Read Western Dani Linggineegwaarak 16 Bible Online

Linggineegwaarak 16 - Western Dani bible

Linggineegwaarak 16

¹ Anebunu Uruben mendek at Eliyap apuri Ndatan, Abiram, imbirak inom, Pelet aput On inom, it kenagan ti nen anebunu Lewi mendek wiganak Kekat aput Yitakat ombooluk Kora inom iniki mi'nogo nogogwaarik,

²“Muta tebembuwok,” mba'nuk, it Iterali mendek nen, “Ninawone koonggo logowak o,” yinuk, inoweewi mippiyareegwaarak abu ineenu wonogwe ineebe dua ratus lima puluh nogo inom a'nuk,

³Muta Karun imbirak wonogwe me, inowagam nogo nogogwaarik, mberirogo logonet, “At Aliku ALA nen it aakumi Iterali mendek inalitik-inalitak abok aret leenogo piinok, inenggela'me inom aret wonage menggerak me, kit nonggop nduk it Aliku ALA apuri kuwak aago nogo tebenogo piinok, Nit mban iya, mbako monggotak? Yogondak kinoone yuurak lek puk aret a'nip o.”

⁴Wone ti yogwe nogo Muta aruk konengge nagagerik, enete wanduk ngginnagagerak.

⁵Ngginna'nuk, aap Kora it aakumi inom kuwak eereegwaarak nogo yorage logonet, “Kit Lewi mendek yi, kinoone yaga'lek puk aret a'nip o. Aliku ALA nen at apuri ake leenogo piige nogo at owagam koorok ka noorak op aret me, Aliku ALA nen ta miirogo pegerak owagam ka noorak op aret kin age kaamun liippuwok nduk, o ko'lu kuubondendok Aliku ALA nen yo'niraagin me, kat Kora inom, it aap apit kinom wagandak yi inom, o ko'lu kuubondendok togolowak kaninggen ndoongga nogo waganogo kani kunik punuk, obari abe kaga nogo obaga pogo logomonggotik, Aliku ALA owagam nogwe kiinok, Aap yi aret leenogo pigi o, ari kenok, aap ti aret Aliku ALA nen leenogo pegerak, mbaruwok o.”

⁶

⁷

⁸Yorage nagagerik, Muta nen at Kora awuri inom wone ambinom yorage logonet, “Kit aap Lewi mendek yi, wone an yokkirage yi kinaruk liirogon konenggo logonip o!

⁹Aliku ALA awooliya wurik me yabu eekwi, it Iterali inake eeko logorak unde wonogwe, eeko logobagip nduk, it aakumi Iterali mendek abok aret wonogwe iigak kwe, Iterali inogoba Ala nen kit aret leenogo pinaganuk, at owagam logorak op mbake kagak ti we meek mba'nuk yogo ogotik ya?

¹⁰Kit Lewi mendek aret me, at Aliku ALA nen Lewi mendek kinom ndak-ndak aret at owagam pinagi wagaarak wonage kagak, meek mba'nuk, yogondak it aap Aliku ALA unde inamunggat inoba wonage nogo ndinogo koloorak nduk eeko ogotik?

¹¹Aap Karun ti, ta me nduk at eebe paga kineebi-kineeba ogo ogotik? At paga kineebi mbakwi lek o. Ata, kat Kora inom, it kinom wonogwe yi inom, kiniki ambit eeppunuk, at Aliku ALA kinom aret ogooriyak nduk, eekwi kiigi o.”

¹²Ti yorage nagagerik, aap Eliyap apuri Ndatan Abiram imbirak woraawak nduk, wiiragagerak kwe, “Nit noorak nineebi o,” yinuk, yogo logonet,

¹³“Nggiin amburu inom, yilak amburu inom, niyo eneeri negen kila-kila wungge menggim Metit nen wo'niren o karume yime aret kambuwak nduk eraanggi aret pinani wagaarak ti, meek mba'nuk, yogondak ninowe ariyak nduk ari agaarik a?

¹⁴Nggiin amburu inom, yilak amburu inom, niyo eneeri negen kila-kila wungge menggim time pinani nanuk, nineyabume anggur yariyak inom, ninanggween inom, nit unde ariyak nduk wo'niren pinani naga'lek logonet, it aakumi ti, inigen mbuk negen eerogo piyoorak nduk, eeke me, nit ka noorak lek o,” yereegwaarak.

¹⁵Yogo mbareegwa, at Muta nogo anini ambik age nagagerik, Aliku ALA yoge logonet, “An nen it inaanggo keledai ambit-ambi wagangge, it mendek ambi maluk eeppiige, eeka'lek neegak yogwe me, it nen kat kake warogo wokkugwi iinok, woorak lek o, nogoba.”

¹⁶Yoge nagagerik, at Muta nen Kora nogo yoge logonet, “Kat inom, Karun inom, it aakumi kinom wonogwe inom, abok aret ko'lu kuuben at Aliku ALA enggaanom paga ake puurak nduk,

¹⁷it kinom wagandak inalitak lombok togolowak kaninggen ndoongga ineengge ndak-ndak dua ratus lima puluh waganggwi, ndi, kat Karun kimbirak togop mban kineengge ndak-ndak waganggwi, eeppunuk, nogo paga kani kunik ndoombunuk, obari abe kaga obaga pogo logomonggotik, wonok ko'lu kuubondendok Aliku ALA enggaanom paga ooliya wurik me nogome pi woraamunggup o.”

¹⁸Yorage mbareegi, ko'lu kuuben it aakumi nogo inalitik-inalitak inaganinggen ndoongga nogo waganggo nogogwaarik, kani kunik inom, obari abe kaga inom, time pogo nogogwaarik, Aliku ALA awooliya wurik tungga paga taati, it Muta Karun inom mi'nari nogogwaarak.

¹⁹At Kora nen it aakumi at inom Muta Karun imbirak ineebi mbareegwaarak nogo abok aret kuwak eeppiinok, Aliku ALA inom lambungge menggim ooliya wurik tungga paga mi'nari nogogwaarak nogo taati wonogwe iigak, Aliku ALA eya abinak lombok kwindagala eeke it aakumi Iterali kuwak aago abok aret inigen kogogwaarak.

²⁰Kogwe iigak, at Aliku ALA nen Muta Karun imbirak yorage logonet,

²¹“It aakumi kuwak aago kinom wonogwe ti, ne yogondak yi paga aret lek eerogo piyaagin me, kinom logorak lek tayorak logonip o.”

²²Yoragagerak kwe, at Muta Karun imbirak nen inete wanduk ngginna'nuk, Ala yogo logonet, “Ninogoba Ala wae. Aakumi ineenik unde menggendak kat Ala aret me, aap ambit maluk eekerak paga aakumi kuwak aago yi abok aret nonggop togon lek eerogo piyaamunggun o?”

²³Yogo mbareegwa, at Aliku ALA nen Muta yoge logonet,

²⁴“It aakumi kuwak aago abok aret ti, at Kora inom, Ndatan inom, Abiram inom, inawooliya wurik me time logorak lek ineebe tayorogon time arit nawak nduk yoret o.”

²⁵Yoge mbareegi, it aakumi Iterali inoweewi nogo Muta inom Ndatan Abiram imbirak wonogwe me, nogo nogogwaarik,

²⁶at Muta nen it aakumi apit aret kuwak aago nogo yorage, “It aakumi maluk eeko menggaarak yi, it inomaluk paga inooke logonet, kinom nggelengginabukwak, it inamendek ambi mbaangga'lek logonet, inawooliya wurik me mbo piinok, tayorogon time ari nanip o.”

²⁷Yorage mbareegi, it aakumi nogo at Kora inom, Ndatan inom, Abiram inom, inawooliya wurik me nogome nen mbo piinok, nogo mbareegwa, at Ndatan Abiram imbirak inakuwi inom, inapurilogwe inom, elege mbuulogwe inom, inawooliyana nen wundi wa'nuk, tungga paga mi'ndak wonogwe iigak,

²⁸at Muta nen ari logonet, “An eeke minggirak nogo ti, nalik niniki koombunuk nen eekeelik, Aliku ALA nen aret, Eeru o, ari kenok eeke minggirak nogo kineenu arumunggup nduk, yogondak yi eeriyak nogo yokkira o.

²⁹It aakumi yi, we aakumi kanggo mengga kwak aret kanggwi iinok perak, At yi, Aliku ALA nen nappi woroolik, alik iniki mba'nuk, yo'nirage kogo o, yinuk, nombarumunggup o.

³⁰Ndi, ne yogondak yi paga Aliku ALA nen eeke ambi kogolik mendek eeke logonet, nggween yi, ambe nggagambege logomenggerik, it aakumi yi inom, inamindik-inamendek inom, abok inaani aret it aakumi kambeegwaarak wonogwe me, inom logowak nduk, ineenik ngge-ngge aret ambeme yonggorinake kenok perak, It aap yi, at Aliku ALA miyuk-meya eerogo pegaarak nogo paga eeginake kogo o, yinuk, kineenu arumunggup o.”

³¹Yinuk, wone awo yorage kagak, it aakumi wonogwe me taa'nogo aret nggween ambe nggagangge logonet,

³²it aakumi ti, inakuwi-inapuri inom, it aakumi Kora inom wonogwe inom, inamindik-inamendek inom, abok aret nggween nen ambeme yonggorinabeegerak.

³³Ti eereegerak nogo ti, aakumi ineebe inom, inamindik-inamendek inom, abok aret, it aakumi aa'nduk kambeegwaarak wonogwe me, inom logowak nduk, ineenik ngge-ngge nggween nen ambeme yonggorinake nagagerik, nggween ambe kagaarogo piyareegerak nogo ti aret. Ti eereegerak nogo it aakumi Iterali kuwak aago inenggela'me nen inenggaawak lek ogogwaarak.

³⁴Ndi, it aakumi Iterali mendek time inom wonogwe nogo nen it kwa yogwe inaruk konenggo nogogwaarik, “Nit ninom nggween nen ambeme yonggo'ninake kero,” yinuk, mbaganit nogogwaarak.

³⁵Mbaganit nogwe iigak, at Aliku ALA nen it aakumi ineebe dua ratus lima puluh obari abe kaga kani kunggwi nogo ne ambit ti eyom paga aret kani omoonuk paga lek eerogo piyareegerak.

³⁶Ti eeke nagagerik, at Aliku ALA nen Muta yoge logonet,

³⁷“Togolowak kaninggen ndoongga ogobakkigirik ti, abu leenak mage lombok me, it kani nenggaarak kaninggen wonage ti, aap an neebe unde Karun aput Eleyatat nen ndoongge logomenggerik, koorok time pukwak, nda mbo pi nawak o.

³⁸Mbo pi nage logomenggerik, an eeppiigirak it aakumi Iterali mendek ineenu ogo logowak nduk, it aap maluk eekaarak paga onggo ineebe lek eekkolagaarak togolowak kaninggen ndoongga pi wagaarak wonage ti, an nenggaanom paga obari abe kaga nake pi wogo mbaka, leenogo pigirak me, tabak-tabak eerogo punuk, nake pi wogo menggam nabenogo puwak nduk, yoru o.”

³⁹It aap Karun apuri-ombowologwe nda'narit nogo logogun nogo mendek lek we aakumi ugun mendek nen obari abe kaga Aliku ALA enggaanom paga kani kuni wogwe iinok, it aap Kora awuri inom inooreegerak pogom eeginabukwak, it Iterali mendek ineenu agak abeko logowak nduk, Aliku ALA nen Muta yoreegerak nogo ndak-ndak aap Ala unde Eleyatat nogo nen togolowak kaninggen ndoongga mbuti tembaga paga ogobakkigirik it kani nunggugwaarak wonok wogogwaarak nogo kuwak eeppunuk, tabak-tabak eerogo Ala ake pi wogo menggam nogo paga nabenogo pereegerak.

⁴⁰

⁴¹Ko'lu, it aakumi Iterali mendek abok aret, “Aap Muta Karun imbirak nen at Aliku ALA apuri aret kagak, inoorogo piigerak kiraap!” yinuk, ineebi-ineeba yogo nogogwaarik,

⁴²kuwak eeppunuk, Muta Karun imbirak mberirogo logonet, Ala inom lambungge menggim awooliya wurik me ina logurogon na'nogo mbareegwa, o ndugwi nogo ooliya wurik nogo paga nobari wambi wage logonet, Aliku ALA abinak pindanggage inigen kogogwaarak.

⁴³Kogo nogogwaarik, at Muta Karun imbirak nogo mbe agan Ala inom lambungge menggim awooliya wurik me enaame taati aret nogo mbareegwa,

⁴⁴at Aliku ALA nen Muta yoge logonet,

⁴⁵“An nen it aakumi kuwak aago ti, ne ambit liingge lek eerogo piige yi aret me, it wonogwe me time nen mbo piinok nanip o.” Yorage mbareegi, Muta Karun imbirak inete wanduk ngginnogogwaarak.

⁴⁶Ngginna'nuk, at Muta nen Karun yoge, “At Aliku ALA anini kani wunuk agan nage menggi kwak mi'nage nagaarik, aakumi Iterali mendek andi inoba piyoorak nduk eeke me, kaga'ninggen ndoongga nogo kat nen wagangge logomenggendik, kaninggen kani kunggo menggam nen ndoombunuk, obari abe kaga obaga punuk, it Ala inom lambunuwak nduk, nggami aanggo wakwi kwak mbet-mbet eeri nak o.”

⁴⁷Yoge mbareegi, at Karun nogo Muta yoreegerak nogo ndak-ndak aret wonok mbe agan it aakumi Iterali kuwak aago inenggela'me nage nagagerik, andi nogo muk inoba piige kagak, Ala inom lambunuwak nduk, nggami aanggo wakwi kwak, obari abe kaga nogo kani kuneegerak.

⁴⁸At Karun nogo aakumi kambeegwaarak inom, ineenik wonogwe inom, inenggela'me mi'ndak wonage logonet, kani kuneegerak ti paga andi nogo ti kuli aret pereegerak.

⁴⁹Ndi, at aap Kora inom kambeegwaarak nogo ti, ineenggi lingginulik o. It aakumi andi nen kambeegwaarak nogo mban ineebe lingginik ti, empat belas ribu tujuh ratus aret.

⁵⁰Ndi, andi nogo kuli aret pege mbareegi, at Muta nogo Aliku ALA inom lambungge menggim ooliya wurik me tungga paga wonage me Karun nogo ka nagagerak.