Read Western Dani Tepaniya 3 Bible Online

Tepaniya 3 - Western Dani bible

Tepaniya 3

¹Aakumi tebenogo piigwi, Ala nen yorage nogo eeriyak ineebi mbakwi, O kota enete maluk eerogo pugwi, Eeko menggam o kota Yerutalem ti, abuwa o!

²At Ala nen aruk wake nogo liirogon konengge, Wone yoge nogo, E o, yinuk, wagangge, Aliku ALA paga iniki panggombege, At ogoba Ala owagam wa'nuk yoge, Eeka'lek aret menggerak o.

³At inom eeka aap inendage warak wonogwe nogo ti, Singa at nengge menggerak naakit nduk oone nggwok ari menggi kwak, wonogwe, At aagalogwe inowak loongga ti, nggeewo owo nen nggwiya wappunuk ko'lu noorak mbakulik, o ne ambit weege paga uwiirogo wurako mengga kwak, wonogwe,

⁴At enggela'me it Ala nen yorage kagak yoraga nogo ti, liirogon yoraga'lek ugun-ugun yorogwe me, “Yi abet aret yo'nirogwe,” mbaka'lek wonogwe, At enggela'me it aap Ala unde nogo nen Ala ake leenogo pugu nogo, maluk eerogo pugwi, Ala wone Muta nen liiru mbaneegerak nogo, taganogo punuk, it mbakwi nogo mban mugurok nogwe, Eeko menggaarak o.

⁵Aliku ALA at enggela'me wonage logonet, maluk ambi eeppiigeelik obeelom mban eeppiige, At puk aga'lek ko'lu-kii'me o kubondendok nen inawone amburu mbanogo punuk, a'me nggelok mban eeppiige, Eeke menggerak kwe, It aap maluk eeka iniki nggolawe nogo, inenggali mbaka'lek maluk mban eerit nugu menggaarak o.

⁶Aliku ALA nen ari logonet, “An nen yi aakumi ndi aakumi inenggaawak lek eerogo piige, O arum logorak pak wurik unggut-unggut me o nggorek wurik nogo yigirogo pege, It tu nogo menggam maluk eerogo pigirak me, aakumi tu ti paga naga'lek wonogwe, Inawi kota-kota o wogo eerogo pege logonet, Aakumi ambiriluk ambi teppiyoolik tigitogon lek eerogo piige, Eereegirak o.

⁷Eeppege nagagirik, an nen mbake logonet, Yogondak it nen an nayuk wukwi, An yorage nogo liippunuk eekwi, It eeriyak yorage nogo, ambi kobak eerogo mbo pugun lek ndak-ndak aret eekwi, Eeko logogun, Mbareegirak kwe, It maluk eerit nugwi nogo mbo puurak mbakulik abunuk iniki aganggen kerek togon eerit nugwi iyareegirak o,” yinuk, yegerak me, yagi o.

⁸Aliku ALA nen ari logonet, “Togop eekwi me, an nen yi aakumi ndi aakumi abok aret kuwak eerogo piya wage, It aakumi inabu'me piinok menggam nen kuwak eerogo piya wage, Eeppiinok, Nanini inoba piige, An nanini kani kunik negen eeppiige, Eeriyak koonogo pereegirak nogo eeke logonet, An mban mu'neren woraawak lak, it alik mugurok nogwe yi, neebi a, yinuk, Aakumi o nggween paga wonogwe abok aret nanini kani wunuk ari kwak ineebe pup eerogo nawak nduk, eeppiyaagin me, An mi'nage logominggirik, Kit togop eekwi kiigirak o, yinuk, yoroorak eyom ari woraawak nduk, to'neego logowak o.

⁹Ti eeppiinok, it yi aakumi ndi aakumi abok aret Naliku ALA an mban nendage kumbunuk yo'nugwi, It iniki ambit eeppunuk, an mban nalut eekwi, Eeko logowak nduk, Wone wunako nogogwaarak paga inambe maluk agagerak nogo, obeelom eerogo piyaagin o.

¹⁰It an nalut eeko menggaarak napuri ma'nogogwaarak niyo Kuti enebagan wonogwe nogo nen Yi mendek ndi mendek wonok an nake pi wogo logogun o.

¹¹Ne ti eyom paga it an noone taganogo mbo punuk, maluk eerogo panugo nogogwaarak nogo, inenggali wappiyaagin lek o. It inoreewi, Nit iya o, yinuk, iniki wogoppako logomenggaarak nogo, o yime nen mbo wumbiyaagin me, It ando perak, nabuut alik leenak paga yime wonogo logonet iniki wogoppako logogun lek aret o.

¹²At kota enggela'me time it aap iniki tebenak logonet, yanggonak mban eekwi, It iniki Naliku an ALA noba panggombunuk, mu'neren wogwe, Eeko logomenggaarak nogo perak, O kota yime logowak nduk, teppiyaagin o.

¹³ It aakumi Iterali mendek eegu yumbunik wonogwe nogo nen maluk eekwi, Inoone pilit pugunggwi, Wone mbanggo logonet, inoone pilit ambi pugunogo yorogwe, Eeko logogun lek aret o. Ndomba iri'ngga nenok, iniki ugun nogo yege menggi kwak, it togop aret eerogo piyaagin me, Aakumi ambi nen mbaaninako logogun lek aret,” yegerak me, yokkiragi o.

¹⁴At Aliku ALA nen aaninggin kinoba pinagarak nogo lek eerogo pege, Kinom wim mbanak nogo wogwe iinok, munogo nappiige, Eeke logomenggerik, Kit Iterali mendek kinowe endagembogut Aliku ALA kinenggela'me logonet, kinarum wonage me, “Maluk ambi eeppinani wogwe iyo, iya!” yinuk, kinagabiti mbarumunggup lek o. Togop me, o Tiyon aagalogwe kit yi wae. Ndawi wakwi, Iterali mendek kit yi wae. Ndawi lubuk yogwe, Kota Yerutalem aagalogwe kit yi wae. Kinale'nggen nen keekok piyanggogwe, Eeko logonip o.

¹⁶Ne ti eyom ari wage kenok, it aakumi nen at Yerutalem yogo logonet, “Kat Tiyon yi wae. Kagabiti nen komanggen tayok ari ti, mage o.

¹⁷Aap wim wakaa'ngget nen inawuri inagap ndako mengga kwak, Aliku kogoba Ala kenggela'me logonet, kagap ndake, Iniki kunik lombok eekkake, Kabuwa mbake paga kiniki kwippagage, Kale'nggen nen ndawi wake, Eerigin o,” Yinuk, yogo logogun o.

¹⁸Aliku ALA nen ari logonet, “O kota Yerusalem aagalogwe inale'nggen nen laago lako logorak koonak nogo laka'lek kenok iniki aaninggin wonogwe, Eeka'lek kenok, aakumi nen meek eerogo piigwi iinok, inenggali mbakak nugwi, Eekwi nogo An nen lek eerogo pigin o.

¹⁹Ne ti eyom paga it aakumi nen o Tiyon aagalogwe tebenogo piigwi nogo, an nen mi'na'nuk it lek eerogo piige, Iniyok yilugu wonogwe nogo, inagap ndarogo piige, It mappiyareegwaarak aakumi inenggela'me wonogwe nogo, kuwak eerogo piya wage, Eeke logominggirik, Yi o ndi o it o Tiyon aagalogwe inendage maluk eerogo piyareegwam nogome nen inendage tiyappiigwi, inayuk wukwi, Eeko logowak nduk Eerogo piyaagin o.

²⁰Ne ti eyom paga an nen kuwak eerogo piige, Ne ti eyom paga iname piya wage, Eerigin o. Ndi, inigen iigak, aa'nduk inale'nggen paga wonogogwaarak kwak eerogo piige neenok, It yi aakumi ndi aakumi o nggween paga wonogwe yi abok aret inendage tiyappiigwi, inayuk wukwi, Eeko logogun o,” yinuk, yegerak me, yokkiragi o, yoragagerak.