Read Western Dani Mika 1 Bible Online

Mika 1 - Western Dani bible

Mika 1

¹MIKA WONE Aap Yotam kunduk, Akat kunduk, Kitikiya kunduk, it Yekura mendek inoweewi inendagembogut a'nuk, wone lengganogo yoragak eekwi iigak, o Tamariya inom, kota Yerutalem inom, eeppuurak nogo, Aliku ALA nen aap o Mereyet mendek Mika nogo, abi paga yoge nagagerak nogo yi aret.

²At Aliku kinogoba Ala awi alik leenak menggim logonet, “Ndogop eekwi kiigirak o,” yinuk, yokkiraawak nduk, Kit yi aakumi ndi aakumi abok aret yi wae. Kinaruk konenggwi, O nggween inom, o nggween paga wonogwe inom, abok aret yi wae. Kinaruk liirogon konenggwi, Eeko logonip o.

³At Aliku ALA nogo abet aret at menggim nen wundi wage, Wambi wa'nuk, puut-puut paga iyok pit wage, Eeke agaarik o.

⁴Kundali kani nen tigi-tigi eerogo pege menggi kwak, Puut-puut paga nen niyo taga-taga wambit nage menggi kwak, At iyok pit nage kagak, puut-puut amburu a'nuk, taga-taga wambit nage, Aluk-aluk nggogu-nggogu wambit wage, Eeke agaarik o.

⁵Ti apit eeke nogo ti, at Yakup nen Ala wone taganogo pereegerak paga, Iterali paga wiganak inomaluk paga, aret eeke agaarik o. At Yakup nen Ala wone taganogo pege menggim nogo ngge o? Lek o. O Tamariya aret nogo lek a? Ndi, it Yekura mendek inomaluk eeko menggam tiyarogon nogo ngge o? Lek o. O kota Yerutalem aret nogo lek a?

⁶“Togop aret me, an nen o Tamariya yigirik-noonom eerogo pege, Eyo anggur yariyak negen eerogo pege, It inayugum langgunogo o kobappaga yagabit eerogo mbo wuppege, At anggween alom wurabak nogo, kin eerogo pit nage, Eerigin o.

⁷Inagugiwak nogo yigirogo pege, Inagugi awi wurik me, kumi eeginako logonet, onggo pugu time wonage nogo, kani kunogo pege, Inagugi ogut eerogo pugu nogo, kalenak-pugunik eerogo pege, Ndi, kumi wurinako logonet, onggo pugu nogo abok aret kuwak eerogo pegak eereegwaarak me, Aap kumi eeginako logonet, onggo pugu nogo ti, ti mendek eeko logonet, wogorogo logowak nduk, teppiige, Eerigin o,” yinuk, Aliku ALA nen aret yegerak me, yokkiragi o.

⁸Togop aret eerigin me, an niniki puru ari logonet, leenggu maake, Niyogogut yum nggonenogo mbo punuk, nayum yirik lek nagap mbelanak nage, Mba'ngge ku agan nege menggi kwak, towe wu oone agan nege menggi kwak, an togop aret nege, Eerigin o.

⁹It Tamariya mendek inawin nogo obeelom aga'lek it Yekura mendek inoba lenggennari nage, An mendek wonogo menggam o Yerutalem nogome tu unggwi nogo menggam paga muk ari nage, eekerak wonage agaarik o.

¹⁰Wone ti, ninom wim mbanak o Nggat wonogwe nogo yorogwe, Inigen iigak le yogwe, Eeriyak mage o. Ndi, o Mbet-Le-Apera time liirubu paga lagak-mbagak yogo logonip o.

¹¹Kit o Tapit monggotak yi wae. O nda wokkiren nogwe iigak, kinagap mbelanak kinenggali mbakak namunggup o. It o Taanan menggaarak nogo, inawi kota nen wundi woroorak inagabiti mbarugun o. It aakumi o Mbet-Kayeten wonogwe nogo nen le yogwe konenggwi kenok, Time kunduk nineebe op logorak lek kogo o, yinuk, mbarumunggup o.

¹²Aliku ALA nen maluk eeppiyoorak o Yerutalem tu unggwi wogo menggam muk ari wagaarak wonage me, It o Marot menggaarak nen, Yeenggwa niraawak lak, ao, yinuk, iniki lunik wonogo agaarik o.

¹³Kit Lakit monggotak yi wae. Iterali maluk eerit nogwe iinok, kit iyaalok pigaganeegutak paga O kota Tiyon Aagaluk nogo maluk eeke mamunggolagagerak me, Kinaguda nggweendo wim eeka nogo paga keele mbarenogo pinip o.

¹⁴Togop aret me, kit Yekura mendek yi wae. It kota Moreteyet Nggat wonogwe nogo peebi iigo logomunggup lek me, “Kiniki yungguppegak nagup o,” yinuk, kinamendek wogoraanip o. It aakumi o kota Akitip wonogwe nogo nen it Iterali inoweewi inendagembogut yeenggwaaraagun lek inambokan laganugun o.

¹⁵Kit aakumi o Mareteya monggotak yi wae. At Ala nen aap ambi tebenogo pinagawak nduk nappi woraagin me, Iterali inoweewi inendage tiyanak nogo, ndo endage Arulam nogome kumaa'nari nagun o.

¹⁶Kinapuri inabuwa nen le yogo logonet, kineeruwak-kinamboro puluk ko eerogo mbanggwi, Kinapuri mbo pinaganuk keele maageren mbo piya nagun me, Towe wam pili nengga eeruwak lek puluk ko aago kwak kineeruwak togop aret eerogo mbanggologwe, eeko logonip o.