Read Western Dani Linggineegwaarak 21 Bible Online

Linggineegwaarak 21 - Western Dani bible

Linggineegwaarak 21

¹ Aap Kanan mendek o Kanan o ame pa'nggwe karume o Arat arum menggerak inowe endagembogut nogo nen, “It aakumi Iterali mendek nogo tu Atarim paga wogo agaarik o,” yogwe aruk konembunuk, it inom wim eeri nage nagagerik, ineebe ando kugun wogoren wagagerak.

²Wogoren wage mbareegi, it aakumi Iterali mendek nogo nen, “It aakumi o Kanan yi, waganogo nineenggime pinanege keenok, it inawi kota-kota mondok pup eerogo piyaagun o,” yinuk, wone kumbuk mbanogo Aliku ALA yoreegwaarak.

³Yogwi nogo Aliku ALA aruk konengge nagagerik, it aakumi Kanan mendek nogo apit aret waganogo it Iterali mendek ineenggime piige mbareegi, it aakumi Kanan mendek ineebe inom, inawi inom, abok aret pup eerogo piyareegwaarak. Togop eerogo piigo nogogwaarik, o ti endage, “Koroma o,” yinuk, toonogo pereegwaarak. Ndi, nit ninoone paga ti, Pup Eerogo Piyareegwam, aret o.

⁴ Ti'nuk, it Iterali puut Kot time nen nok tu niyo Laut Merah nogo menggam time ari nanuk, o Erom mangga wagak wangge'nuk nogo logonet, iniki wobi-wobe ko wariyak abu meek aret eeginake mbareegi,

⁵ it Iterali mendek nogo nen, Ala Muta imbirak ineebi-ineeba eerogo piigo logonet, “O karume yime oroti inom, niyo inom, abu lek me, mbi ombat maluk yi mban nunggwi paga peyak wuriyak ee'ninake logonet, o karume yime kambuwok nduk, nonggop nduk o Metit nen wo'niren yime pinani wogotak?”

⁶Yogo mbareegwa, at Aliku ALA nen yi waalo ndi waalo ineyak andiigwi nappiya wagagerak paga it Iterali mendek apit aret ineyak mbaninabit nogo mbareegwa, kambit nogogwaarak.

⁷Kambit nogo mbareegwa, it aakumi Iterali mendek nogo apit aret Muta owagam wogo nogogwaarik, yogo logonet, “Kat inom, Aliku ALA inom, ninoone maluk yokkirogoorak ti maluk nggwok eekoorak o. Ndi, maluk eekoorak paga waalo ineyak mbaninakwi yi, lek aruwak nduk, kat nen Aliku ALA yoru o, ninogoba!” Yogo mbareegwa, at Muta nen it inake Ala yoreegerak.

⁸Yoge mbareegi, Aliku ALA nen Muta yoge logonet, “Kat nen mbuti tembaga paga waalo ogut ogobakkigippege logomenggendik, eyo paga nabenogo tiyappege keenok, it aakumi inalitak lombok ineyak mbaninabit nogwe nogo inigen pekkogwe iinok, ineenik logogun o.”

⁹ Yoge mbareegi, at Muta nogo nen mbuti tembaga paga waalo ogut ogobakkigirogo eyo paga nabenogo punuk mippege mbareegi, it aakumi Iterali inalitak lombok ineyak mbaninabit nogwe nogo inigen pekkogwe iinok, kambulik ineenik wonogogwaarak.

¹⁰Ti'nuk, it aakumi Iterali mendek nogo abok aret o Obot time nogo nogogwaarik, inawooliya wuppatinuk wonogwe,

¹¹ti'nuk, o Obot nen o Mowap oonegen lagi wage menggim pa'nggwe time kagak, karume o langgu-langgu wambeegim Abarim nogome nogo nogogwaarik, inawooliya wuppatinuk wonogwe,

¹²time nen o Teret kobappaga nogo nogogwaarik, time aret inawooliya wuppatinuk wonogwe,

¹³time nen aakumi Amori mendek inom, Mowap mendek inom, inanggween kuli paga niyo Aronon aakumi Amori wonogo menggam nen o karume wage me ambet paga inawooliya wuppatinuk wonogwe, eerit mondo agan nugu nogogwaarak.

¹⁴Togop eerit nugu nogogwaarak kenok, mbuku endage, ALA Inom Wim Eereegerak, nogo paga liiru mbangge logonet, “O Tupa yaga'lelo Wakep inom, o Tupa nggelok-nggobok nenaarogo pit nagagim inom, niyo Aronon inom,

¹⁵ndi, o kobappaga nen nok elan-elan nabunogo pit nagagim o kota At nen nok Mowap inanggween kuli o,” yinuk, liiru mbaneegerak nogo ti aret.

¹⁶Niyo Aronon nen wo'narok niyo nggween kabunik me o Mbet nogome aret ari nogogwaarak. O Mbet ari nogogwaarak nogo ti, at Aliku ALA nen Muta yoge logonet, “It aakumi Iterali mendek kuwak eeppiige keenok, niyo wogoraagin o,” yinuk, yoreegerak nogo kuwak eerogo piinok, niyo wogorage mbareegi,

¹⁷it Iterali mendek ndawi wako logonet, “Kat yi nggween kabunik yi wae. Niyo kila-kila wundi mok o. Aap nggwok ineenu agak inowaanggun paga, Inowaanggun luk nega paga, It aap inendagembogut nen kabunogo pagagwi, Ninoweewi nagawan nen niyo yi pulu mbanogo pagagwi, Eekkabeegwaarak me, Ndawi onggo-onggo waruwok o,” yinuk, ndawi wareegwam nogome aret nogogwaarak. Ti'nuk, karume time nen wo'narok o Matana ari nogwe,

¹⁹o Matana nen o Nakaliyen ari nogwe, o Nakaliyen nen o Mbamot ari nogwe,

²⁰ndi, o Mbamot nen puut Pitaga enaame karume o kobappaga Mowap nogome ari nogwe, eerit nogogwaarak.

²¹Ti'nuk, it Iterali nen aakumi Amori inowe endagembogut Tikon wonage me wone agago nappiigo mbareegwa, nogo nogogwaarik, yogo logonet,

²²“Nit tu kat wonage yi paga wogo logonet, kat keyabu gandum yarak me inom, anggur yarak me inom, ti paga nogwe, kaniyo nggween kabunik me toologo nunggwi, nina agi-ogu yogwe, eerugun lek tu nggwok paga mban nok-nok aret kanggween kuli paga wundi noorak nduk, yokkiri wogo o.”

²³Yoreegwaarak kwe, at aap endagembogut Tikon nogo nen, “Tu yi paga woroorak mage o,” yorage nagagerik, awuri ineegin warak ineebe apit lombok kuwak eeppiinok, it Iterali mendek inom wim eeruwok nduk, karume time wundi nogo nogogwaarik, o Yakat ari nanuk, it Iterali inom wim eereegwaarak.

²⁴Eeko logonet, it aakumi Iterali nen wooluwak paga aap Tikon awuri inom abok aret inoorogo piinok, inanggween niyo Aronon nen nok niyo Yabok kuli aakumi Amon mendek inanggween kuli mbanak omaawi menggim ti kuli aret tebenggologogwaarak.

²⁵It aakumi Iterali mendek nogo nen aakumi Amori mendek wonogwe me kota-kota abok aret tebenggologo logonet, o Ketibon kota nggwok inom, o Ketibon enaagan-ambokan kota mbuulogwe-mbaalogwe nogome inom, abok aret tebenogo piinok, o time aret ye mbambatinuk wonogogwaarak.

²⁶It aakumi Amori inowe endagembogut Tikon nogo nen it Mowap mendek inowe endagembogut aa'nduk wonagaarak nogo imbirak wim eeke logonet, anggween niyo Aronon kuli tebeneegerak nogo o Ketibon time aret unde wonagagerak.

²⁷ Alom ti eereegerak paga it aap ndawi pega nen aap Tikon anep pogo logonet, “Kani kunik o Ketibon nen wundi wage, Aap Tikon wonage menggim nen kani omoonuk wunuk agan wage, Eeke logonet, O Mowap yaga'lelo o At nogo kani nenet nage, O Aronon nggelok-nggobok time wonogwe nogo pup eerogo piige, Eereegerak me, Kit aakumi Mowap mendek yi, Lek eerogo pinagagaarak me, kinabuwa o! Kit Kamot mendek yi kunduk, kinabuwa o! Kinapuri wologwe nogo yaluk-ndaluk kole mbaganit nugwi, Kinapuri komologwe kenok kugun wogoret nogwe, Eeko logowak nduk, Aap Amori inowe endagembogut Tikon nogo wogoreegutak kwe, Nit nen it Amori mendek tebenogo piigo logonet, O Ketibon nen nok o Ndibon kuli pup eerogo pugwi, O Ketibon nen nok o Nopa nggween Mereba kuli time mbelak mbanogo piigwi, Eerit nogoorak me, O Ketibon time wa'nip o, Wogo logomonggotik, o ti obaane'me wukwi, Ndi, aap Tikon won(...)

³¹It aakumi Iterali mendek nen aap endagembogut Tikon nogo tebenogo punuk, aakumi Amori iname nogome ye mbambatinuk, wonogogwaarak.

³²Ti'nuk, at Muta nen o kota Yayetet inigen yombooni nawak nduk, aap nggayo nappiyareegerak. Nappiyareegerak nogo melak togon Muta yori wogo mbareegwa, it Iterali mendek wim eeri nogo nogogwaarik, o kota Yayetet enaagan-ambokan kota mbuulogwe-mbaalogwe it aakumi Amori wonogwe nogo mugogo wumbiinok, o nogome it aret tebenggologogwaarak.

³³Ti eeppunuk, yungguk togon tu o Mbatan paga nogwe iigak, aakumi Mbatan inowe endagembogut Ok nogo awuri ineegin warak inom, o Erereyi pa'nggwe time Iterali inom wim eeriyak nduk, wundi wogogwaarak.

³⁴Wundi wogo mbareegwa, at Aliku ALA nen Muta yoge logonet, “Aap Ok eebe inom, at awuri wim eeka ineebe inom, inanggween inom, abok aret kat keenggime pagagirak me, aakumi Amori inowe endagembogut Tikon o Ketibon inarum wonage kagak eeppereegindak nogo ndak-ndak aret eeppumunggun me, at eebe paga kagabiti mbarugun o.”

³⁵Yorage mbareegi, it Iterali mendek pilak yogo logonet, aap endagembogut Ok nogo inom, at apuri inom, at awuri ineegin warak inom, abok aret eegu-ando abu teppiyoolik mondok pup eerogo inooppunuk, anggween nogo paga it aakumi Iterali mendek aret ye mbambatinuk, wonogogwaarak.