Read Western Dani Linggineegwaarak 35 Bible Online

Linggineegwaarak 35 - Western Dani bible

Linggineegwaarak 35

¹ Ndi at Muta nogo o Yeriko enebaga wungga wagak nggween Mowap kobappaga niyo Yoraran aa'nggi paga wonage me at Aliku ALA nen at yoge logonet,

²“It aakumi Iterali wone yoroorak nogo yi aret. It inanggween yate wogoragagim nogo, eegu it aap Lewi mendek inawi unde logowak nduk, o kota-kota wogorogwe, ndi, it inaanggumi logorak ake kunduk inanggween wogorogwe, eeruwak o.

³O kota-kota time it Lewi mendek wogoramenggaarak unde a'nuk logonet, inaanggumi kambin-ndomba inom, lembu-tapi inom, inaanggumi alik mendek inom, inagari'ngga nonggo logowak nduk, nggween time aret piinet nogo logogun o.

⁴Nggween o kota-kota yengget-wangget aago it aap Lewi mendek wogoramenggaarak inaanggumi piinet nogo logorak nogo ti, inawi kota pak wurik me nen nok endekem owa'ngga kuli metet empat ratus lima puluh wakkogwe,

⁵ndi, o kota mangga wagak irip endekem nggwe ambe aru-ogwe inom, irip agi-ogu inom, ti metet sembilan ratus wakkogwe, eeko logomenggaarik, inaanggumi piinet nugu logowak o. Ti eeriyak nogo ti, it aap Lewi mendek inawi kota-kota mangga wagak it inaanggumi piinet nugu logorak inanggween wogoroorak nogo ti aret, yegerak, yoret o,” yinuk, yoreegerak.

⁶Yoge nagagerik, ambi yoge logonet, “It Iterali mendek wone yoroorak nogo yi aret. It aap Lewi mendek inaanggumi logorak inanggween inom, it ineebe logorak inom, abok lambunik nogo ti, kota 48 aret wogoroorak me, it Lewi ando logorak ti, kota 42 leenogo pugwi, ndi, kota 6 ti, it Lewi ando wonogwe me, aap ambi nen aap ambi warogo punuk, agap ndakkolaawak nduk, kole time ari nage logowak nen leenogo pugwi, eeruwak o.

⁸It aakumi Iterali mendek inanggween wogoragagirak it Lewi mendek kota-kota wogoroorak nogo ti, it Iterali inawi kota-kota ambik wonogwe nogo nen inawi kota-kota ambik aret it Lewi wogorogwe, ndi, it Iterali inawi kota-kota mbuuluk wonogwe nogo nen inawi mbereeluk aret wogorogwe, eeruwak, yegerak, yoret o,” yinuk, yoreegerak.

⁹Yoge mbareegi, at Aliku ALA nen Muta ambinom yoge logonet,

¹⁰“It aakumi Iterali mendek wone yoroorak nogo yi aret. It niyo Yoraran wunda nanuk, o Kanan unggwi nogo logomenggaarik,

¹¹aap ambi nen wariyak mbaka'lek me, aap ambi wappege logomenggerik kenok, kole o inagap ndako logowam time aret unggwi nage logowak nduk, o kota aakumi inagap ndako logowam 6 leenogo puwak o.

¹²Leenogo pugwi iinok, aap ambi nen wariyak mbaka'lek me, perak togon wake kenok, wone nggwok paga awo owak loongga'lek kagak, aap warak ane'me aap eenggi amiya pemenggerak nogo wakwi iyo, kole o kota aakumi inagap ndako logowam time aret unggwi nage logowak o.

¹³Kota 6 leenogo puurak nogo ti, aakumi inagap ndaka ti aret me,

¹⁴kota 3 ti, niyo Yoraran enebagan leenogo pugwi, ndi, kota 3 ti, yibagan leenogo pugwi, eeremenggaarak paga, o ti aakumi inagap ndaka logogin o.

¹⁵O kota 6 leenogo pemenggam nogome ti, it Iterali inom, inoba nabenak mendek inom, it aap nggiru inom wonogwe nogo inom, it ambi eeke kenok unggwi nogo logorak inake leenogo puurak aret me, it ambi nen mbarulik me yinip-panip aap ambi wappunuk kenok, kole o aap inagap ndaka time aret unggwi nage logowak o.

¹⁶Togop kwe, aap ambi nen, Warikit, mba'nuk, mbuti mendek paga aap waremenggerak kangge kenok perak, at aap ti, aakumi inooka aret me, kambuwak nduk at aret warogo puwak o.

¹⁷Aap ambi nen, Warikit, mba'nuk, yugum eenggime wonage nogo paga aap ambi waremenggerak kangge kenok, at aap ti, aakumi inooka aret me, kambuwak nduk eebe warogo puwak o.

¹⁸Aap ambi nen, Warikit, mba'nuk, eyo eenggime wonage nogo paga aap ambi waremenggerak kangge kenok, at aap ti, aakumi inooka aret me, kambuwak nduk eebe warogo puwak o.

¹⁹Aap ane'me wariyak yugu nogo ti, at aap amiya eenggi paga eeremenggerak nogo imbirak lambungge kenok, onggo at aret waruwak o.

²⁰At aap ambi anini nen aap alik ambi pelenogo nappemenggerak kangge kenok a, Warikit, mba'nuk, yawi paga waremenggerak kangge kenok a,

²¹imbirak ogoorak me, eenggi lingginik paga waremenggerak aret kangge kenok a, aap ti, Aakumi inooka aret o, yinuk, warogo puurak aret me, aap waremenggerak nogo ane'me wariyak nduk eebe kwaarit nage logomenggerik, imbirak lambungge kenok, aap ti warogo puwak o.

²²Togop eeko logorak kwe, aap ambi ore nogo eebi mbaka'lek we ugun pelenogo nagake kenok a, Warikit, mbaka'lek kagak, yi mendek ndi mendek mbo nappemenggerak paga wake kenok a,

²³ata, enegen kaga'lek kagak, yinip-panip yugum oba wuppemenggerak paga kangge kenok a, at eebe maluk eerogo pikit mba'nuk, eeppege, ndi, Warikit, mba'nuk wake, eerulik me,

²⁴aakumi kuwak aago nogo nen aap waremenggerak inom, aap ane'me waremenggerak inom, wone yogop eeko logorak yugu yi, ndak-ndak aret inowak loonuwak o.

²⁵It aakumi kuwak aago nogo nen aap ane'me wakwi iyo, aap waremenggerak nogo awone amburu liirogon mbambunuk, eebe wariyak lek o aakumi inagap ndake logowam time aret ari nawak nduk nappuwak o. Aap Ala ake leenogo puwak nduk, amburu eeppunuk, mippugu Ala unde inowe nogo kangga'lek kagak, time aret logowak o.

²⁶Togop eeriyak kwe, aap wappunuk, kole o aakumi inagap ndako logowam unggwi namenggerak wonage me nogome nen endekem wundi wage kenok, it aap inawot warak mendek nogo nen kwaakkogo logomenggaarik, ane'me wakwi iinok, Nonggop nduk wakotak, yinuk, awone mbaniyak lek aret o.

²⁸Togop me, aap wappunuk, o aakumi inagap ndako logowam unggwi namenggerak nogo, aap Ala unde inowe nogo kangga'lek kagak, wundi noorak mage o. Ndi, kangge kenok perak, at aap ti, o aakumi inagap ndako logowam nen wundi wage logomenggerik, awi alom paga noorak op aret o.

²⁹It Iterali wonogo logonet, wone lengganak eeko logorak yi, inapuri-inombowologwe wigannarit nogo logogun nogo nen mondok-mondok aret eeko logowak o.

³⁰ Aap ambi nen aap alik ambi waremenggerak kangge kenok, aap mbere a, kenagan a, nogo nen, Aap yi aakumi inooka abet aret o, yinuk, yogwi iinok, warogo puurak op aret kwe, aap ambit nen mban ari kenok perak, warogo puurak mage o.

³¹Aap inooka nogo nen, An nooriyak lek o, yinuk, wu wogorage kenok, woorak mage o. Aakumi inooka kenok, inoorogo piigo logorak yugu me, at eebe aret warogo puurak o.

³²Ndi, aap ambi o inagap ndake logowam kole unggwi namenggerak wonage nogo nen aap Ala unde inowe nogo awo kangga'lek kagak, ame naakit nduk, wu wogorage kenok, it woorak mondok mage o.

³³Ndi, aap eenggi amiya kenok waremenggaarak ti, op aret kwe, aap ambi warulik kagak warugun kenok ti, inawi aret maluk eerogo patemenggaarak nogo lek aruwak nduk, nggami aanggo wakwi kwak wariyak lek me, o it wonogwe me time enete maluk eerogo puurak ti mage o.

³⁴Naliku ALA it aakumi Iterali inenggela'me aret wonage minggirak me, o it iname an wonage minggim time enete maluk eerogo puurak mondok mage, yegerak, yoret o,” yinuk, yoreegerak.