Read Western Dani Linggineegwaarak 24 Bible Online

Linggineegwaarak 24 - Western Dani bible

Linggineegwaarak 24

¹At Aliku ALA nen it aakumi Iterali ale'nggen inoba piyoorak inikilom mbake at Mbileyam kage nagagerik, at aa'nduk agugi nen maluk eerogo piyaawak nduk, eeke nagagerak nogo pogom eerulik, ata, we enegen Iterali wonogwe me karume time ena na'nagagerak.

²Na'nage nagagerik, it aakumi Iterali mendek nogo inanebunu ndarak ndegek mban inawooliya wukko'net nogogwaarak iyareegerak. Togop iige wonage me, Ala Aberiniki nogo at Mbileyam oba ari wage mbareegi,

³ore warak negen peebi eeriyak wone ari logonet, “Peebi eeriyak wone yelok kaga, Ala nen yo'nege nogo naruk konengga, At Omaawi Lombok Menggerak nen nabinggaanggo paga yo'nege kenok, yoraga, Neebe nggween paga ngginnage logonet, kin aret kaga, Eeke minggirak an Mbeyot aput Mbileyam nogo nen Peebi eeriyak wone ambi ari agarik o.

⁵Kat Yakup wae! Kawooliya wurik ti, abu kigirikwe kagi o. Kat Iterali wae! Kat wonage menggenom obeelom lombok wonage o!

⁶O kobappaga nggwok lombok wiganogo pereegerak kokwak, Niyo aa'nggi paga yabu yarak abu obeelom menggi kwak, Eyo ni Aliku ALA nen yareegerak kokwak, Eyo nggabina niyo aa'nggi paga yarak menggi kwak, Kawooliya wurik ti, abu obeelom menggerak o.

⁷Kat kombowologwe ti, Inaniyowa'na nen niyo kilu-kilu wangge, Inamendek awi yarak me niyo amburu ambik wonage, Aap Agak ti, endagembogut kwe, tebenak kagak, It inowe endagembogut ti, mondok tiyanak aret wonage, Ndi, kabu'me piige menggenom mondok tiyak ari, Eeke logogin o.

⁸Kombowologwe ti, At Ala o Metit nen wogoren wage logonet, It tapi nggwiya eyak pogom yirippiyareegerak me, It aakumi inom ogoorak nogo inambeme yonggorinakwi, Inowak yigirik-noonom eerogo piigwi, Inomaale paga inobate polok ati inookwi, Eeko agaarik o.

⁹ Singa ngguunok iyok yunggumbunuk, pogonik wonage, Ndi, singa kooli ugun windak wonage, Eekwi me, Aap ambi ta nen iniki teeluk a'nuk mbaaniigeelik kokwak It aakumi ti, togop aret menggaarak o. It aakumi nen kat Iterali obeelom eeppagagwi iinok, It togon obeelom eeppiigwi, Ndi, it aakumi nen kat pulunogo pagagwi iinok, It kunduk, pulunik aret wonogwe, Eeko logogun o,” yinuk, yereegerak o.

¹⁰Ari mbareegi, at Mbalak nogo anini nen eenggi aambele eerogo pake logonet, at Mbileyam yoge, “An nen it ninom wim mbanak pulunogo piya woraanok nduk, kayonggo pigirak kwe, kat nen ne kenagan paga kale'nggen inoba piigak mban eekendak me,

¹¹an nen onggo nggwok wokkiriyak nduk, muk pipuk eerogo pigirak nogo wagangge keyo, Aliku ALA nen non mbambagagerak me, yogondak we aret kame nak o!”

¹²Yoreegerak kwe, at Mbileyam nen Mbalak yoge, “Kat kawuri aa'nduk nappiigendak nogo yorage logonet,

¹³At Mbalak nogo nen, An onggo wo'niriyak nduk, mbuti emas inom, mbuti perak inom, ame o nggwok abe wurik nogome yagabit eerogo pemenggerak kwe, at Aliku ALA nen, Yogop eeriyak, yegerak nogo taganogo punuk, op a, maluk a, nalik niniki mba'nuk eerigin lek o. Ata, Aliku ALA nen yo'nege kenok mban yigin o, yinuk, yoragagirak nogo lek a?” yinuk, yoreegerak.

¹⁴Yoge nagagerik, at Mbileyam nen Mbalak yoge logonet, “Yogondak an nowe-nawot wonogwe me name nage aret me, peebi it kinom wim mbanak ti nen it kat kawuri inarum menggendak eeppiya woroorak wone nogo, yokkirikit nduk, karuk logot o.”

¹⁵Yoge nagagerik, at Mbileyam nen ore warak negen peebi eeriyak wone at Mbalak yoge logonet, “Peebi eeriyak wone yelok kaga,

¹⁶At Ala nen yo'nege kenok naruk konengga, At Mondok Tiyanak Menggerak nen yo'nege kenok neenu aga, At Omaawi Lombok Menggerak nen nabinggaanggo paga yo'nege kenok yoraga, Neebe nggween paga ngginnage logonet, kin aret kaga, Eeke minggirak an Mbeyot aput Mbileyam nogo nen Peebi eeriyak wone ambi ari agarik o.

¹⁷At eebe kage kwe, yogondak lek o. Eebe liippege kwe, nda lombok wonage o. Yakup ombowologwe wiganak inenggela'me nen ndowan ambi wundi wage, Iterali inenggela'me nen ineenu agak muun mbanak ambi kin age, Eeke logomenggerik, Aakumi Mowap inoweewi inenggaawak yigirogo piige, Aap Tet ombowologwe abok aret inanobak aan lebenogo piige, Eerit nage logonet,

¹⁸O Erom tebenogo piige, Aakumi Erom inom wim mbanak aakumi Teyit nogo tebenogo piya unggwage, Eeke kenok, It Iterali inomaawi ambik arugun o.

¹⁹At Yakup paga wiganak aap nggwok omaawi warak ambi inenggela'me nen mi'nage logomenggerik, At inom wim mbanak eegu yumbunik o kota wonogwe nogo lek eerogo piyaagin o,” yinuk, yoreegerak.

²⁰Yoge nagagerik, at Mbileyam nen it Amalek mendek enegen iige nagagerik, ore warak negen peebi eeriyak wone ambi ari logonet, “It yi aakumi ndi aakumi inanebunu lombok wonogwe nogo Inenggela'me inowe Amalek aret kwe, Eerit namenggi-namenggi irip paga at togon lek aret arigin o.”

²¹It aakumi Keni mendek enegen iige nagagerik, ore warak negen peebi eeriyak wone ambi ari logonet, “Towe awi yugum paga wuketak nu'lek menggi kwak, Kit wonogwe me time kinawi mondok nu'lek wonogwe kwe,

²²It aap Atiyut mendek nen kit Keni mendek kineebe lek eerogo pinagagwi, Kugun wokkiren nogwe, Eerugun o.”

²³Ari nagagerik, ore warak negen peebi eeriyak wone ambi ari logonet, “At Ala nen ti eeke kenok, Aap ambi ta nen eenik logogin o? Kinabuwa o!

²⁴O Kitim laut aa'nggi paga nen yiiro-ndiiro aago woraagun o. Wogo logomenggaarik, It aakumi Atiyut mendek inom, Kebet mendek inom, tebenogo piya woraagun o. Tebenogo piigwi iinok, it Kitim mendek kunduk lek aret arugun o.”

²⁵Ari nagagerik, at Mbileyam nogo nen, “Name na o,” yinuk, iyokan ame nage, ndi, Mbalak kunduk, ame aret wage, eereegwaarak.