Read Western Dani Linggineegwaarak 5 Bible Online

Linggineegwaarak 5 - Western Dani bible

Linggineegwaarak 5

¹At Aliku ALA nen Muta yoge logonet,

²“Aap ambi nen awin aaga'ne age, oona mendek paga anggore'na wungge, aap kambemenggerak mbaanggage kenok lu kolage, eeke kenok, inawooliya wurik me nen endekem wumbogo logowak nduk, wone lengganogo it Iterali mendek yorage,

³it aakumi inawooliya wuppatinuk, wonogwe me, an ninom wonage nogome maluk eerogo pukwak, kumi inom, aap inom, eeppiyoorak ndak-ndak me, aakumi inawooliya wuppatinuk wonogwe me nen wumbiigo logowak nduk, yorage, eeke logot o,” yinuk, yoreegerak.

⁴Yorage mbareegi, it Iterali mendek nogo nen togop aret eeko logonet, Aliku ALA nen Muta yoreegerak nogo ndak-ndak, it aakumi togop mendek aganake kenok, inawooliya wuppatinuk, wonogwe me nen endekem wumbiigo nogogwaarak.

⁵ Aliku ALA nen Muta yoge logonet, “It Iterali yoroorak nogo yi aret. Aap nen ilik, kumi nen a? Naliku ALA noone yugu nogo liippega'lek oreeluk ambi maluk eeppege logonet, amendek woppunuk, yale-pale eerogo pege kenok,

⁷ore maluk eeppemenggerak nogo enggaanom paganogo punuk, awi yakkage logonet, obaga lunogo ambinom seperlima aret aap maluk eeppemenggerak nogo wogoruwak o.

⁸Togop aret eeko logorak kwe, aap amendek wamenggerak nogo, kambemenggerak kenok, at mendek koorok ambi wogoroorak kwe, ineebe wonogwe lek me, onggo puurak nogo ti, Naliku ALA namendek aret me, at aap an neebe unde wogora nawak o. Ndi, wogora nage logonet, aap maluk eeppememenggerak omaluk lek eerogo punuk, ninom lambunik logorak nggami aanggo wakwi kwak nake wariyak ndomba ngguunok ambi nogo, inom wogora nage logowak o.

⁹It Iterali mendek nen, Ala ake o, yinuk, nggomoorogo pemenggaarak abok aret aap an neebe unde wogora wogwe nogo ti, it an neebe unde inamendek aret logowak o.

¹⁰Aap ambi nen, An nake Ala wogori o, mba'nuk pi wage ti, at obaalombok aret. Ndi, aap an neebe unde ira wogwe ti perak, it aap an neebe unde nogo inobaalombok me, it nen aret koonggo logowak, yegerak, yoret o,” yinuk, yoreegerak.

¹¹At Aliku ALA nen Muta yoge logonet,

¹²“It aakumi Iterali wone yoroorak nogo yi aret. Kwe ambi ogonggelo mbo imbirak liirogon wonaga'lek mbo punuk,

¹³aap alik ambi imbirak nogo yit nage nogo ogonggelo eenu age, at kote maluk eekko'net nage nogo, aakumi nen yelok kogwe, ndi, eeke me inigen kogwe, eeka'lek me, ogonggelo ugun wonage kagak kwe,

¹⁴ne ambi paga ogonggelo nogo iniki nen, Nakwe yi, aap alik ambi imbirak nogo yit nage kwa? yinuk, eebi mbake ilik? at akwe maluk eeka'lek kagak, ogonggelo nen, Aap alik ambi imbirak nogo yit nage kwa? yinuk, eebi nen punu negen mbake a? eeke kenok,

¹⁵aap ogonggelo nogo nen akwe nogo wonok, at aap an neebe unde wonage me pi nawak o. Pi nage logonet, akwe ake waabuk negen jelai yigirik 2 liter negen woppunuk, Aap nen, Nakwe yi, aap nen wukwi kwa? mbake nogo, akwe maluk eekerak kero, liippuwak nduk, ake pi wogo logorak nogo mendek aret me, tayitun amburu inom amok mbangge, obari abe kaga nogo mendek inom pege, eeka'lek kagak pi nawak o.

¹⁶Pi nage kenok, at aap an neebe unde nogo nen, kwe nogo wonok, Naliku an ALA nenggaanom paga pi woraanuk, ena koonogo na'neyaawak nduk, yoge logomenggerik,

¹⁷ena koonogo na'neege kagak, aap an neebe unde nen niyo abu alik leenak niyoowak nggween nggabok paga ogobakkigirik me toolak nogo wagangge logomenggerik, nawooliya wurik me time liirubu nggween paga wonage nogo, waganogo niyo toolak me yumbunogo wuppuwak o.

¹⁸At neebe unde nogo nen kwe nogo Naliku ALA wonage me ena koonogo na'neyaawak nduk, yoremenggerak ena abu na'neege kenok, kwe ti, eeruwak piinogo wuppunuk, niyo ale toolak nunggwi iinok, pulunggologo menggaarak nogo mendek eenggime porogo wonage logonet, Nakwe aap nen wukwi kwa? mbake ake anggen yigirik nake pugu paga kwe abeke logorak nogo eenggime puwak o.

¹⁹Pege logomenggerik, at aap neebe unde nogo nen kwe nogo kumbuk mbanuwak nduk, yoge logonet, Kat kogonggelo wonage kagak aap ambi kimbirak nogo yege, tu alik paga nomo agan nage me, aap nen maluk eerogo pagagwi, eerulik kenok, kat pulunogo pagarak niyo ale yi, nengge keenok koba arigin lek o.

²⁰Ndi, kogonggelo wonage kagak tu nomo agan nage logonet, kogonggelo lek aap alik kimbirak nogo yit nage nagandak paga maluk eekkolagandak kenok perak, Abet aret eekirak o, yinuk, pagangge, ndi, lek kenok, Eerulik o, yinuk, kumbuk mbangge, eeru o.

²¹Yoge logomenggerik, at an neebe unde nogo nen kwe nogo kumbuk mbangge logonet, pulunogo patiyak wone yuurak nogo yi aret. An eekirak kagak, naana'le mbanggolage neenok, an pulunogo paniyak niyo yi nengge paga naanogum piike, nambulok togo'mbet nabe eerogo pege, eeruwak o. Ndi, nambulok togo'mbet nabe eerogo pege, naanogum piirogo pege, eeke kenok, niriwi nen pulunogo panugwi, Kwe yi, mbabilu o, yinuk, yo'nugwi, eeko logowak nduk, Aliku ALA nen eeppiyoorak ti, op aret o, yinuk, kumbuk mbanggi o, yinuk, yuwak nduk, yoruwak o. Yoremenggerak kwe nogo nen, Togop eeriyak op aret, ari kenok,

²³aap an neebe unde nogo nen pulunogo puurak wone nogo mbuku pirik-perek aago paga liiru mbanogo punuk, ti'nuk, liiru mbanak nogo koorogo niyo ale toolak me nogome wuppuwak o.

²⁴Koorogo wuppunuk, niyo ale pulunogo puurak toolak ti, kwe nogo nawak nduk, wogoremenggerak namenggerak inikime ndogu agan unggwage logonet, andi lombok kaagin o.

²⁵Nakwe aap nen wukwi kwa? mbake ake anggen yigirik nake pugu eenggime wonage nogo, an neebe unde nen wagangge logomenggerik, Naliku ALA kaakit nduk, titik eerogo nippunuk, nake warogo pi wogo menggam eerak nogome lunogo puwak o.

²⁶Pege logomenggerik, at an neebe unde nogo nen kwe nogo abeke logowak nduk, anggen yigirik nogo, eenggime woppunuk, nake warogo wo'negak ogobakkigirik nogo paga kani kumbege logomenggerik, niyo ti, kwe nogo nawak nduk, wogoruwak o.

²⁷Kwe nogo ogonggelo imbirak liirogon wonaga'lek mbo punuk, aap alik inom eerit nage paga endage maluk eekkolagagerak kenok, niyo ale pulunogo puurak toolak nogo namenggerak inikime ndogu agan unggwage logonet, ale nen andi kaagin o. Andi nen aanogum piirogo pege, ambulok togo'mbet nabe eerogo pege, eerigin me, iriwi inenggela'me pulunik aret nege logogin o.

²⁸Ndi, kwe ti, maluk eekkolaga'lek ogonggelo ake mban porogo wonage kenok perak, niyo ti, namenggerak kwe, maluk eekkolaagin lek aagalogwe kuurik me aret ndaganake logogin o.

²⁹Nakwe wuken, yinuk, eeko logorak wone koonak nogo ti aret o. Kwe ambi ogonggelo wonage kagak mbo punuk, aap ugun inom eerit nage paga maluk eekkolage ilik?

³⁰ogonggelo iniki nen, Nakwe yi, aap nen wukaarak kwa? yinuk, punu negen kwaake a? eeppunuk, eeko logorak wone nogo ti aret. Aap ambi akwe togop eeke mbake kenok, akwe nogo wonok Naliku an ALA nowagam pi wa'nuk, at aap neebe unde nen ena koonogo na'neyaawak nduk, yoge logomenggerik, ena koonogo na'neege kagak, at eeppuurak wone yugu ti abok aret kwe nogo eeppogo logowak o.

³¹Ndi, ogonggelo nogo maluk eeppuurak lek we teppuurak kwe, akwe ti perak, at maluk eeremenggerak onggo at obaalombok aret kaagin, yegerak, yoret o,” yinuk, yoreegerak.