Read Western Dani Abakuk 3 Bible Online

Abakuk 3 - Western Dani bible

Abakuk 3

¹At Ala nen yoge kagak yoraga Abakuk tamban eereegerak nogo yi aret.

²“Kaliku ALA wae. Kat eeke menggendak nogo an muk konengge, Kaliku ALA o. Kat eerit nage nogo paga an nagabiti mbake, Eeke agarik o. Kat eeke menggendak ti, nit kaawok nduk, ambinom eeke, Kat eeke menggendak nogo, nit yogondak wonogwe yi paga kin eeppege, Kanini ninoba pinanege logonet kwe, ninabuwa mbake, Eeru o,” yinuk, tamban eereegerak.

³Tamban eeke mbareegi, at Ala nogo o Teman nen wage, At Kikak Nakeelik abu obeelom menggerak nogo puut Paran nen wage, At abu tiyanak me, “Wi!” yogwe nogo, o mbogut paga ndak warak wonage, O nggween paga kunduk, at alut eekwi nogo ndak warak wonage, Eerak aret agaarik o.

⁴At wage kagak, eya kwindagala aago wonage ti, At omaawi nogo eenggime kumaarak wonage me, time nen abinak pindanogo wumbi wage,

⁵At wage kagak, kugilingga aa'nduk iyak wu'nage, Wage kagak, ambokan andi kambuurak mendek mugurok wage,

⁶At mi'nage kagak, nggween na'ndo-wa'ndo eeke, At enegen enaagan-ambokan pi'nage kagak, yi aakumi ndi aakumi inaganak warit nage, Puut-puut aa'nduk lombok nen itok negen wonage nogo, yigirogo wurabit wage, Puut-puut teberogon o maan nen wonage nogo, aambira-mbira wangge, Eeke kagarak o. Ti eeke kagarak ti, o aa'nduk lombok eeke nagagerak nogo aret eeke kagarak.

⁷It aakumi o Kutiyan mendek inawooliya wurik me wonogwe nogo, inomanggen tayo-tayo nage, O Miriyan inawi wurik me wonogwe nogo, inaganak warit nage, Eeke kagarak o.

⁸Kaliku ALA wae. Kat kaguda paga kwi'na'nuk nage, Kanggweendo paga nen wim eeke logonet, keegin tiyak yuwak nduk kwi'na'nuk nage, Eeke logonet, Yi niyo ndi niyo nage nogo kanini inombake logonet, eereegindak ilik? Niyo mbuulogwe-mbaalogwe nage nogo paga kanini oba puurak mbake logonet, eereegindak a? Ilik, niyo nggwok yenggenak laut paga kanini oba puurak mbake logonet, eereegindak kwa? Yu o!

⁹Keegin agale wuppunuk, komaale agale paga lumbege, O nggween nggaganogo punuk, niyo nage logorak eerogo pege, Eereegindak o.

¹⁰Puut-puut nen inigen keenok, inaganak warit nage, Kat keegak niyo wu'nuk nage, Niyo kole yenggenak laut kiiniki lombok paga anggut-nggut oone ari logonet, Kilaarak-mogonik eerogo nippit wage, Eereegerak o.

¹¹Komaale namburik abigan o kimbik negen eeke, Kawooluwak namburik nage logonet, abinak pindanggage, Eeke paga Oonegen inom, tut inom, inobaane'me mbogut paga nogome puk ogwe iigirak o.

¹²Kanini mbakak o nggween paga yime wanggerit nege, Kanini kani kunik negen eeke logonet, yi aakumi ndi aakumi aan lebenogo piinet nage,

¹³Kat kapuri inagap ndariyak nduk wundi wage, Kapuri leenogo piyareegindak nogo, inagap ndarikit nduk wage, Eeke logonet, It aap maluk eeko menggam wonogwe inowe nogo, aan lebenogo pege, It at awuri inom nege abok aret lek eerogo piige, Eereegindak o.

¹⁴It aakumi ambi eekkoloorak meek kumaarak wonogwe nogo, at awuri nen inambeme yonggorinabuwok nduk, eeko logonet, Nanonggwan aga o, yinuk, inale'nggen mbako mengga kwak, At awuri wim eeka nen nit mappinanuwok nduk, o wiya warit wage menggi kwak wogwe iigak, At awooluwak yabok togon eerogo inowe nogo anobak polok togon warogo pege,

¹⁵Kaguda iniyogobit paga niyo kole yenggenak laut nogo, aan lebenogo pit nogwe iigak, Niyo nggwok yenggenak laut nogo aanggolagap eerogo pege, Eereegindak o.

¹⁶Agan wage yi abok aret naruk konengge, niniki ma'nage, Nagabiti nen nambe lele ari, Nowak ne agan nage, Naganak ndik-ndik ee'nake, Eereegerak kwe kagak, It aakumi tebenogo pinani unggwogwe nogo, aaninggin inoba kwippiyorak eyom ari woraawak nduk, An niniki aanaganggenggwi lek tokkage logogin o.

¹⁷Eyo wuli nogo anggup lobangga'lek kagak, Eyo anggur nogo anggen yega'lek kagak, Eyo tayitun anggen yega'lek kagak, Yabu yarak me anggen abe mbanggolaga'lek kagak, Kambin-ndomba inanggenogona ambiriluk ambi wonogwe lek iigak, Lembu-tapi inengga'nggo'na ambiriluk ambi wonogwe lek iigak,

¹⁸An perak, Aliku ALA paga nale'nggen nggwok mbake, Nagap ndaka nogoba Ala aret me, nale'nggen nen ndawi lubuk ari, Eeke logogin o.

¹⁹ An nomaawi ti, at Aliku Itok Menggerak nogoba Ala aret. Rusa iyok teeluk me, ya pegak nda pegak nege menggi kwak, an niyok togop aret eerogo panege, Puut-puut tiyarogon niyok pit nage logokit nduk, eerogo panege, Eeke menggerak o. Ndawi pugu yi, nggitat eekwi iigak, tiyanggo logowak nduk, inowe wogoreegwaarak.