Read Western Dani Agayi 2 Bible Online

Agayi 2 - Western Dani bible

Agayi 2

¹Tahun ti paga mban tut 6 penembunuk ambi penenak tanggal 21 ti paga, at Aliku ALA nen at yoge kagak yoraga Agayi nogo nen it aakumi yoraawak nduk, wone yoreegerak nogo yi aret.

²“Kat nen at aap Teyaletiyen aput o Yekura unde menggerak Terubaben inom, at aap Yotarak aput an neebe unde inowe Yotuwa inom, it aakumi iniyokan wogogwaarak abok aret inom, wone yoroorak nogo yi aret.

³ Aa'nduk Ala awi abu iya lombok wurik inigen kogo nogogwaarak aap ambi inenggela'me wonage ilik, lek a? Ndi, yogondak wukwi yi, nonggop kogo agaarik? Abe lek maluk wuko ogoorik, mbaka'lek agaarik ya?

⁴Togop aret kwe, an Nomaawi Lombok Minggirak Naliku ALA ninom aret logogin me, at Terubaben ti, iniki nu'lek eeppunuk logowak o, yinuk, Aliku ALA nen yegerak nogo yoge, at Yotarak aput an neebe unde inowe Yotuwa ti, iniki nu'lek eeppunuk logowak o, yinuk, yegerak nogo yoge, ndi, it aakumi o time menggaarak nogo iniki kwippunuk, yabu eeko logowak o, yinuk, Aliku ALA nen yegerak nogo yorage, eeke logot o.

⁵ It o Metit nen wogoren wundi wage nagagirik, eeko logorak ninom wone abuk nggaruk togon koonogo pereegirak ti aret. An Naberiniki it inenggela'me wonage logogin me, inagabiti mbarugwaarik o.

⁶ Nomaawi Lombok Minggirak Naliku an ALA nen, Logonuk lek aret mbogut-nggween na'ndo-wa'ndo eeke, niyo nggwok yenggenak laut nogo inom, nggween endekenggwe wonage inom, akom langgonogo nappege,

⁷yi aakumi ndi aakumi abok aret iniki a'nggan yumbuk yuwak nduk eeke, eeke neenok, it aakumi inanebunu lombok inamendek abok aret kabologo yime pi woramenggaarak nogo an nen waganogo nawi wurik me time pi unggwage neenok, nawi wurik yi, mondok tiyanak lombok me, aakumi, Wi! yogo logogun o, yinuk, Nomaawi Lombok Minggirak Naliku an ALA nen aret yagi o.

⁸Mbuti perak inom, mbuti emas inom, ti an namendek aret o, yinuk, Nomaawi Lombok Minggirak Naliku ALA nen aret yagi o.

⁹Nomaawi Lombok Minggirak Naliku ALA nen, An nawi aa'nduk wurik nogo ti, mbuuluk iya negen wurik wonagagerak kwe, yogondak wukwi yi perak, mondok iya lombok wuremenggaarak me, an nawi wurik me yime nen iniki ugun tayenak logowak nduk, eerogo piyaagin o, yinuk, Nomaawi Lombok Minggirak Naliku an ALA nen aret yagarak me yoret o,” yinuk, ari mbareegi, yoragagerak.

¹⁰At aap Ndariyut endagembogut a'nuk, wone lengganogo yorage kagak, tahun ambi eeppunuk, ambi eeke tut 8 penembunuk ambi penenak tanggal 24 ti paga, Aliku ALA nen at yoge kagak yoraga Agayi nogo, aakumi yoraawak nduk wone yoreegerak nogo yi aret.

¹¹“Nomaawi Lombok Minggirak Naliku an ALA nen, Aap ambi an nake alik leenak mendek warak mbanak ayuma yonggo'nuk wonok wage kagak, ayum warak mbanak yonggolak nogo paga oroti worarak a, mbiingga larak a, anggur amburu toolak a, tayitun amburu toolak a, yi mendek ndi mendek alik mendek larak a, mbaanggage kenok, ti paga yi mendek ndi mendek ti, alik leenak aret arigin ilik, lek a? yinuk, eeko logorak Muta nen liiru mbaneegerak nogo ngge o? yinuk, it aap neebe unde nogo kin wogiyet o, yinuk, Nomaawi Lombok Minggirak Naliku an ALA nen aret yagi o.” Yoreegerak nogo, at Agayi nen aap Ala unde nogo yorage mbareegi, “Togop arigin lek o,” yinuk, yoreegwaarak.

¹³ Yogo mbareegwa, at Agayi nen ambinom yorage logonet, “Ndi, aap ambi nen aap kanggerak eebe mbaanggage kenok, lu obaga aremenggerak me, yi mendek ndi mendek larak ti, mbaanggage kenok, yi mendek ndi mendek larak abok ti, lu labunik aret arigin ilik, lek a?” Yorage mbareegi, it aap Ala unde nogo nen, “Ti abet aret ubi! Lu aret arigin o.”

¹⁴Yogo mbareegwa, at Agayi nen it yorage logonet, “At Aliku ALA nen, Ti kenok, an napuri yi inom, it an leenogo piyareegirak aakumi yi inom, it togop aret wonogwe iigi o. It yi eekak ndi eekak eerit nugwi inom, yi mendek ndi mendek nake pi wogwe inom, abok aret ti, maluk ogole warak aret agaarak wonage kagi, yegerak me, yokkiragi o,” yinuk, yoragagerak.

¹⁵Yorage mbareegi, ala nen ambi yoge logonet, “Togop me, Naliku ALA nawi wukwi yi, ogowa awo pit naga'lek kagak, aa'nduk nonggop negen wonogogwaarak nogo abeppunuk, ne yogondak yi nen aret nok, peebi eerit noorak nogo iniki liippit nogo logowak o.

¹⁶Aa'nduk it aap nen gandum anggen 20 kuli wakkagak yonggoliyak mbakwi kwe, mbuuluk me, 10 mban wakkagak yonggonggologwe, ndi, anggur amburu 50 kuli wakkagak tooliyak mbakwi kwe, mbuuluk me, 20 mban wakkagak tookkologwe, eeko nogogwaarak nogo o.

¹⁷It yabu nggwiirit-nggwaarit eerit nugwi paga anggen abe mbanggolookwak, anggen yugu waalo nen nengge, ogun eerogo pit nage, mayu kumulinggen nen yigirogo pege, eeruwak nduk, an nen nappi wagagirak paga, Yi ee'ninake iya, yinuk, iniyokan yungguninuk an mu'neren woroorak mbareegirak kwe, mu'neren woroolik aret eereegwaarak o, yinuk, Naliku ALA nen aret yagi o.

¹⁸Aliku ALA awi wuriyak ogowa ne yogondak yi aret pogo o, yinuk, tut 9 penenak tanggal 24 ne yogondak yi kuli nen nok, eerit noorak nogo iniki liippit nogo logowak o.

¹⁹O aa'nduk nen nok, yogondak kuli eyo anggur anggen inom, eyo wuli anggen inom, eyo delima anggen inom, eyo tayitun anggen inom, yega'lek aret wonage me, yariyak anggen awi pugu ambi wonage ilik, lek a? Liippuwak o. Wonage lek aret kwe, o yogondak yi kuli nen an nale'nggen inoba piige logonet, wogorage logogin, yegerak me, yokkiragi o,” yinuk, yoragagerak.

²⁰It aap Ala unde yoroorak, yoreegerak nogo yorage mbareegi, tut 9 penenak tanggal 24 ti paga mban at Aliku ALA nen at Agayi yoreegerak nogo yi aret.

²¹“At o Yekura unde menggerak Terubaben nogo yoge logonet, Naliku ALA nen mbogut-nggween na'ndo-wa'ndo eeke,

²²it aakumi inoweewi inendagembogut kwi'ndak logonet, wone lengganogo yorogo menggam abut laganogo pege, it aakumi inambik inanebunu lombok inabu'me piinok, wone lengganogo yorogo menggaarak inomaawi nogo, lek eerogo pege, inanggweendo abut laganogo wuppege logonet, aap wonok nega nogo u'ngguluk wuppege, eeke neegak, it-it inawooluwak paga wat-wat yogo logonet, inaguda inom, it kuda wonok nega nogo inom, inooremenggaarak kambit nogo logogun o.

²³At Omaawi Lombok Menggerak Aliku ALA nen ari logonet, Ne ti eyom paga an Naliku ALA nen at Teyaletiyen aput an nayeloman Terubaben nogo, nobaane'me wone lengganogo yorage logowak nduk, leenogo piminggirak me, amburu cap eekak aap endagembogut eenggi oolo paga yirik menggi kwak, an namberaarenggen negen at eenggi paga yippigin o, yinuk, Nomaawi Lombok Minggirak Naliku an ALA nen aret yagarak me yoru o, yinuk, yegerak me, yokkigi o,” yoreegerak.