Read Western Dani Linggineegwaarak 22 Bible Online

Linggineegwaarak 22 - Western Dani bible

Linggineegwaarak 22

¹Ti'nuk, it aakumi Iterali mendek nogo o Yeriko koorok niyo Yoraran ene nggwe wunggagak o Mowap kobappaga yi paga ari nanuk, inawooliya wuppatinuk wonogogwaarak.

²Aakumi Iterali mendek nen Amori mendek eeginabeegwaarak abok aret it aakumi Mowap inowe endagembogut aap Tipot aput Mbalak nogo nen aruk konengge,

³ndi, it aakumi Mowap mendek nen it aakumi Iterali ineebe ambik aago wonogwe iinok, ineebe paga inaganak mondok nggwok wakwi, eereegwaarak.

⁴Eeko nogogwaarik, it Mowap mendek nen aakumi Miriyan mendek inoweewi yorogo logonet, “Ninogobamini o. It Iterali mendek ineebe apit aago piyaariyo maluk aret me, tapi nen iri'ngga apit mbanogo ambeme yonggoke menggi kwak, it nen nit eegu-ando pinanugun lek abok aret inambeme yonggo'ninabugun aret kogo o,” yinuk, yorogogwaarak. Yorogwe iinok, ne ti eyom paga aap Tipot aput Mbalak aakumi Mowap mendek inowe endagembogut wonage nogo nen

⁵ at Mbeyot aput Mbileyam o Petot niyo Eparat ambet paga at nda'nagagim owe-awot inom wonage nogo yori nawak nduk wone eerogo nappiige logonet, “It aakumi ambi o Metit nen ineebe apit aago wundi wogo nagaarik, nit niname yime mondok nggween yi enete kuurik lek eeppunuk logonet, an wonage me panggok togon inawooliya wuppatinuk aret agaarik o.

⁶Togop aret wonogwe me, nit ninomaawi ti, mbuuluk. Ndi, it inomaawi perak, nit ninom wakkoorak mondok meek aret me, nit nen it tebenogo piinok, mugogo wumbiyoorak wakkaawok nduk, at Mbileyam nogo nen aakumi inale'nggen inoba piige kenok, inale'nggen aret kologwe, ndi, pulunogo piige kenok, pulunik aret wonogwe, eeke menggerak nogo ti, neenu aret me, it aakumi yi, pulunogo piya woraawak, yegerak, yori nanip o,” yinuk,

⁷it aap Mowap mendek inoweewi inom, Miriyan mendek inoweewi inom, nappiyareegerak. Nappiige mbareegi, pulunogo piya woroorak onggo inom wonok aap Mbileyam wonage me, nogo nogogwaarik, aap Mbalak nen yereegerak nogo abok aret mbininogo Mbileyam yoreegwaarak.

⁸Yogo mbareegwa, at Mbileyam nen it yorage logonet, “At Aliku ALA nen wone an yo'nege kenok, yokkiraakit nduk, ninom yime nogo yuwok o.” Yorage mbareegi, it aap Mowap inoweewi nagawan-nagawan nogo at Mbileyam inom nogo yereegwaarak.

⁹Nogo yugwi wonogwe me, at Ala nen Mbileyam ka wage nagagerik, yoge logonet, “It aap kat keya wagaarak kinom wonage ti, taani o?”

¹⁰Yoge mbareegi, at Mbileyam nen Ala yoge logonet, “At aap Tipot aput Mbalak Mowap mendek inowe endagembogut nogo nen wone eerogo nappiya wage logonet,

¹¹It aakumi ambi o Metit nen wogo nagaarik, o nit niname yime nggween yi enete kuurik lek eeppunuk wonogwe me, an ninom wim eeke logonet, name yime nen piyanogo wumbiyoorak wakkaakit nduk, an nake nen it pulunogo piya mok, yo'negerak o.”

¹²Yoge mbareegi, at Ala nen Mbileyam yoge logonet, “It aakumi wagaarak wonogwe ti, an nale'nggen muk inoba piigirak wonage me, kinom nage logomenggendik, pulunogo piya noorak mondok mage o,” yinuk, yoreegerak.

¹³Nogo yippunuk, ko'lu kuubondendok at Mbileyam nogo eenik age nagagerik, at aap Mbalak awuri nagawan-nagawan nappiyareegerak nogo yorage, “At Aliku ALA nen, Aap ti, kinom noorak mondok mage o, yo'negerak me, kit kinalik aret kiniyokan kiname nanip o.”

¹⁴Yorage mbareegi, it aap nagawan-nagawan Mowap nen nappiyareegerak nogo iniyokan iname wogo nogogwaarik, wone yoragagerak nogo at Mbalak yogo logonet, “At Mbileyam nen, An ninom noorak lek o, yo'nirage mbaki, wogo o.”

¹⁵Yogo mbareegwa, ti'nuk, at Mbalak nogo nen aap inoweewi nagawan-nagawan inayuk warak it yagaatak taganggulik kero, ineebe ambik aret at Mbileyam wonage me nappiyareegerak.

¹⁶Nappiyareegerak nogo nogogwaarik, Mbileyam yogo logonet, “Tipot aput Mbalak nen wone agago nappinani wage logonet, An nen onggo nggwok wogoge, ndi, Yogop eeppanu o, yo'nege kenok, ndak-ndak eeppege, eerigin me, ambi yiluk ari kenok, puk ariyak mage o. Ata, mbet-mbet aret wage logomenggerik, an nake nen it aakumi yi, pulunogo piya woraawak, yegerak o.”

¹⁷

¹⁸Yogo mbareegwa, at Mbileyam nen aap Mbalak nappiyareegerak nogo yorage logonet, “An nage neenok, onggo wo'niriyak nduk, mbuti emas inom, mbuti perak inom, at ame o nggwok abe wurik nogome yagabit eerogo pemenggerak kwe, at Aliku nogoba Ala nen, Yogop eeriyak, yegerak nogo taganogo punuk, yi mendek ndi mendek mbuuluk a, nggwok a, ambi eeri nagin mondok lek aret o.

¹⁹Togop aret me, oonikiya yi paga mban at Aliku ALA nen wone alik ambi yo'nege kaamun ilik, lek a? tokkogo logonet, it aa'nduk wogogwaarak yime nogo yereegwaarak ti kokwak, kit kunduk ninom yime nogo yuwok o.”

²⁰Yorage nagagerik, inom nogo yege me, at Ala nen Mbileyam nogo ka wage nagagerik, yoge logonet, “Mbileyam wae. It aap yi, kat kinom noorak nduk muk kayonggo wagaarak wonogwe me, kinom aret nak o. Ndi, nage logomenggendik perak, an yokkege neenok mban eerumunggun o,” yinuk, yoreegerak.

²¹Ko'lu kuubondendok, at Mbileyam nogo eenik age nagagerik, at aanggo keledai amborowak paga kwi'nagak nogo ndoonogo punuk, at paga kwi'na'nuk, aap Mowap inoweewi nagawan-nagawan nogo inom wogogwaarak.

²²Ndi, at Mbileyam nogo keledai amborowak paga kwi'na'nuk wage kagak, ayeloman ineebe mbere inom tu paga wogwe me, Ala anini oba pege logonet, Aliku ALA ayonggo malayikat mendek nogo nen aru non mbambunuk puk agagerak.

²³Ala ayonggo malayikat nogo nen wooluwak nutik aru non mbambunuk wonage nogo keledai nen enegen kage nagagerik, ena nomok togon yabu yarak me unggwage mbareegi, at Mbileyam nen tu paga mot-mot woraawak nduk, yawi nggwiirit wareegerak.

²⁴Wake kagak, Aliku ALA ayonggo malayikat nogo, yabu anggur awi yarak peenok-peenok tu nggelo'me time aru non mbanuwak nduk, mi'nari wagagerak.

²⁵Mi'ndak wonage keledai nogo nen enegen kage nagagerik, ena nomok ari logonet, yugum yagat nogo paga Mbileyam iyok taga'mbit nggeloorit eeke mbareegi, keledai nogo yawi ambinom nggwiirit wareegerak.

²⁶Warit nage kagak, Aliku ALA ayonggo malayikat nogo tu ambi abu nggelok ena agi agak, ogu agak, eeriyak meek nogome aret aa'nduk mi'nari wagagerak.

²⁷Aliku ALA ayonggo malayikat mi'nari wagagerak wonage nogo keledai nen enegen kage nagagerik, iyok yungguk ari logonet, kwi'nage mbareegi, at Mbileyam nogo anini nen owaanggun paga keledai nogo yawi nggwiirit wareegerak.

²⁸Wake mbareegi, at Aliku ALA nen keledai nogo aakumi inoone yogo mengga kwak yuwak nduk eerogo pege mbareegi, aakumi inoone negen Mbileyam yoge logonet, “An nen kat maluk ngge eeppagagirak kenok, ne kenagan paga yawi nggwiirit mban nooke agandik?”

²⁹Yoge mbareegi, at Mbileyam nen keledai nogo onggo yoge logonet, “Kat nonggop nduk wi-wi ee'nabit yinomo-yanomo mban agan nage agandik? Nawooluwak wonage logonetak en, yogondak aret kambenok nduk, koorogo paganetak.”

³⁰Yoge mbareegi, at keledai nen Mbileyam yoge logonet, “An yi ti, kageledai aret me, o maan nen yogondak kuli an namborowak paga mban yarukkeren nege minggirak kwe, an yogop ambi eekkake neege menggendak ilik, lek a?” Yoge mbareegi, at Mbileyam nen, “Lek o.”

³¹Yoge mbareegi, at Aliku ALA nen at Mbileyam enegen paganogo pege mbareegi, Aliku ALA ayonggo malayikat wooluwak eenggime nutik porogo tu paga mi'ndak wonage nogo at Mbileyam enegen kage nagagerik, etenggen nggween paga wanduk yinuk, ayuk wureegerak.

³²Ayuk wuke mbareegi, at Aliku ALA ayonggo malayikat nen Mbileyam yoge logonet, “Kat kageledai ti, nonggop nduk ne kenagan paga yawi wakak mban eeke agandik? Kat noorak mbakenom nogome maluk eeppagarak kagak nage keyo nduk, an nen aret karu non mbanggabit nage agarik o.

³³An kat kooriyak nduk wooluwak neenggime wonage nogo kageledai ne kenagan paga enegen neege nagaarik, ena nomok yaga'mban eekerak nogo paga kat kagap ndakerak o. Togop ee'netak lek en, keledai nogo teppege logonet, kat mondok koorogo paganetak.”

³⁴Ti yoge mbareegi, at Mbileyam nogo nen Aliku ALA ayonggo malayikat nogo yoge, “An nage neyo, tu non mbambaniyak nduk tu paga mi'ndak wonage nogo an neenggo'lek me, mondok maluk aret eekirak o. Kat nogoba nen an noorak lek nombakendak kenok, ya'nen aret name niyokan naakit o.”

³⁵Yoreegerak kwe, at Aliku ALA ayonggo malayikat nogo nen Mbileyam yoge, “It aap keya wagaarak ti, kinom noorak op aret kwe, an yokkege neenok mban yoraamunggun o.” Yoge mbareegi, at Mbileyam nogo Mbalak awuri nogo inom aret wogogwaarak.

³⁶At Mbalak nogo Mbileyam wage aruk konengge nagagerik, wage kero, woorak nduk, o Mowap at unde menggim kuli paga niyo Aronon aa'nggi paga time arum a nagagerak.

³⁷Arum wonage me, at Mbileyam ka wage mbareegi, wone yoge logonet, “Kat woraanok nduk nawuri yonggo nappiige nagarak nogo iige nagandak ilik, lek a? Kat nonggop nduk mbet-mbet woroolik? An onggo wokkiriyak meek nomba'nuk wonagandak ya?”

³⁸Yoge mbareegi, at Mbileyam nen Mbalak yoge, “An yogondak wagarak yi aret kwe, an nen niniki koonogo wone ugun yokkiriyak nombakendak? Lek o! At Ala nen wone ninikime pege kenok mban yokkirigin o.”

³⁹Yoge mbareegi, at Mbileyam nogo Mbalak imbirak o Kiriyat-Kutot time aret wogogwaarak.

⁴⁰Wogo nogogwaarik, at Mbalak nogo nen lembu-tapi inom, kambin-ndomba inom, wappunuk, at Mbileyam inom, it aap inoweewi nagawan-nagawan inom wogogwaarak nogo inom, wogoragagerak.

⁴¹Ko'lu nen at Mbalak nogo Mbileyam imbirak puut Mbamot-Mba'an laganggo nogogwaarik, time nen aakumi Iterali mendek ando wonogwe nogo inigen nagiyareegwaarak.