Read Western Dani Linggineegwaarak 31 Bible Online

Linggineegwaarak 31 - Western Dani bible

Linggineegwaarak 31

²“Aakumi o Miriyan mendek nen it Iterali eeppiigo nogogwaarak onggo it Iterali nen eeppiyaawak nduk, yoret o. Yoramenggendak eeppiigwi iinok, kombomini nggwogoba nogogwaarak kuwak aago wonogwe me, time iya namunggun o.”

³Yoge mbareegi, at Muta nen it aakumi yorage logonet, “It Miriyan mendek nen kit eeppinagago nogogwaarak nogo, Aliku ALA nen onggo eeppiyoorak mbake me, it ti, inom wim eeri noorak kinawuri lombok ineegin-inomaale li'luk eekkolaawak nduk, yoret o.

⁴Kit Iterali mendek kinanebunu ndegek lombok kinalitak ineebe seribu leenogo piinok, wim eeri nawak nduk, nappiyaanip o.”

⁵Yoragagerak nogo yorogo mbareegwa, Iterali inanebunu lombok aap ineebe seribu lombok eerogo punuk, lambuk togon ineebe dua belas ribu aret wim eeriyak li'luk eerogo piyareegwaarak.

⁶Pipuk eeppunuk, inanebunu inawuri lombok eerak ineebe seribu nogo inom, aap Ala unde Eleyatat aput Pinekat inom, nappiige mbareegi, nawok nduk, aap Pinekat nogo nen Ala alut eeko menggam eekak yi mendek ndi mendek inom, wim wogwe ineenu aruwak nduk oone nggwok eeka trompet inom, woppunuk, inom aret wonok nagagerak.

⁷Aliku ALA nen wone lengganogo Muta yoreegerak nogo ndak-ndak, aakumi o Miriyan mendek inom wim perenggologo logonet, aap abok aret inoorogo piyareegwaarak.

⁸Aap inooreegwaarak kambeegwaarak ando nogo ti, aap inendagembogut Miriyan mendek Ewi inom, Erekem inom, Tut inom, Kut inom, Ereba inom, ineebe 5 ti inoorogo piigwi, aap Mbeyot aput Mbileyam inom wooluwak paga warogo pugwi, eereegwaarak.

⁹Inoorogo piigo nogogwaarik, it Iterali mendek nen it Miriyan mendek kumi inom, inaagalogwe inom, inaanggumi lembu-tapi inom, kambin-ndomba inom, inamindik-inamendek abok aret kugun waganggo nogogwaarik,

¹⁰it wonogo menggam inawi kota-kota inom, inawooliya wuppunuk menggam inom, abok aret kani mbilak-mbalak eerogo piyareegwaarak.

¹¹Eerogo piigo nogogwaarik, inagugun waganeegwaarak yi mendek ndi mendek inom, aakumi inom, inaanggumi inom, abok aret waganggo nogogwaarik,

¹²kugun wogonabeegwaarak aakumi inom, inamindik-inamendek inom, abok aret aap Muta inom, aap Ala unde Eleyatat inom, it Iterali o Mowap kobappaga o Yeriko wunggagak niyo Yoraran aa'nggi paga inawooliya wuppunuk wonogwe me, time piya wogogwaarak.

¹³Piya wogwe me, at Muta inom, aap Ala unde Eleyatat inom, aakumi Iterali inarum menggaarak inoweewi inom, nen it wogwe nogo wogoren woraawok nduk, inawooliya wurik me nen endekem wundi nogogwaarak.

¹⁴Wundi nogo nogogwaarik, it ineegin warak inoweewi aap ineebe seribu eerak inoweewi inom, aap ineebe 100 eerak inoweewi inom, wim eeppunuk wogwe nogo Muta nen mberiragagerak.

¹⁵Mberirage logonet, “Kit nonggop nduk kumi yi, ineenik wogoren wogop?

¹⁶ Aap Mbileyam yoragagerak mugurok nogo logonet, o Peyot time it Iterali mendek nen Aliku ALA mbo punuk, alik mendek eeruwak nduk, eeppiigo mbareegwa, Aliku ALA anini nen kugilengga at apuri inoba kwippiyareegerak alom nogo ti, it kumi yi mendek nen aret eereegwaarak nogo lek a?

¹⁷Eeppiyareegwaarak it kumi yi aret me, inaagalogwe wologwe inom, kumi aap inom lambungga inom, abok aret inoorogo piyaanip o.

¹⁸Ndi, kumi aap kigin wogonaka'lek tawe wonogwe iinok perak, kit kolaamunggup nduk, ineenik teppiyaanip o.

¹⁹Ndi, kit yi perak, aap ambi inoorogo piigwi, aap inoorak kanggaarak mbaaniigwi, eekotak kenok, kinawooliya wurogo patinuk monggo'nom time unggwi naga'lek endekem yime kiigak nogo 7 yumunggup o. Endekem wonogwe kiigak, nogo mbere yinuk, ko'lu nogo 3 paga inom, nogo 6 yippunuk, ko'lu nogo 7 paga inom, kit inom, aap keele maageren wogotak inom, kinoba lu nabek yegerak nogo lek aruwak nduk, kinabin kookkologwe,

²⁰kinayum inom, yi mendek ndi mendek inagabolo paga eerak inom, kambin eeruwak paga eerak inom, eyo paga ogobakkigirik inom, abok aret mili agaarak kero, eyoongga nggoorogo nappugwi, eeko logomunggup o,” yinuk, yoragagerak.

²¹Yorage mbareegi, at Ala unde Eleyatat nen it aap wim eeka wim eeppunuk iniyokan wogogwaarak nogo, yorage logonet, “Eeko logorak Aliku ALA nen Muta wone lengganogo yoreegerak nogo yi aret.

²²Mbuti emas inom, mbuti perak inom, mbuti tembaga inom, mbuti owak inom, mbuti timah yanggwi inom, mbuti timah mili inom,

²³yi mendek ndi mendek kani nengga'lek miinogo pege menggerak ti mendek abok aret kani worakwi ti paga mili oba lenggenak nogo lek arigin o. Kani paga worako logomenggaarik, miinogo pege kenok, niyo paga kooruwak o. Yi mendek ndi mendek kani nengge kenok perak, niyo paga mban kooruwak o.

²⁴Nogo 6 yippunuk, ko'lu paga kinayum koorogo pakwi kiinok, kinoba mbeennaremenggerak me, kinawooliya wurik me unggwi woroorak op aret o,” yinuk, yoragagerak.

²⁵Aliku ALA nen Muta yoge logonet,

²⁶“Kat inom, aap Ala unde Eleyatat inom, it Iterali mendek ndarak ndegek inoweewi inom, nen kugun wogoren wagaarak aakumi inom, wam inom, abok aret ineebe kineenggi lingginogo piigo logomonggotik,

²⁷kugun wogo ti, mogonogo ando it ineegin warak aago wim eeri nagaarak nogo tumburirogwe, ndi, ando nogo it Iterali mendek tumburirogwe, ee'nip o.

²⁸Eeko logomonggotik, it ineegin warak aago wim eeri nagaarak nogo tumburirogo logonet, aakumi a, lembu-tapi a, keledai a, kambin-ndomba a, lima ratus wogorumonggotak nogo ambi yendenogo Naliku ALA nake leenogo pegak eeko logonip o.

²⁹Nake leenogo puurak nogo ti, it aap wim eeri nagaarak kugun wogo ando mogonogo it tumburiroorak nogo, waganggo logomonggotik, Yi Aliku ALA amendek o, yinuk, wonok aap Ala unde Eleyatat nogo wogori wogwe,

³⁰ndi, ando mogonak it Iterali tumburirogo logonet, aakumi a, lembu-tapi a, keledai a, kambin-ndomba a, wam alik mendek a, 50 wogoroorak nogo, ambi yendenogo Naliku ALA nawooliya wurik unde wonogwe it aap Lewi nogo, wogori wogwe, eeko logonip o.”

³¹Yoge mbareegi, at Muta inom, aap Ala unde Eleyatat inom, nen Aliku ALA nen Muta yoreegerak nogo ndak-ndak aret eereegwaarak.

³²It aap wim eeka nen kugun waganggo logonet, ando wonok wogogwaarak yi mendek ndi mendek ineenggi lingginik kambin-ndomba ti, enam ratus tujuh puluh lima ribu,

³³lembu-tapi ti, tujuh puluh dua ribu,

³⁴keledai ti, enam puluh satu ribu,

³⁵ndi, it kumi aap inom lambungga'lek awo tawe ti, tiga puluh dua ribu, aret o.

³⁶Kugun wonok wogogwaarak ando mogonak it aap wim eerit nogogwaarak wogorogogwaarak ineenggi lingginik kambin-ndomba ti, Tiga ratus tiga puluh tujuh ribu lima ratus aret me,

³⁷enam ratus tujuh puluh lima aret yendenogo, “Aliku ALA amendek o,” yinuk, leenogo pugwi,

³⁸Lembu-tapi ti, tiga puluh enam ribu aret me, 72 aret yendenogo, “Aliku ALA amendek o,” yinuk, leenogo pugwi,

³⁹Ndi, keledai ti, tiga puluh ribu lima ratus aret me, 61 aret yendenogo, “Aliku ALA amendek o,” yinuk, leenogo pugwi,

⁴⁰Ndi, aakumi ti, enam belas ribu aret me, 32 aret yendenogo, “Aliku ALA amendek o,” yinuk, leenogo pugwi, eereegwaarak.

⁴¹Aliku ALA nen at Muta yoreegerak ndak-ndak Aliku ALA mendek ti, aap Ala unde Eleyatat aret wogoreegerak.

⁴²Ndi, it aap wim eeri nogogwaarak kugun wonok wogogwaarak ando it Iterali wogoroorak Muta nen mogonogo pereegerak

⁴³aakumi inamendek ineenggi lingginik kambin-ndomba ti, tiga ratus tiga puluh tujuh ribu lima ratus aret.

⁴⁴Lembu-tapi ti, tiga puluh enam ribu aret.

⁴⁵Keledai ti, tiga puluh ribu lima ratus aret.

⁴⁶Ndi, aakumi ti, enam belas ribu aret.

⁴⁷It aakumi Iterali kugun wogo ando mogonak nogo wogorogo logonet, Aliku ALA nen at Muta yoreegerak ndak-ndak aap inom, wam inom, 50 wogoragagerak nogo ambi yendenogo aap Lewi mendek Aliku ALA awooliya wurik me unde logonet yabu eeka nogo wogoragagerak.

⁴⁸Wogorage mbareegi, it aap ineegin warak inoweewi aap ineebe seribu lombok eerak inoweewi inom, ineebe 100 eerak inoweewi inom, nogo nen Muta owagam wogo nogogwaarik,

⁴⁹at yogo logonet, “It aap ineegin warak yi, nit kayeloman mini ninabu'me menggaarak ineebe nit nineenggi linggininako nogoorik, ambit iluk ambi kobak arulik enaani aret wonogwe me,

⁵⁰ninomaluk lek eerogo punuk, Aliku ALA ninom lambunik logonet, nineebe ninili aago logowok nduk, ninalitak lombok mbuti emas paga ogobakkigirik kugun waganggoorak iniyok mberaarenggen inom, ineenggi mberaarenggen inom, ineenggi oolo paga mberaarenggen paga cap aago inom, inaruk ayo inom, iinggen inenggaanok me yika inom, abok aret Aliku ALA ake pi wogo o.”

⁵¹Yogo mbareegwa, at Muta Ala unde Eleyatat imbirak nen, “Op aret,” mba'nuk, yi mendek ndi mendek mbuti emas paga ineenggi amburu paga ogobakkigirik nogo abok aret waganeegwaarak.

⁵²It aap ineegin warak ineebe seribu eerak inoweewi inom, ineebe 100 eerak inoweewi inom, nen mbuti emas paga ogobakkigirik abok aret Muta Eleyatat imbirak wogorogo mbareegwa, Aliku ALA wogoreegwaarak wakkogogwaarak aaninggin ti, seratus sembilan puluh aret agagerak.

⁵³It ineegin warak nen inalitik-inalitak kugun kologogwaarak me,

⁵⁴it aap ineebe seribu eerak inoweewi inom, ineebe 100 eerak inoweewi inom, nen mbuti emas pi wogogwaarak nogo Muta aap Ala unde Eleyatat imbirak wogorogogwaarak waganggo nogogwaarik, “Aliku ALA nen nit at apuri Iterali mendek ninoba abe'ninake logowak o,” yinuk, Aliku ALA inom lambungge menggim awooliya wurik me time pi unggwogogwaarak.