Read Western Dani Takariya 1 Bible Online

Takariya 1 - Western Dani bible

Takariya 1

¹TAKARIYA WONE Aap Ndariyut endagembogut a'nuk, wone lengganogo yorage kagak, tahun ambi eeppunuk, ambi eeke tut 7 penembunuk, ambi penenak paga Aliku ALA nen at yoge kagak yoraga aap Iro ombooluk Mberekiya aput Takariya nogo wone yoreegerak.

²Aliku ALA nen at yoge logonet, “Naliku an ALA nanini alik negen it kombomini inoba wonagagirak o.

³Togop aret me, At Omaawi Lombok Menggerak Aliku ALA nen wone ndogop yegerak o, yinuk, it aakumi yoroorak nogo yi aret o. At Omaawi Lombok Menggerak Aliku ALA nen ari logonet, It iniyokan yungguninuk woraanuk, ina koonogo pe'neyaawak o. Ina koonogo pe'neegwi iinok, Nomaawi Lombok Minggirak Naliku an ALA nen nena koonogo pegiyaagin o, yinuk, Nomaawi Lombok Minggirak Naliku ALA nen aret yagi o.

⁴It aap an Ala nen yorage neegak yoraga nen aa'nduk togon it kombomini yorogo logonet, At Omaawi Lombok Menggerak Aliku ALA nen, Ineraambe maluk menggaarak inom, maluk eerit nugu menggaarak inom, mbo punuk, an mu'neren woraawak, yegerak o, yinuk, yorogo nogogwaarak kwe, it nen an noone inaruk konenggwi, liippugwi, eeriyak ineebi mbako nogogwa kwak, it togop eeko logogwaarik o, yinuk, Naliku ALA nen aret yagi o.

⁵It kombomini nogo, yogondak nggeeme wonogo agaarik? Ndi, it an nen yorage neegak yorogo nogogwaarak nogo, kangga'lek ineenik mondok-mondok wonogo agaarik ya?

⁶An noone ari, wone lengganogo pege, eeke nagagirak nogo, it wone yorage neegak, yoraga nayeloman mini nen yorogo logowak nduk, wone lengganogo yoragagirak nogo, kombomini ndak-ndak eeppiige neyareegwaarak, ilik, lek a? Ti eeke neenok, inomaluk mbo punuk, yogo logonet, Nit nineraambe maluk logonet eerit nugwi, nit maluk lombok eerit nugwi, eeko monggoorak nogo, at Omaawi Lombok Menggerak Aliku ALA nen onggo eeppinaniyak kooneegerak nogo ndak-ndak eeppinanege me, op aret, yereegwaarak nogo lek a? yinuk, yoret,” yegerak me, yokkiragi o, yoragagerak.

⁷Aap Ndariyut endagembogut a'nuk, wone lengganogo yorage kagak, tahun ambi eeppunuk, ambi eeke tut 10 penembunuk, ambi tut endage Tiyebat penenak tanggal 24 paga, at Aliku ALA nen aap Iro ombooluk aap Mberekiya aput Takariya yoreegerak nogo yi aret.

⁸ Ne ambi oonikiya nabinggaanggo paga kage logonet, aap ambi kuda maangga kunik amborowak paga kwi'ndak eyo nggonggoondu kunik me alu'me time mi'ndak wonage kagak, ambokan yi kuda ndi kuda ando maangga kunik, ando maangga amu kunik, ando yanggwi kunik, eerak wonogwe iigirak o.

⁹Iige nagarik, an nen, “Nogoba o. Kuda iigirak ti, wone eebe ngge o?” Yoge mbaki, at nimbirak wone mbangge malayikat nogo nen an yo'nege logonet, “Wone eebe nogo, ari kaamunggun o.”

¹⁰Yo'nege mbaki, aap eyo nggonggoondu kunik me mi'ndak wonagaarak nogo nen ari logonet, “O nggween paga yime maloppiinet nogo logowak nduk, Aliku ALA nen it yi abok aret nappiya wagaarak o,” yinuk, yoge kagarak.

¹¹It inigen kagaarak nogo nen at Aliku ALA nen nappi wagaarak eyo nggonggoondu enggela'me mi'ndak wonage nogo yogo logonet, “Nit o nggween paga yime abok aret maloppiinet nugu logonet it aakumi abok aret iniki ugun tayenak inale'nggen paga wonogwe iigoorak o.”

¹²Yogo mbaka, Aliku ALA nappi wagaarak malayikat nogo nen ari logonet, “Komaawi Lombok Menggendak Kaliku ALA wae. O Yerutalem menggaarak inom, o Yekura kota-kota wonogwe inom, kanini inoba piige keegak, tahun 70 eereegerak ti, inabuwa mbaka'lek wonage keegak, ne mande ari nagin o,” yinuk, yoge kagarak.

¹³Yoge mbaki, Aliku ALA nen oone yanggorogon yoge, iniki eyak wappiyoorak wone yoge, eeke kagarak o.

¹⁴Kage mbaki, at malayikat an yo'nege nogo nen ari logonet, “Wone yorage logorak nogo yi aret o. At Omaawi Lombok Menggerak Aliku ALA nen ari logonet, O Yerutalem inom, puut Tiyon inom, niniki kundugu lombok eeke logonet, obeelom eerogo pigin kwe,

¹⁵it yi aakumi ndi aakumi nen, Nit ugun obeelom aret wonogwe, mbakwi nogo, an nanini lombok inoba kwippiyoorak mbake agaarik o. Aa'nduk nanini mbuuluk eeppiyoorak mbareegirak kwe, eerit nugwi ti paga nanini nggwok lombok inoba kwippiyoorak mbake agarik, yegerak o.

¹⁶Togop aret me, Aliku ALA nen yegerak nogo yi aret. An nen o Yerutalem ne ambinom nena koonogo pegiige logonet, inabuwa mbake, an nawi obaane'me time wuruwak nduk, eeppiige, ndi, keele wakkagak paga o Yerutalem ngginogo nappege, eerigin o, yinuk, at Omaawi Lombok Menggerak Aliku ALA nen aret yegerak yoret o.

¹⁷Ndi, ambi yoroorak nogo yi aret. At Omaawi Lombok Menggerak Aliku ALA nen ari logonet, An nawi kota-kota paga yi mendek ndi mendek ambik abe mban kalo logonak ngginu-ngginu wangge kagak, Naliku ALA nen it Tiyon mendek iniki eyak wappiige, ndi, an name o Yerutalem logokit nduk unde eekkolage, eerigin, yegerak, yoret o,” yinuk, yo'nege kagarak.

¹⁸Ti'nuk, an nenegen tiya ari nagarik, eyak 4 wonage kagarak.

¹⁹Kage nagarik, at malayikat an nimbirak wone mbangge nogo yoge logonet, “Eyak yi, wone eebe ngge o?” Yoge mbaki, at nen wone onggo an yo'nege logonet, “Eyak yi nen it aakumi Yekura mendek inom, Iterali mendek inom, Yerutalem mendek inom, mappiyareegwaarak nogo aret kagan o.”

²⁰Yo'nege mbaki, Aliku ALA nen aap mbuti mendek paga eeka ineebe 4 titi'nereegerak.

²¹Titi'nege mbaki, an nen at yoge logonet, “Aap yi, nano eeruwak nduk wagaarak mbaken?” Yoge mbaki, at nen an yo'nege logonet, “Lek o. It Yekura mendek ambi pilak yogwe iyo, eyak 4 to aago yi aret kwe, eyak yi nogo inagabiti mbakwi, ndi, eyak to ari kwak, yi aakumi ndi aakumi inomaawi paga o Yekura tebenogo piinok, ineebe nappiyaawak nduk, eereegwaarak nogo yigirogo piigwi, eeruwak nduk, wagaarak ineebe 4 nogo ti aret o,” yinuk, yo'nege kagarak.