inom, it paga peebi nda'nariyak nogo inom, abok aret aaninggin inoba piige minggirak o, yinuk, ari menggendak nogo ndak-ndak aret eeke keyaawi o, nogoba!

¹⁸

¹⁹Kat nen kapuri o Metit nen wogoren wundi wagagindak kuli nen yogondak yi kuli inabuwa nggwok lombok mbake logonet, inomaluk lek eerogo piigak mban eeke menggendak pogom yogondak aret inomaluk yi, lek eerogo piyet o, nogoba.”

²⁰Yoge mbareegi, at Aliku ALA nen ari logonet, “Kat nen nggino yo'negendak nogo ndak-ndak aret inomaluk lek eerogo pigi o.

²¹ Togop eekirak kwe, o Metit paga time inom, o karume yime inom, nomaawi paga eerubok mendek iya tit eeke neenok, Wi, yinuk, pi wa'nako logonet kwe, ne 10 kuli an nabut mbaniyak nduk eeko logonet, noone konengga'lek tagambunuk maluk mban eerit wundi wogwe me, it inombomini nggween wogoroorak noone abuk nggaruk togon kumbuk mbanogo yoragagim nogome piya naakit lak, it aakumi yi, an meek eerogo panugwi me, ambiriluk ambi o time inigen kaagun mondok lek o, yinuk, o nggween paga yime menggaarak abok nen Naliku an ALA eeke neenok, Wi! nugwi an mondok neenik minggirak nendage paga nowak mbanogo yokkigi o.

²²

²³

²⁴ Togop aret kwe, an nayeloman Kalep perak, alik mban iniki koonak logonet, noone konembunuk liirogon aret eeke menggerak me, o at enegen kenok wagam time an nen wonok pi nage, ndi, at apuri wigannarit nagun paga nen o time unde eeppiige, eerigin o.

²⁵It Amalek mendek inom, Kanan mendek inom, o kobappaga time wonogwe me, kit ko'lu kinena yungguninuk o karume niyo Laut Merah pa'nggwe time ari nanu o,” yinuk, yoreegerak.

²⁶At Aliku ALA nogo nen Muta Karun imbirak yorage logonet,

²⁷“It aakumi abu maluk mendek yi nen ineebi-ineeba yo'nugwi yi, ne mande paga yo'nogo logogun o. It ineebi-ineeba yo'nugwi an abu konenggirak me,

²⁸it Iterali wone yoroorak nogo yokkira o. It nen nenggaanom paga yogwe iigirak nogo an abu konenggirak me, Abet aret eeppinanigin, yegerak, kagi, mbaruwak nduk, an mondok neenik minggirak Naliku ALA nogo nen aret nendage kunogo yora o.

²⁹ It nen inoone wukot-laakot mban yo'nugwi me, ndarak iigak tahun 20 nen agi nggwe eerit nagaarak ineebe lingginogo punuk, inendage mbanggaarak nogo abok aret o karume yime kambit namenggaarak inowak nggininit nagin o.

³⁰Kit logowam o Kanan wokkiraagin o, yinuk, neenggi nippege logonet, kumbuk mbaneegim nogome inigen ka nagun mondok lek o. Ata, Yepune aput Kalep inom, Nun aput Yotuwa inom, it mban unde eekkolaagun o.

³¹It ando nogo nen yogo logonet, Nit ninapuri abok aret kugun wogoren nagun o, yagaarak nogo, O nit noorak nineebi o, yinuk, miyuk-meya eerogo pegam nogome it inapurilogwe mban wogoren piya nage neenok, iniki ale'nggen mbakak wonogo logogun o.

³²Ndi, it perak, o karume yime kambit namenggaarak inowak nggininit nagin o.

³³It an noone liirogon konembunuk, eerulik me, inomaluk onggo inapurilogwe inoba pege neegak, o karume yime aret ndomba ndegeninabit yagak-ndagak nugwi iigak, tahun 40 paga inogobamini kambit namengga-namengga irip paga it ambi kambuurak yugu nogo aret ari nagin o.

³⁴ O inigen yombooni nogwe iigak, nogo 40 aret yegaarak nogo ti, nogo ambit yegaarak ti, tahun ambit eeriyak kwak aret me, an nambot iige ineenu aruwak nduk, inomaluk onggo inoba piyaminggirak aaninggin piyaninuk nugwi iigak, tahun 40 aret eerigin o.

³⁵It aakumi maluk mendek yi, abok aret noone taganiyak iniki ambit a'nuk wone mbanggaarak me, wone yokkirage yi ndak-ndak o karume yime kambit nogo logonet, inenggaawak lek aret arugun o, yinuk, Naliku an ALA aret me, abet aret eerigin, yegerak, yoret o,” yinuk, yoragagerak.

³⁶Yorage mbareegi, it aap o inigen yombooni nawak nduk Muta nen nappiyareegerak iniyokan wogo nogogwaarik, wone maluk-maluk it Iterali mendek abok aret yora wogo mbareegwa, Muta ineebi-ineeba yogo nogogwaarak nogo,

³⁷kugi andi ogo nogogwaarik, at Aliku ALA enggaanom paga taati aret kambeegwaarak.

³⁸It aap inigen yombooni nogogwaarak nogo abok aret kambit nogwe iigak kwe, at Nun aput Yotuwa inom, Yepune aput Kalep inom, it imbirak mban inili eerogo ineenik teppiyareegerak.

³⁹At Ala nen Muta yoreegerak nogo at Muta nen it aakumi apit aret yorage mbareegi, iniki abu maluk a'nuk, leenggu maako nogogwaarak.

⁴⁰Ko'lu kuubondendok, puut nggelok-nggobok time lagi nawok nduk eeko logonet, “Nit maluk eekoorak aret kwe kagak, at Aliku ALA nen nggween wo'niroorak yo'niragagerak nogome nawok a!”

⁴¹Yogo mbareegwa, Muta nen, “Kit nonggop nduk Aliku ALA wone yugu taganiyak nduk, yogo ogotik? Unggwi noorak nduk, eerumonggotak kwe, meek aret kaamunggup o.

⁴²At Aliku ALA kinom namunggup lek mbo pinagagerak me, kit kinawim nen wundi wogo logonet, tebenogo pinagukwak, nagup o.

⁴³Kit nen at Aliku ALA mbo pogotak kagak namunggup kenok, it aakumi Amalek mendek inom, Kanan mendek inom, time nen wundi wogo logonet, wooluwak paga kit kineebe kinoorogo pit namenggaarak kambumunggup aret o.”

⁴⁴Wone togop yorage kagak, “A! We yikkolage me kagak nawok a!” yinuk, Aliku ALA wone yugu aloobut mbanak yonggolak nogo inom, Muta inom, aakumi inawooliya wurik me time teppiinok, iniki teeluk aret puut nggelok-nggobok time inalik mban aret nogwe me,

⁴⁵it aap Amalek mendek inom, Kanan mendek inom, puut nggelok-nggobok wonogwe nogo nen wundi wogo logonet, it nogogwaarak nogo muguren-magaren inoorit o Koroma kuli aret piya wogogwaarak.