Read Western Dani Linggineegwaarak 28 Bible Online

Linggineegwaarak 28 - Western Dani bible

Linggineegwaarak 28

²“Ndogop eeko logonip o, yinuk, it Iterali yoroorak nogo yi aret o. Obari abe kage logonet, nale'nggen kaakit nduk, nake pi wa'nuk, kani kunggo logorak nogo ti, Ne ti paga pi wogo logorak, yugu nogo mugurok pi wogo logorak liippuwak nduk, yoret o.

³It yorage logonet, Naliku ALA nake pi woraanuk, kani kunggo logorak nogo yi aret. Ndomba awoologwe mbere ndarak kagak tahun ambit eerak inawinde-inobaande eerak lek kenok, o ne ambit weege paga nake warogo kani kunggak yuurak pi wogo logowak o.

⁴Ndomba nogo ambi kubondendok warogo pipuk eerogo pugwi, ndi, ore nogo kiyoma warogo pipuk eerogo pugwi, eeko logonet,

⁵gandum yigirik abu abe nake puurak 2 liter wakkagak toolak waganogo eyo tayitun anggen aambiranogo amburu 1 liter negen inom nenggelak-kenggelak eerogo pogo logowak o.

⁶Ti eeko logorak nogo ti, obari abe kage logonet, nale'nggen kaakit nduk, Naliku ALA nake pi woraanuk, warogo kani kunggo logorak o ne ambit weege paga nake eeko logorak puut Tinayi paga nen wone mamuniragagirak nogo ti aret.

⁷Ndomba inalitak nake warogo kani kunggo logonet, nake amburu kilirogo puurak ti, ineengge ndak-ndak anggur amburu kumili aganaka nogo mendek waganogo nawooliya wurik alik leenak nogome Naliku ALA nake kilirogo puwak o.

⁸O kubondendok ndomba warogo kani kunggo logonet, gandum yigirik nake pugwi, anggur amburu nake kilirogo pugwi, eekwi nogo ndak-ndak, ndomba ore nogo, o kiyoma warogo kani kunggo logonet, ti mendek inom togop aret pogo logowak o. Obari abe kage logonet, nale'nggen kaakit nduk, nake warogo kani kunggo logorak nogo ti aret, yegerak, yoret o,” yinuk, yoreegerak.

⁹Yoge nagagerik, ambi yoge logonet, “Nogo 6 yippunuk, ko'lu tat yonggonggologwe paga ndomba awoologwe mbere ndarak kagak tahun ambiret eerak inawinde-inobaande eerak lek kenok, nake pi wogo logonet, amburu nake kilirogo puurak inom, gandum yigirik abu abe 4 liter wakkagak toolak waganogo eyo tayitun amburu paga amok mbanak inom, wonok pi wogo logowak o.

¹⁰Nogo 6 yippunuk ko'lu paga nake warogo kani kunggak eeko logorak ti aret o. Ti pi wogo logorak ti, o ne ambit weege paga ko'lu-kii'me nake warogo kani kunggwi, amburu nake kilirogo pugwi, eeruwak nduk, pi wogo menggaarak nogo ti, mbo puurak lek inom aret pi wogo logowak, yegerak yoret o,” yinuk, yoreegerak.

¹¹Yoge nagagerik, ambi yoge logonet, “Tut ngget penengge kenok, tanggal 1 paga it nen tapi ngguunok awoologwe mbere inom, ndomba ngguunok ambiret inom, ndomba ngguunok awoologwe ineebe 7 ndarak kagak tahun ambit eerak inom, it abok inawinde-inobaande eerak lek kero, wonok warogo kani kunggo logorak Naliku ALA nake pi wogo logowak o.

¹²Tapi ngguunok nake pi wogo logonet, ineengge ndak-ndak gandum yigirik abu abe nake puurak 6 liter negen wakkagak toolak waganogo, eyo tayitun amburu inom amok mbanogo punuk, pi wogwe, ndomba ngguunok nake pi wogo logonet, gandum yigirik abu abe nake puurak 4 liter negen wakkagak toolak waganogo, tayitun amburu inom nenggelak-kenggelak eerogo punuk, pi wogwe,

¹³ndi, ndomba ngguunok awoologwe nogo nake pi wogo logonet, ineengge ndak-ndak gandum yigirak abu abe nake puurak 2 liter wakkagak toolak waganogo, tayitun amburu inom nenggelak-kenggelak eerogo punuk, pi wogwe, eeko logowak o. Ti eeko logorak nogo ti, nake pugu kani kunggo logonet, obari abe Naliku ALA kage logonet, nale'nggen mbarikit nduk, nake warogo kani kunggo logorak nogo ti aret.

¹⁴Tapi ngguunok inalitak warogo nake wo'nogo logonet, ineengge ndak-ndak nake kilirogo puurak anggur amburu 2 liter toolak negen inom pi wogwe, ndomba ambiret nogo nake warogo wo'nogo logonet, nake kilirogo puurak anggur amburu 1 liter toolak negen inom pi wogwe, ndomba awoologwe nake warogo wo'nogo logonet, ineengge ndak-ndak nake kilirogo puurak anggur amburu liter oolo negen toolak inom pi wogwe, eeko logowak o. Tahun ambi eekak paga tut ngget penengge kenok, nake warogo kani kunggo logonet, eekak yuurak nogo ti aret o.

¹⁵Nake warogo kani kunggo logonet, amburu nake kilirogo puurak inom pi wogwe ti, pi wogo logorak aret kwe, eeko logonet, inomaluk lek eerogo piyoorak ake kambin ngguunok ambiret Naliku ALA nake pi wogo logowak, yegerak, yoret o,” yinuk, yoreegerak.

¹⁶ Yoge nagagerik, ambi yoge logonet, “Tut aa'nduk penenak tanggal 14 tut ti paga aret Naliku ALA nen Obagambo Nagagirak nogo abeko logonet, laago nggwok lako logowak o.

¹⁷ Ndi, ko'lu tanggal 15 tut ti paga mban inale'nggen nen laago nggwok lako logorak aret me, oroti piike mendek inom pega'lek kagak, worarogo nenet nogwe iigak, ne 7 kuli aret ari nawak o.

¹⁸Lako logonet, ne iyaalok togon yabu nggwok eeka'lek kuwak eeppunuk, nalut eeko logowak o.

¹⁹Nalut eeko logonet, Naliku ALA nake warogo kani kuniyak mendek pi wogo logowak o. Nake warogo kani kuniyak pi woroorak nogo ti, tapi ngguunok awoologwe mbere inom, ndomba ngguunok ambiret inom, ndomba ngguunok awoologwe ineebe 7 ndarak iigak tahun ambiret eerak inom, it abok aret inawinde-inobaande eerak lek kenok pi wogo logowak o.

²⁰Tapi ngguunok inalitak nake pi wogo logonet, ineengge ndak-ndak gandum yigirik abu abe nake puurak 6 liter negen wakkagak toolak waganogo, tayitun amburu inom nenggelak-kenggelak eerogo punuk, pi wogwe, ndomba ngguunok nake pi wogo logonet, gandum yigirik abu abe nake puurak 4 liter negen wakkagak toolak waganogo, tayitun amburu inom nenggelak-kenggelak eerogo punuk, pi wogwe,

²¹ndi, ndomba ngguunok awoologwe ineebe 7 nogo nake pi wogo logonet, ineengge ndak-ndak gandum yigirik abu abe nake puurak 2 liter negen wakkagak toolak waganogo, tayitun amburu inom nenggelak-kenggelak eerogo punuk, pi wogwe, eeko logowak o.

²²Ti pi wogo logonet, inomaluk lek eerogo punuk, ninom lambunik logokit nduk kambin ngguunok ambiret nake pi wogo logowak o.

²³Ti pi wogo logonet, o ne ambit weege paga ko'lu-kii'me kubondendok nake warogo kani kunggo menggaarak nogo ti, mbo puurak lek, inom aret eeko logowak o.

²⁴Ti eeko logonet, obari abe kenok, Naliku ALA nale'nggen kaakit nduk, ne iyaalok nen nok, ne 7 kuli ko'lu-kii'me nake pi woraanuk, kani kunggo logorak nogo ti, togop aret eerogo punuk, pi wogo logowak o. Ti eeko logorak ti, nake warogo kani kunggo logorak mendek pi wogo logonet, amburu nake kilirogo puurak inom pi wogo logorak nogo ti, mbo puurak lek inom aret eerogo punuk, pi wogo logowak o.

²⁵Nogo 6 yippunuk, ko'lu paga perak, yabu eeka'lek kuwak eeppunuk, nalut eeko logowak, yegerak, yoret o,” yinuk, yoreegerak.

²⁶ Yoge nagagerik, ambi yoge logonet, “Tamban 7 eeppunuk, laago endage Anggen Iyaalok Mbanggwi paga lako logonet, gandum anggen iyaalok ambi mbanogo nake pi wogwe ne ti paga yabu nggwok eeka'lek kuwak eeppunuk nalut eeko logowak o.

²⁷Ne ti eyom paga obari abe kage logonet, Naliku ALA nale'nggen kaakit nduk, nake kani kunggo logorak tapi ngguunok awoologwe mbere inom, ndomba ngguunok ambiret inom, ndomba ngguunok awoologwe ineebe 7 tahun ambiret eerak inom, pi wogo logowak o.

²⁸Tapi ngguunok nake pi wogo logonet, ineengge ndak-ndak gandum yigirik abu abe nake puurak 6 liter negen wakkagak toolak waganogo, tayitun amburu inom amok mbanogo punuk, pi wogwe, ndomba ngguunok nake pi wogo logonet, gandum yigirik abu abe nake puurak 4 liter negen wakkagak toolak waganogo tayitun amburu inom amok mbanogo punuk, pi wogwe,

²⁹ndi, ndomba awoologwe ineebe 7 nogo ambitak mban nake pi wogo logonet, ineengge ndak-ndak gandum yigirik abu abe nake puurak 2 liter wakkagak toolak waganogo, tayitun amburu inom amok mbanogo punuk, pi wogwe, eeko logowak o.

³⁰Pi wogo logonet, inomaluk lek eerogo punuk, ninom lambunik logorak ake kambin ngguunok ambiret pi wogo logowak o.

³¹Alitik-alitak pi wogo logorak nogo ti, amburu nake kilirogo puurak nogo inom aret pi wogo logowak o. Ti pi wogo logorak ti, ko'lu-kii'me nake warogo kani kuniyak mendek pi wogo logonet, gandum yigirik nake pi wogo logorak nogo ti, mbo puurak lek ti inom aret eeko logowak o. Eeko logonet, tapi-ndomba inawinde-inobaande eerak lek kenok mban wonok pi wogo logowak, yegerak, yoret o,” yinuk, yoreegerak.