Read Western Dani Linggineegwaarak 34 Bible Online

Linggineegwaarak 34 - Western Dani bible

Linggineegwaarak 34

¹At Aliku ALA nen Muta yoge logonet,

²“It Iterali wone yorage logonet, yoroorak nogo yi aret o. It o Kanan unggwi nogo logomenggaarik, yate kwak inanggween wogoroorak kuli logorak nogo yi aret o.

³Inanggween ogu o ame pa'nggwe kuli logorak nogo ti, o Karume Tin nen it aakumi Erom mendek inanggween kuli paga aret logogin o. Ndi, o ame pa'nggwe kuli logorak nogo ti, oonegen lagi wage menggim pa'nggwe niyo Mayu Ogop wonage me, panggombunuk,

⁴ena yomonogo o ame pa'nggwe o Tin nogo menggam puut aanenggen endage Nggitamuru ari nanuk, nok, o ame pa'nggwe ogu irip lombok ti, o Kareti-Mbareneya ari wambunuk, ti'nuk, o Katat-Arat ari nage, o Atomon ari nage, eerak logowak o.

⁵O Atomon kuli ari nanuk, yomonogo niyo mbuuluk endage Metit nage nogo mugurok nanuk, irip niyo nggwok yenggenak Laut Tengah warak logowak o.

⁶Ndi, oonegen kilu yi nage menggim pa'nggwe inanggween kuli logorak nogo ti, niyo nggwok yenggenak Laut Tengah ambe mbaneegerak ti aret.

⁷O omarip paga pa'nggwe inanggween kuli logorak nogo ti, irip niyo nggwok yenggenak Laut Tengah panggombunuk, nok, oonegen lagi wage menggim pa'nggwe Puut Kot nen nok,

⁸o Kamat ari nage, time nen o Terat ari nage,

⁹time nen o Tiporon ari nage, ndi, time nen irip o Katat-Enan ari nage, eerak logowak o. Inanggween o omarip paga pa'nggwe kuli pugu logorak nogo ti aret.

¹⁰Oonegen lagi wage menggim pa'nggwe inanggween kuli pugu logorak nogo ti, o Katat-Enan panggombunuk, ogu o ame pa'nggwe o Tepam nen nok,

¹¹o Ayin oonegen lagi wage menggim pa'nggwe o Iribala nen nok, niyo yenggenak Nggalileya oonegen lagi wage menggim pa'nggwe kagak, puut elan me ogu

¹²niyo Yoraran ndirok ogu niyo Mayu Ogop yenggenak kuli aret logowak o. Inanggween yendok-wandok kuli pugu logorak nogo ti aret, yegerak, yoret o,” yinuk, yoreegerak.

¹³Yoge mbareegi, at Muta nen Iterali wone lengganogo yorage logonet, “Anebunu Uruben mendek ndarak ndegek lombok inom, anebunu Nggat mendek ndarak ndegek lombok inom, anebunu Manate ando mogonak inom, ti, yate kwak inanggween muk kolagaarak me, Aliku ALA nen, Inanebunu 9 inom, anebunu ambit ando mogonak nogo inom, nogo mban wogoroorak o, yinuk, an yo'negerak me, yate kwak nggween ambi mbanak ti, Anebunu ta mendek koloorak kaamun? yinuk, yugum paga wakkagak kologo logomunggup o.

¹⁵Inanebunu mbere inom, anebunu ambi ando mogonak inom, yate kwak inanggween o Yeriko koorok oonegen lagi wage menggim pa'nggwe niyo Yoraran aa'nggi yi paga muk kolagaarak nogo kenok, yagi o,” yoragagerak.

¹⁶Aliku ALA nen Muta yoge logonet,

¹⁷“It aap yate kwak inanggween tumburiroorak inendage ti, aap Ala unde Eleyatat inom, aap Nun aput Yotuwa inom, aret o.

¹⁸It Iterali inanebunu lombok inoweewi ambitak mban it mbere ti, inom nen yate kwak nggween tumburiraawak nduk, wogonabu o.

¹⁹Wogonaburak inendage yi aret o. Anebunu Yekura mendek ti, aap Yepune aput Kalep.

²⁰Anebunu Timeyon mendek ti, aap Amikut aput Tamuwen.

²¹Anebunu Mbeniyamin mendek ti, aap Kitolom aput Elirat.

²²Anebunu Ndan mendek inowe ti, aap Yogili aput Mbuki.

²³Anebunu Yutup aput Manate mendek inowe ti, aap Epot aput Kaniyen.

²⁴Anebunu Yutup aput Eparayim mendek inowe ti, aap Tipatan aput Kemuwen.

²⁵Anebunu Tebulon mendek inowe ti, aap Parana aput Elatapan.

²⁶Anebunu Itakat mendek inowe ti, aap Atan aput Palitiyen.

²⁷Anebunu Atet mendek inowe ti, aap Telomi aput Akikut.

²⁸Ndi, anebunu Natali mendek inowe ti, aap Amikut aput Perayen aret o,” yinuk, yoreegerak.

²⁹O Kanan it aakumi Iterali yate kwak inanggween tumburiroorak Aliku ALA nen leenogo piyareegerak nogo it aap ti aret o.