Read Western Dani Agayi 1 Bible Online

Agayi 1 - Western Dani bible

Agayi 1

¹AGAYI WONE Aap Ndariyut endagembogut a'nuk wone lengganogo yorage kagak, tahun ambit eeppunuk, ambi eeke tut 5 penembunuk ambi penenak tanggal 1 ti eyom paga, Aliku ALA nen at yoge kagak yoraga Agayi nogo Ala nen yoge kenok, at Agayi nen aap Teyaletiyen aput o Yekura unde wonage Terubaben nogo inom, aap Yotarak aput Ala unde inowe Yotuwa nogo inom, yoragagerak.

²“At Omaawi Lombok Menggerak Aliku ALA nen yegerak nogo yi aret. It aakumi yi nen yogo logonet, Aliku ALA awi obaane'me wuriyak eyom awo panggoni waga'lek, yogwe, iigirak o, yinuk, yegerak me, yokkiragi o,” yoragagerak.

³Yorage nagagerik, Aliku ALA nen at yoge kagak yoraga Agayi nogo it aakumi yoraawak nduk, yoge logonet,

⁴“It an napuri ti, an nawi wurik langgu-langgu aago wonage kagak, it inawi eyo abe kigirikwe lombok paga nabenogo wuppunuk logorak eyom muk panggoni wagaarak ya? yinuk, yegerak o.

⁵Ari nagaarik, at Omaawi Lombok Menggerak Aliku ALA nen ambinom ari logonet, It eeginabit nage nogo liippogo logowak o.

⁶It awi ambik aret yakwi kwe, anggen mbuuluk mban mbanggologwe, inambi ndonggorogon nunggwi kwe, inaanoma'le aga'lek wonogwe, inaniyo ambik nunggwi kwe, ndonggoppiiga'lek abu mban wonogwe, inayum yikkologwe kwe, ineebe aganggen aga'lek togwi mban inagabolo paga ninggirik wonogwe, yabu eekwi onggo kolagaatak kwe, ngga wangge negen age kogwe, eeko agaarik, yegerak o.

⁷Togop me, at Omaawi Lombok Menggerak Aliku ALA nen ambinom ari logonet,

⁸It eeginabit nage ti, iniki liippogo logowak o. Yogondak aret puut paga lagi nanuk, eyo nggubuninuk an nawi obaane'me wuri woraawak o. Ti wukwi iinok, an nale'nggen inombake, an nendage tiya ari kaawak nduk eeppiige, eeke logogin o, yinuk, Aliku ALA nen aret yegerak o.

⁹At Omaawi Lombok Menggerak Aliku ALA nen ari logonet, Anggen ambik aret mbanggoloorak mbareegwaarak kwe, mbuuluk mban mbanggologwe, ndi, mbuuluk mban mbanggo'nok iname pi wogogwaarak nogo, o wiya nen wonok ma'naruwak nduk, eeppege mbareegi, wonok mappege, eereegerak nogo ti, nonggop nduk eereegerak? Ti eereegerak alom nogo ti, an nawi wurik langgu-langgu aago kagak, it inalitak lombok inawi wukkoloorak kenok mban iniki taganak eerit nugwi ti paga eereegirak o.

¹⁰It eekwi paga mbogut paga nen mayu amburu wuppi waga'lek wonage, ndi, nggween amburu nen yi mendek ndi mendek anggen kole eerogo pega'lek wonage, eeke agaarik o.

¹¹O yi nggween mbuk age, puut-puut eeri lek age, gandum yarak inom, eyo anggur anggen yugu inom, eyo tayitun anggen yugu inom, yi mendek ndi mendek nggween paga yarak abok aret kanenep age, aakumi inamili mbuk age, inaanggumi ineeruwak nuunggu ogwe, aakumi nen ambi kolaawok nduk, nggwiirit-nggwaarit eeko menggaarak kwe, ambi kolaga'lek aret wonogwe, eeruwak nduk, O kibi eeri woraawak o, yinuk, an nen aret wiireegirak, yegerak me, yokkiragi o,” yinuk, yoragagerak.

¹²Yorage mbareegi, at Teyaletiyen aput Terubaben inom, aap Yotarak aput Ala unde inowe Yotuwa inom, it aakumi iniyokan wogogwaarak abok aret inom, Aliku inogoba Ala nen at yoge kagak yoraga Agayi wone yoraawak nduk, nappi wagagerak me, Aliku inogoba Ala yereegerak yoragagerak nogo, inaruk konenggo nogogwaarik, Aliku ALA paga inagabiti mbareegwaarak.

¹³ Inagabiti mbako mbareegwa, aakumi yoraawak nduk, Aliku ALA nen nappi wagagerak Agayi nogo nen at Aliku ALA yoreegerak nogo it yorage logonet, “At Aliku ALA nen, An ninom aret logogin, yegerak o,” yinuk, yoragagerak.

¹⁴Yorage mbareegi, aap Teyaletiyen aput o Yekura unde menggerak Terubaben nogo inom, aap Yotarak aput Ala unde inowe Yotuwa nogo inom, it aakumi iniyokan wogogwaarak abok aret inom, Aliku ALA nen eeriyak inikime mambiige mbareegi, kuwak eeri wogo nogogwaarik, at Omaawi Lombok Menggerak inogoba Aliku Ala awi wuriyak nduk, pigaganeegwaarak.

¹⁵ Ti eereegwaarak nogo ti, aap Ndariyut endagembogut a'nuk, wone lengganogo yorage kagak, tahun ambi eeppunuk ambi eeke tut 5 penembunuk ambi penenak tanggal 24 paga Ala awi wuriyak nduk wareneegwaarak.