Read Western Dani Mika 4 Bible Online

Mika 4 - Western Dani bible

Mika 4

¹O age yobok paga Aliku ALA awi puut paga wurik wonage nogo, Yi puut ndi puut tiyarogon wonogwe ti, tebenak kagak, puut ti mban tiyanak wonage, Puut-puut mbuulogwe teberogon wonage nogo enggela'me puut ti mban tiyak ari, Eerigin o, yinuk, koonogo pigin me, Yi aakumi ndi aakumi puut ti paga niyo nage mban menggi kwak togop aret unggwi wogo logogun o.

²Aakumi inanebunu lombok apit aret wogo logomenggaarik, yogo logonet, “Eeko logorak wone yugu nogo o Tiyon nen wundi wage, Aliku ALA ari menggerak nogo o Yerutalem nen wundi wage, Eeke me, Aliku ALA eerit nage menggerak nogo, nit ndak-ndak eerit nogo logorak mamunninake logowak nduk, Nit Aliku ALA abuut paga lagi nogwe, Yakup ogoba Ala awi wurik me unggwi nogwe, Eeriyak me, lagi nawok o,” yinuk, yogo logogun o.

³ Yi aakumi ndi aakumi inawone mbanogo inowak loongge, Aakumi inanebunu lombok nda koorok inendage warak wonogwe nogo, Wone inoba aremenggaarak kenok, amburu mbangge, Eerigin me, Inawooluwak nogo yabu tege eerogo pugwi, Aap inooka ndut nogo tawi pooka eerogo pugwi, Eerugun o. Aakumi ambi mendek nen aakumi alik mendek tebenogo piyaawok nduk, inawooluwak waganggwi, Wim eekak yuurak inawuri mamunirogwe, Eerugun mondok lek o.

⁴ Inalitik-inalitak inageyo anggur alome kwi'ndak wonogwe, Inageyo wuli alome iniki ugun tayenak wonogwe, Eekwi iigak, “Aap ambi nen inogut nggigik yuwak nduk, eeppiyaagin lek aret o,” yinuk, At Omaawi Lombok Menggerak Aliku ALA nen aret yegerak me, yagi o.

⁵Aakumi inanebunu lombok inagugi inendage tiyappunuk eerit nogo logogun kwe, Nit perak, ninogoba Aliku Ala endage tiyappunuk, mondok-mondok eerit nogo logogun o.

⁶Aliku ALA nen ari logonet, “Ne ti eyom paga an nen it inendop yilugu negen nogo kuwak eerogo piya wage, It mbo piya nogogwaarak wonogwe nogo, ambit me wonggonogo piya wage, Aaninggin-paaninggin inoba piyareegirak nogo, kuwak eerogo piya wage, Eerigin o.

⁷It inendop yilugu negen eegu yumbunik wonogwe nogo, inendop abe awi wiganggo logowak nduk, eerogo piige, Ndi, it aakumi wumbiyareegwaarak nogo, inanebunu wakaa'ngget lombok logowak nduk, eerogo piige, Eeke logominggirik, Naliku an ALA nen aret puut Tiyon paga logonet, inowe nendagembogut a'nuk, Ne ti paga nen nok, mondok-mondok wone lengganogo yorage logogin o.

⁸Ndomba wari wogwe iyo, nggayo paga inarum wonage, Tiyon aagalogwe yugum pak wurogo pereegi kwak puut Tiyon wonage, Eerak wonage O Yerutalem ti, Aa'nduk it yi aakumi ndi aakumi at abu'me piinok, wonagagerak kwak obaane'me ndak-ndak eerogo pege, Aap endagembogut o Yerutalem at paga logonet, wone lengganogo yorage nagagi kwak yorage logowak nduk, koonogo pege, Eerigin o,” yinuk, Aliku ALA nen aret yegerak me, yokkiragi o.

⁹Kit nonggop nduk, kinoone nggwok paga le yogo ogotik? Aap endagembogut eebe kinenggela'me wonage lek nduk, yogo ogotik ya? Ndi, kit panggombinagarak lek kenok, kwe aagaluk enegen paganak yagan wake menggi kwak, o yogondak andi nen kinoone nggwok paga yogo ogotik ya?

¹⁰O Tiyon aagalogwe kit yi wae. Yogondak kineebi mbakak o kota yime nen endekem wundi nanuk, yabu nggulaame logorak agaarak me, Kwe enegen paganak yagan wake menggi kwak, kineebe yagan yobak-nggolak yogo logonip o. Kit o Mbaben aret namunggup o. Time nen aret kinagap ndake, time nen Aliku ALA nen kinawim ineenggi paga nen wondet eerogo pinagage, Eerigin o.

¹¹Togop aret eerigin kwe, o yogondak nen yi aakumi ndi aakumi ambik lombok nen tebenogo pinagawak nduk, kuwak eeppunuk yogo logonet, It maluk eerogo piyaawak o. O Tiyon aagalogwe maluk eerogo piigwi iinok, inagi'ndok kanggo logowam ninigen loorogo logowok o, yinuk, yogwe kwe,

¹²At Aliku ALA eeriyak mbake menggerak nogo ineenggo'lek wonogwe, Gandum wonok agabolo mbelanggo menggam pi wogo mengga kwak at nen kuwak eerogo piyoorak kooneegerak me, aret eeke yogwe nogo, it kobak wonogwe, Eeko agaarik o.

¹³“O Tiyon aagalogwe kit yi wae. Mi'nogo logomonggotik, gandum negen ti, kiniyok paga agabolo mbelanggo logonip o. An nen tapi eyak to aago mbuti owak kwak kinomaawi eerogo pinagage, Ndi, kiniyok mbuti tembaga kwak eerogo pinagage, Eeke neenok, Kit nen yi aakumi ndi aakumi ambik lombok yigirik-noonom eerogo piigo logomunggup o,” yinuk, yokkirage kagarak o. Ndi, it aakumi yigirogo piigo logonet, inamendek kugun wamonggotak nogo, wonok, “Aliku ALA ake o,” yinuk pi wogwe, It inageerok ti, at o nggween yi abok aret unde menggerak ninogoba nogo ake leenogo pugwi, Eeko logomunggup o.

¹⁴Togop me, o kota omaawi pipporogo menggendak kat yi wae. Ninawim nen wanggeppinaninuk wonogwe me, kawuri wim eeka kuwak eeppiige logot o. It nen aap Iterali ninowe ninarum wonage nogo, yawi mbanak paga agandin tela eerogo warugun o.