Read Western Dani Tepaniya 2 Bible Online

Tepaniya 2 - Western Dani bible

Tepaniya 2

¹Kit aakumi kinenggali lek eerit nega yi wae.

²At Aliku ALA anini kinoba pi wage logonet, iri'ngga wiirik o wiya nen wonok lek age menggi kwak, Kit togop aret lek eerogo pinagarak eyom koonak nogo, awo ari waga'lek kagak, Aliku ALA anini kani kunik negen eeppinagarak eyom panggoni waga'lek kagak, Aliku ALA mi'nage logonet, anini kinoba kwippinagarak ne nogo awo ari waga'lek kagak, Kinanggena luk togon kuwak ari wa'nip o.

³Kit aakumi o yime kiniki tebenak logonet, Aliku ALA nen, Yogop ee'nu ndogop ee'nu, ari menggerak ndak-ndak eekwi yi, Aliku ALA mugurok nogo logonip o. Aliku ALA anini eeppinagi woroorak eyom paga kit kinoba pinagage kagak eerukwak, Kit abe koonak mban eerit nugwi, Kiniki tebenak logonet, eerit nugwi, Eeko logonip o.

⁴ O kota Nggata ti, o wogo age, O Atekelon yi oone ndi oone lek age, Eerigin o. It aakumi o Atorot wonogwe nogo o liingge yini-panip aret mugogo wumbiigwi, It aakumi o Ekeron menggaarak nogo mugogo wumbiigwi, Eerugun o.

⁵Niyo kole yenggenak laut aa'nggi paga monggotak kit Kereti mendek yi, kinabuwa o! Aakumi Pilitin wonogo menggam kit Kanan mendek yi, Aliku ALA nen aaninggin kinoba kwippinagarak yegerak me, kinabuwa o! “An nen inenggaawak lek eerogo piige logonet, ambiriluk ambi teppiyaagin mondok lek aret o,” yinuk, Aliku ALA nen aret yegerak me,

⁶Kit kinawi niyo nggwok yenggenak laut aa'nggi paga monggo'nom nogome Kambin-ndomba ndegeninaka inawooliya time wukkologwe, Kambin-ndomba inanggenogo wurogo piigwi, Eerugun o.

⁷Kit monggo'nom time aap Yekura paga wiganak eegu yumbunik nogo, unde eeppatinuk wonogo logonet, Inaanggumi kambin-ndomba inagari'ngga mbanogo nonggo logowak nduk, time piigwi, Ndi, oonikiya paga it Atekelon mendek inawi wurik me time inanogo yikkologwe, Eekwi iigak, At Aliku inogoba Ala nen ineebe liirogon aret ndegeninake, Aa'nduk wonogogwa kwak eerogo piige, Eerigin o.

⁸ At Aliku ALA nen ari logonet, “It aakumi Mowap mendek nen an napuri meek eerogo piigwi, It Amon mendek nen an napuri mbelaappiigo logonet, inagi'ndok kanggwi, Eekwi nogo An muk naruk konenggirak o. It nen an napuri meek eerogo piigwi, Nit iya me, kinanggween tebenggologwe niinok, kit nonggop eerumunggup o? yinuk, yorogwe, Eekwi me,

⁹ An Nomaawi Lombok Minggirak Naliku Iterali inogoba Ala nen o Mowap nogo, o Torom kwak eerogo pege, Ndi, it aakumi Amon mendek ti, aakumi Nggomora eerogo piyareegi kwak, eerogo piige, Eerigin o, Yinuk, an mondok neenik menggirak nendage kumbatinuk yagi o. O Mowap ti, alok-palok mban age, Mayu kwaako logonet, nggween kabuneegwa kwak age, Eerak me, Eeri'ngga-kale'ngga lagangga'lek puluk ko eerogo piminggirak me, It an napuri eegu yumbunik wonogwe nogo nen inamendek kugun kologwe, It an napuri eegu pugu wonogwe nogo nen inanggween ineyate kwak unde eekkologwe, Eerugun o,” yinuk, yegerak o.

¹⁰It aakumi Mowap mendek inom, Amon mendek inom, iniki, “Nit abu iya lombok,” mbako logonet, At Omaawi Lombok Menggerak Aliku ALA apuri nogo, meek eerogo piigwi, inagi'ndok kanggwi, Eeko nogogwaarak onggo it togop aret eerogo piyaagin o.

¹¹At Aliku ALA nen it aakumi o nggween paga yime inagugi lek eerogo piige kenok, Inagabiti nen, “Aliku ALA ti, iya!” yinuk, yi aakumi ndi aakumi nggween paga wonogwe abok aret inalitik-inalitak menggam logonet, Aliku ALA abu'me tebe yinuk, at alut eeko logogun o.

¹² “Kit aakumi Kuti mendek yi wae. Kit kunduk an nawooluwak paga kinoorigin o,” yinuk, Aliku ALA nen aret yorage kagarak o.

¹³ O omarip paga pa'nggwe wonogwe eeppiyoorak nogo, at eenggi nippunuk kagak, o Atiyut lek eerogo pogo logonet, O Niniwe yi oone lek ndi oone lek logowak nduk eerogo pugwi, Aakumi lek karume nggween mbuk menggi kwak eerogo pugwi, Eerugun o.

¹⁴O time kambin-ndomba inom, lembu-tapi inom, ndiimbu-nggwiya inom, winnari unggwagak eekwi, Towe mumayo inom, tiyu inom, o owak nigabak abo paga kwi'narit nanuk nogo yugwi, Eerugun o. It towe ti, inoone nggek-nggek yogwe nogo wonok ambime nagak eeke, Tu unggwogo menggam o langgu-langgu aago nigabak wonage, Eeremenggerak wonage logogin o. Ndi, eyo nggabina omaawi paga wurik me mininuk ndi yogo logogun o.

¹⁵O kota ineebe op wonogo logonet, iniki ugun tayenak inale'nggen paga wonogwe eeppiyoorak nogo ti aret. At mbake logonet, “An neebe yi ti, iya aret me, an kokwak ambi lek aret,” mbareegerak kwe, O karume aakumi lek nggween mbuk aago menggi kwak aago wonage, Ndiimbu-nggwiya eyonggaame mendek time ye mbambatinuk wonogwe, Eekwi yi, mondok iya o! It aakumi tu ti paga nogo logonet, “Kayik a! Op togon eerogo pigi,” yinuk, enggali wappegak nogo logogun o.