Read Western Dani Linggineegwaarak 27 Bible Online

Linggineegwaarak 27 - Western Dani bible

Linggineegwaarak 27

¹At aap Telapekat nogo apuri komologwe ineebe 5 inendage Makala, Nowa, Kogala, Milaka, Tirata aret wonogogwaarak. Ndi, inogobamini ndarak inendage ti, Telapekat ogoba Kepet, Kepet ogoba Nggileyat, Nggileyat ogoba Makit, Makit ogoba Manate, Manate ogoba Yutup aret wonogogwaarak.

²At Muta inom, aap Ala unde Eleyatat inom, it Iterali inarum menggaarak inoweewi inom, it aakumi Iterali abok aret inom, Ala inom lambungge menggim awooliya wurik me tungga paga kuwak aago wonogwe me, at Telapekat apuri komologwe nogo inowagam nogo nogogwaarik, yorogo logonet,

³“At ninogoba ti, it aap Kora inom iniki ambit eeppunuk, Aliku ALA inom ogooreegwaarak nogo inom eereegerak paga kambulik. At alik omaluk paga o karume time kambeegerak. Ndi, at apuri aap ambi ndaganabulik komologwe mban nda'ninabeegerak o.

⁴At apuri aap ambi ndaganabulik me, endage lek age kero, ki logowak nduk, at oreewi wonogwe me time nit ninom logowok nduk, nggween ambi wo'niret o.”

⁵Yogo mbareegwa, at Muta nogo wone it yereegwaarak nogo wonok Aliku ALA enggaanom paga yori nage mbareegi,

⁶at Aliku ALA nen Muta yoge logonet,

⁷ “It komologwe Telapekat apurilogwe nen wone yokkiri wagaarak ti, abet aret me, kat nen nggween it inogoba eyate wogoroorak kenok oreewi wonogwe me time inom inenggela'me logonet, at apuri komologwe ti, nggween unde logowak nduk eegu mogonogo wogoret o,” yinuk, yoreegerak.

⁸Yoge nagagerik, ambi yoge logonet, “It aakumi Iterali mendek wone yoroorak nogo yi aret. Aap ambi at apuri aap ndaganaka'lek kagak kangge kenok, nggween yate at koloorak yugu nogo ti, at apuri komologwe aret unde aruwak nduk wogorogo logowak o.

⁹Ndi, ayome lek aret kangge kenok perak, nggween yate nogo owe-awot wogorogwe,

¹⁰ndi, owe-awot ambi abu wonogwe lek iinok, yate pugu nogo at ogoba oreewi wonogwe nogo wogorogwe,

¹¹ndi, ogoba oreewi mendek abu wonogwe lek iinok ti, at oreewi mendek wiganak koorok wonogwe nogo unde aruwak nduk, nggween yate pugu nogo wogorogwe, eeko logowak, yegerak, yoret o,” yinuk, yoreegerak. At Aliku ALA nen wone lengganogo Muta yoreegerak nogo ndak-ndak wone ti, it aakumi Iterali mendek mondok eeko logowak nduk, Muta nen Iterali yoragagerak nogo ti aret.

¹² Ti'nuk, Aliku ALA nen Muta yoge logonet, “It aakumi Iterali mendek abok aret niyo eneerime o Tin karume time logonet, inoone wukot-laakot yo'nogo mbareegwa, an kikak nakeelik obeelom minggirak kenok, nayuk wuriyak op kwe, inigen iigak, Eeriyak, yokkiragagirak nogo ndak-ndak eerulik noone taganogo punuk, eereegutak me, kat koweeluk Karun eereegerak ndak-ndak kat kunduk, kombomini nggwogoba kuwak aago wonogwe me iya noorak me, kat nen puut Abarim ti paga lagi nage logomenggendik, an nen nggween Iterali wogoraawam time kena nakkanu o.” Wone yi agagerak alom nogo ti, niyo Meriba eneeri wundi wage menggim o Tin karume Kareti koorok nogome logonet yereegwaarak.

¹⁵Ti yoge mbareegi, at Muta nen at Aliku ALA yoge logonet,

¹⁶ “Ai, nogoba! Yi aakumi ndi aakumi abok aret ineenik aganaka unde Kaliku kat Ala aret me, it kapuri abok kuwak aago yi, at ndegeninaka lek kenok, ndomba kobak ogo mengga kwak arukwak, at nen ndegeninake logonet, wogoret wundi nage, unggwi wage, eeke logowak nduk, aap ambi leenogo mippu o.”

¹⁸ Yoge mbareegi, at Aliku ALA nen Muta yoge, “At Nun aput Yotuwa nogo Aberiniki oba wonage ti, aap an neebe unde Eleyatat inom, it aakumi apit kuwak aago wonogwe ti inom, inenggaanom paga, Mi'nari mok o, yoge logomenggendik, mi'nari wage kenok, it aakumi Iterali mendek abok aret at oone konenggo logowak nduk, at anobak keenggi tebengge logonet, kat komaawi koba wonage nogo nggoorogo at oba punuk, leenogo mippu o.

²¹ Mippege keenok, it Iterali mendek abok aret at Yotuwa nen, Wundi nanip o, yorage keenok, wundi nogwe, ndi, Unggwi wa'nip o, yorage keenok, unggwi wogwe, eeko logowak nduk, an mbake ineenu agak yugum Urim Naliku ALA nenggaanom paga wonage nogo, aap an neebe unde Eleyatat nen at Yotuwa eeke logorak yugum Urim nen awone yoruwak nduk, at Yotuwa nogo owagam taati puk a nawak o.”

²² Yoge mbareegi, at Muta nen Aliku ALA yoreegerak nogo ndak-ndak aret eeriyak nduk, Yotuwa nogo wonok it aap Iterali wonogwe abok aret inom, aap Ala unde Eleyatat inom, inowagam mippi nage nagagerik, Aliku ALA nen, Yogop eeru o, yereegerak nogo ndak-ndak eenggi Yotuwa anobak paga tebenogo punuk, mippereegerak.