Read Western Dani Linggineegwaarak 20 Bible Online

Linggineegwaarak 20 - Western Dani bible

Linggineegwaarak 20

¹Tut aa'nduk penenak paga it aakumi Iterali mendek abok aret o Tin karume time yaga'lelo Kareti ari nanuk, wonogwe me, kwe Miriyam nogo time kangge mbareegi, o nogome aret nggween taambereegwaarak.

² Nggween taambogo nogogwaarik, it Iterali mendek nogo inaniyo noorak lek aret mbareegi, Muta Karun inom wone waruwok nduk, inowagam kuwak ari nogo nogogwaarik,

³mberirogo logonet, “Nit ninoreewi at Aliku ALA enggaanom paga kanggam nogome ninom aret kambuwok lak,

⁴nit Aliku ALA apuri kuwak aago yi inom, ninaanggumi inom, o karume yime aret kambuwok nduk nonggop nduk wo'niren wogotak?

⁵O karume yime gandum inom, anggur inom, eyo delima inom, eyo wuli inom, abu lek. Ndi, niyo noorak kunduk lek me, o Metit nen wo'niren o maluk me yime nonggop nduk pinani wogotak?”

⁶Yorogo mbareegwa, at Muta Karun imbirak aakumi Iterali kuwak aago nogo teppiinok, Ala inom lambungge menggim awooliya wurik me tungga paga taati nggween paga inete wanduk ngginna'nuk, wonogwe me, Aliku ALA abinak pindanogo inoba piyareegerak.

⁷Piige nagagerik, Aliku ALA nen at Muta yoge logonet,

⁸“Kat kowaanggun ti, wagangge logomenggendik, kowe Karun kimbirak aakumi ti abok kuwak eeppiinok, inigen iigak, yugum lunik time nen niyo wundi woraawak nduk, yoru o. Yoge keenok, niyo time nen aret wundi woramenggerak paga it aakumi ti inom, inaanggumi inom, abok aret nawak o.”

⁹Yoge mbareegi, at Muta nogo Ala yoreegerak ndak-ndak Aliku ALA enggaanom paga waanggun nogo wagangge nagagerik,

¹⁰owe Karun imbirak nen aakumi Iterali mendek abok aret yugum lunik enaame nogome kuwak eeppiinok, at Muta nen wone yorage logonet, “Kit wone tagangga yi, kinaruk logonip o. Nit yugum lunik yi paga nen niyo wumbinagi woraawak mba'nuk, yogo ogotik?”

¹¹Yorage nagagerik, waanggun eenggime miiri nagak eereegi-eereegi ne mbere paga yugum nogo nggwinggagagerak. Nggwinggage mbareegi, niyo kilak togon wundi wagagerak paga it aakumi ineebe inom, inaanggumi inom, nunggugwaarak.

¹²Togop eereegwaarak kwe, at Aliku ALA nen Muta Karun imbirak yorage logonet, “It aakumi Iterali wonogwe abok aret yi, an kikak nakeelik abu obeelom minggirak neyaawak nduk, eeriyak op kwe, kit abet nomba'nuk nayuk wuka'lek eekotak me, o an wogoraawam nogome wogoren unggwi namunggup mondok lek o,” yinuk, yoragagerak.

¹³It aakumi Iterali nen at Aliku ALA mberugwi, ndi, Ala iniki kikak nakeelik omaawi menggerak nogo nigiige, eereegerak kenok, o nogo endage, Meriba aret o, yinuk, toonogo pereegwaarak. Nit ninoone paga ti, Ineebi-ineeba Yogo Nogogwam aret o.

¹⁴Ti'nuk, at Muta nogo o Kareti logonet, aap Erom inowe endagembogut wone yori nawak nduk nappiige mbareegi, nogo nogogwaarik, at yogo logonet, “Kat koreewi Iterali mendek nen wone eerogo nappinani wagaarak nogo yokkiruwi o. Nit aaninggin-paaninggin ninoba arit wage nogo kat ninogoba muk keenu aret o.

¹⁵Ndi, nit ninombomini o Metit time nogo nogogwaarik, yi tahun ndi tahun wonogwe iigak, it aap inaworak Metit mendek nen ninombomini inom, nit inom, yabu mondok meek lagik-loguk eerogo pinanugwi iinok,

¹⁶ninoone nggwok paga Aliku ALA yogo mbareegu, aruk konengge nagagerik, malayikat mendek ambi nappi wagagerak paga o Metit nen wo'niren wundi wage nagagerik, kit kinanggween kuli paga o Kareti pinani wagaarak me, yogondak time ogoorik o.

¹⁷Togop me, nit tu kat wonage yi paga wogo logonet, kat keyabu gandum yarak me inom, anggur yarak me inom, ti paga nogwe, kaniyo nggween kabunik me toologo nunggwi, nina tu ambet agi-ogu yogwe, eeka'lek tu nggwok paga nok-nok aret kanggween kuli paga wundi noorak nduk, yokkiri wogo o.”

¹⁸Yoreegwaarak kwe, at aap Erom mendek inowe endagembogut nen onggo yorage logonet, “Kit nen tu o nit wonogwe me yi paga woroorak mondok mage o! Kinagabiti lek aret, tu yi paga wogwe kiinok, wooluwak paga kinoori wundugun aret o.”

¹⁹Yorage mbareegi, it aap Iterali mendek nogo nen yogo logonet, “Lek o, ninogoba. Nit tu nggwok paga mban nok aret nagun o. Ndi, nogo logonet, nit inom, ninaanggumi inom, niyo abu ee'ninake kenok, nonggo logonet, wu onggo wokkegak tu yi paga iluk mban nagun me, E, yo'niret o.”

²⁰Yoreegwaarak kwe, aap Erom mendek inowe endagembogut nogo nen yorage logonet, “Kit tu nit wonogwe yi paga woroorak mondok mage aret o!” Yorage kagak, it aap o Erom ineegin warak inomaawi mendek nogo wundi wogo logonet, inooriyak nduk, eeko mbareegwa, it aap nogo iniyokan wogo nogogwaarik, “Tu yi paga woroorak mage o,” yoragagerak nogo, Iterali yorogo mbareegwa, tu ti paga woroolik tu alik paga wogogwaarak.

²²It aakumi Iterali mendek abok aret o Kareti mbo punuk, puut Kot paga time ari nogogwaarak.

²³Puut Kot koorok nggween Erom kuli paga ari nogogwaarak wonogwe me, at Aliku ALA nen Muta Karun imbirak yorage logonet,

²⁴“Kit niyo Meriba eneerime logonet, an nen, Ndogop eeriyak, yokkiragarak nogo taganggotak me, at Karun yi, o aakumi Iterali wogoraawam nogome unggwi nagin lek o. Ata, ombomini nggwogoba nogogwaarak kuwak aago wonogwe me time iya nagin o.

²⁵Puut paga time nen kambunuk, ombomini nggwogoba nogogwaarak wonogwe me time iya nagin me, Karun inom, aput Eleyatat inom, Woraanip o, yorage logomenggendik, wogoren puut Kot ti paga lagi nanuk, at Karun nogo ayum nggoorogo aput Eleyatat yirippunu o.”

²⁷Yorage mbareegi, Aliku ALA nen Muta yoreegerak nogo ndak-ndak it Iterali mendek abok aret inigen iigak, Muta inom, Karun inom, Eleyatat inom, puut Kot paga lagi nogogwaarak.

²⁸ Lagi nogo nogogwaarik, at Muta nen Karun ayum nogo nggoorogo aput Eleyatat yirippereegerak. Yirippege mbareegi, at Karun nogo puut Kot ti paga kangge mbareegi, Muta Eleyatat imbirak wambi wogogwaarak.

²⁹Ndi, it aakumi Iterali mendek nen Karun nogo puut Kot paga kambeegerak ineenu ogo nogogwaarik, erabun ndoombunuk leenggu maakwi aret iigak, nogo 30 yereegwaarak.