Read Western Dani Linggineegwaarak 18 Bible Online

Linggineegwaarak 18 - Western Dani bible

Linggineegwaarak 18

¹At Aliku ALA nen Karun yoge logonet, “O magame nogome maluk eerogo pugwi iinok, kat inom, kapurilogwe inom, kat kombomini ndarak logorogon inom, kit kinobaalombok kinoba aret logogin o. Ndi, an neebe unde logobagip nduk, kinamunggat kinoba wonage nogo, meek eerogo pugwi iinok perak, kat kapurilogwe kinom mban kinobaalombok kinoba aret logogin o.

²Togop me, kat inom, kapuri inom, an nawooliya wurik me noone yugu naloobut mbanak me yonggolak wonage enaame nogome yabu eeko logonet, yeenggwa kiruwak nduk, kogobamini inom ndarak kowe-kawot kanebunu Lewi mendek yorogo logonu o.

³It nogo ti, kit kinoone mban konenggwi, ndi, an nawooliya wurik me eeriyak nogo eekwi, eeko logowak o. Ndi, eeko logonet, kit inom, it inom, kineebe kambukwak, o magame yi mendek ndi mendek wonage me panggo yi wogwe, ndi, nake warogo kani kunggo menggam koorok panggo yi wogwe, eeriyak mage o.

⁴An ninom lambungge minggim nawooliya wurik me time ndegenggak yuurak unde it aret me, ambi eeriyak age kenok, kinom eekwi me, it aakumi we lek mendek panggorogon kiniya woroorak mage o.

⁵It aakumi Iterali mendek an nanini inoba piigirak kokwak ambinom inoba piyookwak, an nake warogo kani kunggo menggam inom, o magame inom, ndegenggak yuwak nduk, kalik mban unde eeppagagi o.

⁶Yeenggwa niriyak ambi wo'niriyak, mbaka'lek keegak, an ninom lambungge minggim nawooliya wurik me kinom nake eeko logobagip nduk, it kat koreewi inanebunu Lewi mendek yi, aakumi Iterali mendek inenggela'me nen leenogo wokkigi o.

⁷Ndi, kat kapuri kinom perak, Togop eeppinaniyak, mbaka'lek kiigak, an neebe unde logobagip nduk, namunggat kinoba pinagage nagarik, nake warogo kani kunggo menggam inom, yi mendek ndi mendek eeko menggaarak yum tugunik aken nggwe wonage nogo inom, kit mban neebe unde logonet eeko logobagip nduk, unde eeppinagagirak me, o magame nogome it aakumi ugun panggorogon wogwe iinok, kambuwak nduk, inoorogo piigo logomunggup o,” yinuk, yoreegerak.

⁸Ti'nuk, at Aliku ALA nen Karun yoge logonet, “It Iterali nen yi mendek ndi mendek alik leenak nake pi wogwe nogo ti, kat inom, kapuri inom, kinamendek aret me, kat Karun unde logonok nduk, an nen aret mippagagi o. Mippagagirak me, Eeriyak, wone yokkege yi, mondok-mondok aret eeko logonu o.

⁹Gandum anggen yigirogo nake pi wogwe nogo inom, inomaluk lek eerogo pikit nduk, nake warogo pugwi nogo inom, noone taganemenggaarak aberak wonage nogo lek aruwak nduk, onggo pi wogwe nogo inom, yi mendek ndi mendek alik leenak mage lombok nake pi wogwe nogo abok aret kani kunggo menggam kunulik kenok ti, kat inom, kapuri inom, kinake aret me,

¹⁰kinapuri aap mban kinom nonggo logonet, Yi Ala ake alik leenak mage lombok kagi, mba'nuk, nonggo logomunggup o.

¹¹Ndi, ambi it aakumi Iterali mendek nen, Yi Ala ake o, yinuk, titik eerogo wo'nugwi ando nogo ti kunduk, kit kinamendek aret me, kat inom, kapuri wologwe inom, komologwe inom, mondok-mondok nonggo logobagip nduk, kinake leenogo pinagagi o. Ndi, nonggo logonet, kit kinom monggotak ambi oba maluk lenggenak lek obeelom wonage kenok, kinom nonggo logorak op aret o.

¹²Iyaalok mbanogo Naliku ALA nake leenogo pi wogo mengga kwak, anggen iyaalok aambiranak tayitun amburu inom, anggur amburu inom, ndi, gandum anggen inom, abu obeelom mendek kero, abok aret kit kinake leenogo pinagagi o.

¹³Inanggween paga yaremenggaarak anggen iyaalok yemenggerak Naliku ALA nake pi wogwe nogo ti, kit kinake aret me, it aap ambi kit kinom monggotak oba maluk lenggenak lek obeelom wonage kenok ti, kinom nonggo logorak op aret o.

¹⁴ O Iterali wonogo menggam yi mendek ndi mendek abok aret Naliku ALA nake leenogo pemenggaarak wonage kenok ti, kit kinake aret me, kologo logomunggup o.

¹⁵Aakumi a, kinaanggumi a, kinarowe-pagi a, agalo inikime nen aa'nduk nda'nage kenok, Naliku ALA nake leenogo pi wogwe nogo ti, abok kit kinake aret o. Togop kwe, inapuri manggu ndarak aap inom, inaanggumi noorak mage yugu nogo mendek aa'nduk ndarak ngguunok inom, ti kenok perak, obaane'me wu aret pogo logowak o.

¹⁶Ndarak iigak, tut ambit penengge kenok, an nawooliya wurik me onggo, Ndogop puurak, koonak nogo ndak-ndak it inobaane'me onggo wu syikal mendek 5 aret pogo logowak o. Wu syikal ambit ti, aaninggin wakkogo logonet, wu 20 gera aret.

¹⁷Togop aret eeko logonet kwe, tapi inom, kambin-ndomba inom, iyaalok ndarak abok aret ti, an nake leenak me, obaane'me wu puurak mage o. Ata, eebe warogo punuk, amiya nake kani kunggo menggam werenogo pit nogwe, ndi, amok kero, Naliku an ALA obari obeelom kage logonet, niniki ale'nggen kaakit nduk, nake warogo kani kunggwi nogo mendek me nduk, kani kunggwi, eeko logomunggup o.

¹⁸Ndi, ape uruwak inom, aawi abe'nggan kinik inom, Yi Kaliku ALA kake o, yinuk, titik eerogo wo'ninuk, kit wokkirogwe nogo kokwak eebe mbanak ti kunduk, kit aret kologo logomunggup o.

¹⁹Ndi, it aakumi Iterali mendek nen an nake leenak mendek wonok, Yi Kaliku ALA kake o, yinuk, pi wogwe nogo ti, kat inom, kapurilogwe wologwe inom, komologwe inom, kinake aret leenogo pinagagi o. Aap ambi imbirak wone mbambunuk, piyok yukwak, nduk mayu eerogo punuk, nonggo mengga kwak, kat kombowologwe wiganak kinom wone yugu yi, piyok ari kero, Naliku ALA nenggaanom paga mondok-mondok koonak aret logowak o,” yinuk, yoreegerak.

²⁰Yoge nagagerik, at Aliku ALA nen Karun yoge logonet, “O aakumi Iterali mendek unde logowam time ineyate negen nggween wogorage logonet, kit ambi unde logobagip nduk, wokkiraagin lek o. Iterali inenggela'me logonet, kineyate kolookwak an neebe unde wonogwe paga aret nuurogo nonggo logomunggup o.

²¹ Ndi, inanebunu Lewi mendek ninom lambungge minggim nawooliya wurik me yabu eekwi onggo ti, it Iterali inamendek 10 wonage kenok, ambi yendenogo nake pi wogwe nogo abok aret it Lewi mendek ineyate negen aret wogoragi o.

²²Togop me, yogondak kuli nen it aakumi Iterali mendek an ninom lambungge minggim nawooliya wurik me time koorok panggo yi wogwe iinok, ti inobaalombok maluk aret eekkolamenggaarak me, kanggwi iyo, woroorak mondok mage o.

²³It aap Lewi mendek mban an ninom lambungge minggim nawooliya wurik me time yabu eekwi me, eeko logonet, nawooliya wurik maluk eerogo pugwi iinok ti, it inobaalombok aret o. Wone yi, kat kapuri-kombowologwe nda'narit nogo logogun nogo nen mondok-mondok eerit wundi wogo logorak nduk, lengganogo yokkigi o. Ndi, it Lewi mendek ti, aakumi Iterali ineyate kologwe kwak, it ambi kolaagun lek o.

²⁴It aakumi Iterali inamendek 10 wonage kenok ambi yendenogo Naliku ALA nake wo'niri wogwe nogo aret, it Lewi ineyate mendek me nduk wogoragi o. It Lewi mendek ti, aakumi Iterali ineyate kologwe kwak, it ambi kolaagun lek o, yinuk, yagarak o,” yoreegerak.

²⁵Yoge nagagerik, at Aliku ALA nen Muta yoge logonet,

²⁶“It aap Lewi mendek wone yoroorak nogo yi aret. It aakumi Iterali nen inamendek 10 wonage kenok, ambi yendenogo an nake pi wogwe nogo ti, ineyate kologo mengga kwak wogoragarak me, waganggo logomenggaarik, it nen 10 wonage nogo ambi yendenogo Naliku ALA nake pegak eeko logowak o.

²⁷Ndi, it an nake yendenogo pegak eeko logorak nogo ti, It aakumi nen gandum anggen yigiko logonet, aa'nduk yigirik nake pi wogwe, anggur anggen amburu aambiranggo logonet, amburu aa'nduk toolak mendek nake pi wogwe, eeko mengga kwak aret pogo ogoorik o, mbako logowak.

²⁸Togop ndak-ndak aret eeko logonet, it Lewi kunduk, an nake pogo logorak aret me, aakumi Iterali mendek nen 10 wonage kenok, ambi yendenogo an nake pi wogwe nogo ambi yendenogo Naliku ALA nake pogo logowak o. Ndi, pogo logomenggaarik, pugu nogo it Lewi mendek nen aap an neebe unde Karun wogogo logowak o.

²⁹It Iterali nen Lewi wogora wogwe iinok, it Lewi nen abu obeelom kero, leenogo punuk, an nake pogo logowak o.

³⁰Ndi, aap Lewi wone ambi yoroorak nogo yi o. It Lewi mendek nen yi mendek ndi mendek abu obeelom kero, an nake leenogo pogo logomenggaarik, gandum anggen yigiko logonet, yigirik ando ndiinogo pugwi, anggur anggen aambiranggo logonet, amburu toolak ando ndiinogo pugwi, eeko mengga kwak, It pi wagaarak nogo ndiinnagaarak yi aret kogo, mba'nuk,

³¹an ninom lambungge minggim nawooliya wurik me yabu eekwi onggo it Lewi inom, it inom wonogwe inom, o magame lek ugun me nen nonggo logorak op aret o.

³²It aakumi Iterali mendek an nake leenogo punuk, pi woramenggaarak nogo, it Lewi nen abu obeelom kero, nake leenogo wo'nugwi iinok, wone yugu taganogo pugwi, it Iterali nake leenogo pi wagaarak nogo maluk eerogo pugwi, it kanggwi, eerugun lek, yegerak, yoret o,” yinuk, yoreegerak.