Read Western Dani Linggineegwaarak 32 Bible Online

Linggineegwaarak 32 - Western Dani bible

Linggineegwaarak 32

¹It inanebunu Uruben mendek inom, Nggat mendek inom, it inaanggumi ambik me, o Yayetet inom, Nggileyat inom, nggween time inaanggumi iri'ngga mbanogo nenet nugu logorak obeelom mban wonage inigen kogo nogogwaarik,

²Muta inom, aap Ala unde Eleyatat inom, it aap inoweewi inarum menggaarak inom, wonogwe me inowagam wogo nogogwaarik, yorogo logonet,

³“Nggween o Atarot inom, Ndibon inom, Yayetet inom, Nimara inom, Ketibon inom, Eleyale inom, Tebam inom, Nebo inom, Mbeyon inom,

⁴o time abok aret at Aliku ALA nen nit Iterali ninake ninawim tebenogo piyareegerak me, nit kayeloman mini ninaanggumi ambik yi, nggween abu obeelom lombok time logorak op me,

⁵niyo Yoraran ene paga time, Wunda nanip o, yo'niroorak ti mage o. Ata, ninabuwa nen nggween yime aret nit kayeloman mini unde logowok nduk, wo'niret o.”

⁶Yogo mbareegwa, at Muta nen it Nggat mendek inom, Uruben mendek inom, yorage logonet, “Kit kinoreewi o time wim eeriyak nduk wunda nogwe iigak, kit yime logorak mba'nuk, yogop ya!

⁷At Aliku ALA nen aakumi Iterali o niyo Yoraran ene paga inanggween wogoragagim nogome wunda nawak lak, nonggop nduk iniki aaninggin eerogo piigo ogotik?

⁸ Kit yogwe ti ndak-ndak kit kinombomini maan o Kareti-Mbareneya time logonet, O time, kinigen yombooni nanip o, yinuk, yorage mbareegi,

⁹wogo nogogwaarik, o Etokon kobappaga inigen yomboonit nanuk, iniyokan nogo nogogwaarik, at Aliku ALA nen inanggween wogoragagim yime unde eekkola worookwak, oreewi inikime wone yagabit tibik-tobok eerogo piigo mbareegwa,

¹⁰ ne ti eyom paga at Aliku ALA anini mi'nage logonet, It o Metit nen wogoren wundi wagarak aap ndarak iigak tahun 20 nen agi nggwe eerit nagaarak nogo, noone konembunuk, liirogon aret eeka'lek iinok, an nen aap Abarakam inom, Itak inom, Yakup inom, Nggween wokkiraagin o, yinuk, kumbuk mbanogo yoragagim nogome it aap yi, ambiriluk ambi inigen kaagun mondok lek o.

¹¹

¹²Ata, it aap ineebe mbere Yepune aput Kalep anebunu Kenat mendek inom, Nun aput Yotuwa inom, noone konembunuk, iniki yungguppegak yuulik, abu nggaruk togon aret eereegwaarak me, it imbirak mban unggwi nagun o, yorage nagagerik,

¹³Aliku ALA anini ka'luk aagi negen Iterali inoba piinok, mbo piige mbareegi, o karume yagak-ndagak nugwi iigak, tahun 40 eeko logonet, it inom ndak-ndak ndarak abok aret Aliku ALA enggaanom paga maluk eereegwaarak nogo karume time kambit nawak nduk, eeppiyareegerak.

¹⁴Togop me, kit yi, kinombomini maan maluk eeka awi mbilanak kit aret me, it aakumi maluk eeko menggaarak kinom a'nuk, eekwi paga it aakumi Iterali mendek Aliku ALA anini kani kunik negen ambinom nggwik togon inoba piyaawak mba'nuk yogwe kiigi o.

¹⁵At Aliku ALA kit kinambo'me muunogo mbo pugwi kiinok, it aakumi Iterali mendek o karume kambit nawak nduk, mbo piyareegerak nogo kokwak, ambinom mbo piige kenok ti, alom kit paga aret lek eerogo piyaamunggup kiigi o.”

¹⁶Togop yoragagerak kwe, it Uruben mendek inom, Nggat mendek inom, nogo nen Muta owagam ari nanuk wone ambinom yogo logonet, “Nit ninaanggumi kambin-ndomba inanggenogo yagat wukwi, ndi, ninapuri inom, ninakuwi inom, inake o nambit-mbit wurogo piigwi, eerogo piinok,

¹⁷nit nineegin-ninomaale li'luk eekko'nok ninaa'nduk a'nuk, ninoreewi ando logowam piya wundogwe niigak, it aakumi yime mendek nen ninakuwi inom, ninapuri inom, maluk eerogo piyookwak, inawi owa'nagat inom wuppiinok, nawok nduk, yokkogo.

¹⁸E, yo'nirage keenok, it Iterali mendek ineyate koloorak yugu nogo it ambiriluk ambi kolaga'lek iigak, teppiinok, nit niname yime niyokan wunda woraagun lek o.

¹⁹Nit ninanggween yate niyo Yoraran oonegen lagi wage menggim yibagan yime aret unde arugun me, ninoreewi wogoren wunda nogo logomonggoorik, it inanggween yate niyo Yoraran enebagan nit ambi kolaagun lek o.”

²⁰Yogo mbareegwa, at Muta nen it yorage logonet, “Kit eeriyak yogotak nogo Aliku ALA enggaanom paga wim eerubagip nduk, kineegin-kinomaale mondok li'luk eekko'nok

²¹kit aap apit aret wim eeriyak nduk, kineegin-kinomaale nogo ko'nok Aliku ALA enggaanom paga niyo Yoraran enebagan wunda nogo logomonggotik, Ala awim kinom eekwi kiigak, Aliku ALA nen aakumi ti apit aret inom logorak eebi nen mugogo wumbiyaagin o.

²²Ndi, Aliku ALA enggaanom paga o ti, abu tebenggologo logomonggotik, Ninoreewi Iterali eeppiyoorak Aliku ALA enggaanom paga yogoorak nogo abu aret eeko, yinuk, kiniki tayenak kiniyokan yime wunda wogo logomonggotik, Aliku ALA enggaanom paga nggween yi unde eekkolaamunggup o.

²³Ndi, wone yogotak nogo ndak-ndak eerumunggup lek kenok perak, Aliku ALA aret maluk eeppumunggup me, Kinomaluk nen eyak nibingginabi woraagin, abet aret mbako logomunggup o.

²⁴Togop aret me, kit nen eeriyak yo'nogotak nogo, ndak-ndak aret kinaaganapuri logorak inake o nambit-mbit wurogo piigwi, kinaanggumi kambin-ndomba logorak inake anggenogo wukwi, eeko logonip o.”

²⁵Yorage mbareegi, it aap Nggat mendek inom, Uruben mendek inom, it nen Muta yogo logonet, “Ninogoba o! Nit kat kayeloman mini yi, yo'niragandak nogo ndak-ndak aret

²⁶nit ninapurilogwe inom, ninakuwi inom, ninaanggumi kambin-ndomba inom, lembu-tapi inom, o kota-kota Nggileyat yime aret wonogwe iigak,

²⁷nit kayeloman mini aap mban kat ninogoba nen yo'niragandak nogo ndak-ndak, wim eeriyak nduk nineegin ko'nok niyo Yoraran enebagan wunda nanuk, Aliku ALA enggaanom paga wim eeri nawok aret o,” yinuk, yoreegwaarak.

²⁸ Yogo mbareegwa, at Muta nen it aap Ala unde Eleyatat inom, Nun aput Yotuwa inom, it Iterali mendek inoweewi nogo inom, it eeppiyoorak wone yorage logonet,

²⁹“It aap Uruben mendek inom, Nggat mendek inom, abok aret wim eeriyak nduk, ineegin-inomaale li'luk ee'nuk, kit kinom niyo Yoraran enebagan wunda nogo logomonggotik, Aliku ALA enggaanom paga wim eeko logonet, o ti tebenggologo logomonggotik, nggween Nggileyat yime it Uruben inom, Nggat inom, unde aruwak nduk wogoraamunggup o.

³⁰Ndi, it kinom niyo Yoraran enebagan time wim eeri nogwe lek iinok perak, nggween kit kineyate koloorak o Kanan wonage nogo it unde aruwak nduk eegu wogoraamunggup o.”

³¹Yorage mbareegi, it Uruben mendek inom, Nggat mendek inom, nogo nen onggo yogo logonet, “At Aliku ALA nen wone yokkegerak yo'niragandak ti, nit kayeloman mini ndak-ndak aret

³²nineegin-ninomaale ko'nok Ala enggaanom paga o Kanan time nagun aret kwe, ninanggween nineyate koloorak nogo perak, niyo Yoraran yibagan yime aret unde eekkolaagun o,” yinuk, yoreegwaarak.

³³Yogo mbareegwa, at Muta nen it aakumi Amori mendek inowe endagembogut Tikon arum menggim inom, it aakumi Mbatan inowe endagembogut Ok arum menggim inom, abok aret o kota-kota nggween ilin-ilin time inom, apit aret it Nggat mendek inom, Uruben mendek inom, inanebunu Yutup ombowologwe wiganak Manate eegu mogonak nogo inom, it aret unde aruwak nduk wogoragagerak.

³⁴Ndi, it inanebunu Nggat mendek nogo o kota Ndibon inom, Atarot inom, Arowet inom,

³⁵Atarot-Topan inom, Yayetet inom, Yogebeka inom,

³⁶Mbet-Nimara inom, Mbet-Karan inom, nogome o inom, yugum pak inom, wurogo punuk, inaanggumi kambin-ndomba logowak nduk, inanggenogo wurogo piigwi,

³⁷ndi, it inanebunu Uruben mendek nogo ti, o Ketibon inom, Eleyale inom, Kiriyatayim inom,

³⁸Tebam inom, nogome wurogo piigwi, eereegwaarak. Ndi, o obaane'me mbere wurogo punuk, endage alik tooneegwaarak nogo ti, Nebo Mba'an-Meyon imbirak aret. O wurogo pereegwaarak ti, endage alitak toonogo pereegwaarak.

³⁹Ndi, at Manate aput Makit apuri wiganak mendek nogo nen o Nggileyat unggwi nogo nogogwaarik, aakumi Amori mendek nogo mugogo wumbiigo mbareegwa,

⁴⁰at Muta nen Manate ombowologwe wiganak aakumi Makit mendek nogo o Nggileyat time wogorage mbareegi, it o time aret ye mbambatinuk wonogogwaarak.

⁴¹Ndi, Manate ombooluk wiganak mendek endage Yayit nogo o ilin-ilin inawi wurik wonogwe me, unggwi nanuk, tebenggolage nagagerik, o nogo endage Kawot-Yayit toonogo pege,

⁴²ndi, at Noba nogo o Kenat inom, o ilin-ilin inawi wurik wonogwe me inom, tebenggolage nagagerik, o ti, at endage toonak ndak-ndak endage Noba aret toonogo pege, eereegerak.