Read Western Dani Linggineegwaarak 4 Bible Online

Linggineegwaarak 4 - Western Dani bible

Linggineegwaarak 4

¹Aliku ALA nen Muta Karun imbirak yorage logonet,

²“It Lewi mendek eegu mogonak it Kekat mendek inanebunu inom, ndarak ndegek inom, ineebe kineenggi linggininakwi,

³ninom lambungge minggim nawooliya wurik me, yabu eekwi inom eeko logowok nduk wogwe nogo, ndarak iigak, tahun 30 eerak kuli nen nok, agi tahun 50 eerak kuli aap mban kineenggi linggininakwi, eeko logonip o.

⁴Ninom lambungge minggim nawooliya wurik me it aap Kekat mendek nen ineyabu eeko logorak ti, yi mendek ndi mendek abu alik leenak nogo ndegenggo logowak o.

⁵Kit kinawooliya minogo pit nanuk, ambime noorak age kenok, at Karun inom, apuri inom, nen nawooliya wurik me unggunuk, yum oolo tugunik nogo nggoorogo waganggo logomenggaarik, an noone yugu naloobut mbanak yonggolak nogo, obaga lenggenogo punuk,

⁶lumba-lumba agabolo ogombaga lenggenogo pugwi, yum maa'ngga tele eerak nogo ogombaga wunom mbiganogo pugwi, eerogo punuk, eyo eewu'nuk naga nogo nonggonogo puwak o.

⁷An neebe wonage me nduk, oroti nake pugwi eyo ndoonak nogo paga oroti wonage kagak yum maa'ngga amu kunik ndoonogo punuk, pirin-pirin inom, niyo kombet waka inom, togolowak amburu tookak inom, nake amburu kilirogo puurak togolowak inom, at paga eerogo punuk,

⁸yum maa'ngga anggup kunik obaga lenggenogo pugwi, ti'nuk, lumba-lumba agabolo ogombaga wunom lenggenogo pugwi, eerogo punuk, eyo eewu'nuk naga nogo nonggonogo puwak o.

⁹It nen yum maa'ngga amu kunik woppunuk, eya eekak ndi wuninogo pegak inom, ndi elaganggin-elaganggen wunabak inom, keele irip mbangga inom, ndi paga eekak yi mendek ndi mendek inom, ndi wuniniyak yigani toolak yi togolowak ndi togolowak inom, obaga lenggenogo punuk,

¹⁰ti'nuk, ndi wuninogo pegak inom, yi mendek ndi mendek wuninggo logonet, eekak inom, lumba-lumba agabolo paga nggerenogo punuk, wonok noorak eewurogo puwak o.

¹¹An nake warogo wo'niriyak mbuti emas paga ogobakkigirik nogo, yum maa'ngga amu kunik paga obaga lenggenogo pugwi, ti'nuk, lumba-lumba agabolo ogombaga wunom lenggenogo pugwi, eeppunuk, eyo eewu'nuk naga nogo nonggonogo puwak o.

¹²O mage menggim paga eeri unggwogo logonet, eekak yi mendek ndi mendek abok aret waganggo logomenggaarik, yum maa'ngga amu kunik paga nggerenogo pugwi, ti'nuk, lumba-lumba agabolo paga ogombaga wunom lenggenogo pugwi, eeppunuk, wonok noorak eewurogo puwak o.

¹³Nake warogo wo'negak mbuti tembaga paga ogobakkigirik me, wun wangge nogo, koorogo mbo wumbunuk, yum maa'ngga kunik paga obaga lenggenogo puwak o.

¹⁴Eerogo punuk, nake warogo wo'nogo logonet eekak yi mendek ndi mendek kaninggen ndoonggak inom, enggaanggum pelaakak paando inom, wun ndoonggak elabe inom, niyo ndik-ndik eekak niyoowak inom, at paga lumbunuk, lumba-lumba agabolo paga ogombaga lenggenogo pogo logomenggaarik, eewu'nuk noorak eyo nonggonogo puwak o.

¹⁵Aap Karun apuri inom nen mage menggim yi mendek ndi mendek wonage nogo li'luk eerogo pugwi, mage menggim yi eekak ndi eekak eeko menggaarak alik leenak nogo, abok aret nggerenogo pugwi, eeppunuk, it Iterali inawooliya minogo punuk, ambime noorak eekwi iinok, it Kekat mendek nen yi mendek ndi mendek wonok nawak nduk, wa ungguwak o. Wa unggwogo logonet perak, kambukwak me, yi mendek ndi mendek eekak ake leenak nogo ti, mbaanggagwaarik o. Yi mendek ndi mendek eekak ninom lambungge minggim wonage nogo, it aap Kekat mendek nen mban wonok nogo logowak o.

¹⁶Ndi wuniniyak yigani inom, obari abe kaga inom, anggen yigirik pogo menggaarak nake pugu inom, aap mippiigo logonet amburu eeppiiga inom, nogo ti, aap an neebe unde Karun aput Eleyatat nen aret unde logowak o. At nen mban Ala awooliya wurik inom, mage menggim yi mendek ndi mendek inikime wonage nogo inom, yi mendek ndi mendek eekak alik leenak inom, abok aret unde logowak o,” yinuk, yoragagerak.

¹⁷Aliku ALA nen Muta Karun imbirak yorage logonet,

¹⁸“Aap Kekat mendek paga wiganak ndegek lombok eerak ambi nen eeriyak mage yugu kagak eekwi iinok, it aap Lewi mendek inenggela'me nen inenggaawak lek eerogo piige neyo, liippiigo logonip o.

¹⁹It Kekat mendek nen yi mendek ndi mendek alik leenak wonage me panggo yi wogwe iinok, kangga'lek ineenik logowak nduk, kit nen eeko logorak nogo yi aret. At Karun apuri inom nen mban mage menggim inaa'nduk unggwi nanuk, ineyabu inalitak eeko logorak inom, yi mendek ndi mendek piyaninuk noorak inom, punogo piinet nogo logowak o.

²⁰Togop eeriyak kwe, it Kekat mendek nen yi mendek ndi mendek abu alik leenak nogo, we inigen anggu'nggat kogwe iinok, kambugun aret me, pekkaawok nduk, o time unggwi nagwaarik o,” yinuk, yoragagerak.

²¹At Aliku ALA nen Muta yoge logonet,

²²“It Nggeroton mendek inanebunu inom, ndarak ndegek inom, mugurok ineebe keenggi linggininake,

²³ninom lambungge minggim nawooliya wurik me yabu eekwi inom eeko logowok nduk, wogwe nogo, ndarak iigak tahun 30 eerak kuli nen nok, agi tahun 50 eerak kuli aap mban keenggi linggininake, ee'nu o.

²⁴It Nggeroton paga wiganak nen ineyabu eeko logonet, yi mendek ndi mendek aaninggin kenok wonok nagak eeko logorak nogo ti,

²⁵nawooliya wurik me yum tugunik nogo inom, an ninom lambungge minggim yum tugunik nogo inom, nawooliya wurik oo'ngget ndomba agabolo negen lenggenak inom, ti irimbaga lumba-lumba agabolo oo'ngget maarak inom, ninom lambungge minggim nawooliya wurik me tu unggwogo menggam yum tugunik inom,

²⁶nawooliya wurik eebe inom, nake warogo kani kunggo menggam eerak inom, mangga wagak yengget-wangget owa'nagat yum tugunik nogo inom, nawooliya wurik oore'nggam tu unggwogo logorak yum tugunik inom, eyo paga puguni naga keele inom, nawooliya wurik me eeko menggaarak yi mendek ndi mendek abok aret wonok nogo logorak it aret unde wonogwe, yi mendek ndi mendek eekak ti paga ambi eeriyak age kenok, ti paga it nen aret eekwi, eeko logowak o.

²⁷Aap Nggeroton mendek nen ineyabu eerit nogo logonet, yi mendek ndi mendek wonok nogwe a, yabu alik mendek yorogwe iinok, eekwi a, nogo ti, at Karun apuri inom inarum wakwi iigak, eeko logowak o. Yi mendek ndi mendek abok aret piyaninuk noorak ti, it inobaalombok aret me, yorage logomunggun o.

²⁸Ninom lambungge minggim nawooliya wurik ndegenggo logonet, it Nggeroton paga wiganak eeko logorak ti aret me, aap Ala unde Karun aput Itamat nen wone lengganogo yorage kagak eeko logowak o,” yinuk, yoreegerak.

²⁹Aliku ALA nen Muta yoge logonet, “Kat nen it aap Merari mendek inanebunu inom, ndarak ndegek inom, mugurok aret ineebe linggininake,

³⁰ninom lambungge minggim nawooliya wurik me yabu eekwi inom eeko logowok nduk, wogwe nogo, ndarak iigak tahun 30 eerak kuli nen nok, agi tahun 50 eerak kuli aap mban keenggi linggininake, ee'nu o.

³¹Ninom lambungge minggim nawooliya wurik me ndegenggo logonet, it eeko logorak ineyabu ti, kobat inom, eyo karo-karo nappegak inom, owak mippegak inom, owak mippegak iyok inom, piyaninuk noorak it aret unde wonogwe,

³²owa'nagat yendok-wandok wuko logonet, owak mippegak inom, owak mippegak iyok inom, keele puguni nagak yinggak eyo inom, keele inom, nawooliya wuko logonet eeko menggaarak abok aret piyaninuk noorak it aret unde wonogwe, eeko logorak me, Yi mendek aret wonok nogo logonip o, yinuk, inalitak lombok puninake logomunggun o.

³³Ninom lambungge minggim nawooliya wurik ndegenggo logonet, it Merari paga wiganak eeko logorak ti aret me, aap Ala unde Karun aput Itamat nen wone lengganogo yorage kagak, eeko logowak o,” yinuk, yoreegerak.

³⁴Yoge mbareegi, Muta inom, Karun inom, it Iterali mendek wonogwe abok aret inoweewi inom, nen it Kekat mendek inanebunu inom, ndarak ndegek inom, mugurok aret ineebe linggininabeegwaarak me,

³⁵Ala inom lambungge menggim awooliya wurik me eekwi inom eeko logowok nduk, wogo nogogwaarak nogo, ndarak iigak tahun 30 eerak kuli nen nok, tahun 50 eerak kuli abok aret aap mban

³⁶inanebunu mugurok ineebe lambunik ineenggi lingginik ti, dua ribu tujuh ratus lima puluh aret.

³⁷Aliku ALA nen it yoraawak nduk, Muta yoreegerak nogo ndak-ndak, it aap Kekat paga wiganak mendek Ala inom lambungge menggim awooliya wurik me, eeko nogogwaarak abok aret ineebe lambuk togon Muta Karun imbirak nen ineenggi linggininabeegwaarak nogo ti aret.

³⁸It aap Nggeroton mendek inanebunu inom, ndarak ndegek inom, mugurok aret ineebe linggininabeegwaarak me,

³⁹Ala inom lambungge menggim awooliya wurik me eekwi inom eeko logowok nduk wogo nogogwaarak nogo, ndarak iigak tahun 30 eerak kuli nen nok, tahun 50 eerak kuli abok aret aap mban

⁴⁰inanebunu inom, ndarak ndegek lombok inom, mugurok ineebe lambunik ineenggi lingginik ti, dua ribu enam ratus tiga puluh aret.

⁴¹Aliku ALA nen Muta yoreegerak nogo ndak-ndak, it aap Nggeroton paga wiganak mendek Ala inom lambungge menggim awooliya wurik me eeko nogogwaarak ineebe lambuk togon at Muta Karun imbirak nen ineenggi linggininabeegwaarak nogo ti aret.

⁴²It aap Merari mendek inanebunu inom, ndarak ndegek inom, mugurok aret ineebe linggininabeegwaarak me,

⁴³Ala inom lambungge menggim awooliya wurik me eekwi inom eeko logowok nduk, wogo nogogwaarak ndarak iigak tahun 30 eerak kuli nen nok, tahun 50 eerak kuli abok aret aap mban

⁴⁴inanebunu mugurok ineebe lambunik ineenggi lingginik ti, tiga ribu dua ratus aret.

⁴⁵Aliku ALA nen Muta yoreegerak nogo ndak-ndak, it aap Merari paga wiganak Ala inom lambungge menggim awooliya wurik me eeko nogogwaarak ineebe lambuk togon at Muta Karun imbirak nen ineenggi linggininabeegwaarak nogo ti aret.

⁴⁶Muta inom, Karun inom, it Iterali inoweewi inom, nen it aap Lewi mendek inanebunu inom, ndarak ndegek inom, mugurok aret ineebe linggininabeegwaarak me,

⁴⁷ Ala inom lambungge menggim awooliya wurik me eekwi, ambime noorak age kenok, eebe piyaninuk nogwe, eeko logowok nduk, eeko nogogwaarak nogo, ndarak iigak tahun 30 eerak kuli nen nok, tahun 50 eerak kuli abok aret aap mban ineebe lambuk togon

⁴⁸ineenggi lingginik ti, delapan ribu lima ratus delapan puluh aret.

⁴⁹Aliku ALA nen Muta yoreegerak ndak-ndak, Ala awooliya wurik me ndegenggo logonet, ineyabu eekwi, mininuk wonok noorak yorogwe iinok, wonok nogwe, eeko logowak nduk, inalitak lombok punirogo nogogwaarak. Aliku ALA nen Muta yoreegerak ndak-ndak aret ineebe ineenggi lingginogo piyareegwaarak nogo ti aret.