Read Western Dani Takariya 10 Bible Online

Takariya 10 - Western Dani bible

Takariya 10

¹O mayu nggwok woraawak nduk, Aliku ALA nen ndugwi kuwak eerogo pege, It aakumi inalitak inake mayu nggwok wogorage, Mayu wogoramenggerak paga yi mendek ndi mendek yarak nogo obeelom eerogo pege, Eeke menggerak me, Yi mendek ndi mendek agarit larit nage eyom paga mayu woraawak nduk, Aliku ALA nggino yogo logonip o.

² Inagugi nen yorogwe nogo ti, abe yorogwe lek pilit pugunogo yorogwe, Aap tili pagangga nen inoone yogwe nogo, maluk aret age, It aap inabinggaanggo paga inigen kagaatak yorogwe nogo, mbeyok ari, Eeke menggerak me, Ti mendek wone yogwe ti, iniki eyak wappiyoorak lek kagak we aanom warogo aret yorogo menggaarak o. Aap ndomba ndegeninaka eebe lek kenok, ndomba ineebenowak ko eerogo piige menggi kwak, It aakumi ti, togop aret mak aago nugu menggaarak o.

³At Aliku ALA nen ari logonet, “Nomaawi Lombok Minggirak Naliku an ALA nen nandomba it Yekura paga wiganak nogo liippiige, Wim eeko logonet, kuda agabiti mbaka'lek nege kenok, Wi! ugu mengga kwak eerogo piige, Eerigin me, It aap ndomba ndegeninaka kwak napuri inarum wonogwe ti, nanini lombok inombake, It aakumi inoweewi ti, maluk onggo inoba kwippiige, Eerigin o.

⁴Eerogo piige neenok, it Yekura paga yugum ogowa pugu kwak ari wogwe, Ooliya eyak wurabak kwak wogwe, Wim nambuka yigin kwak wogwe, Wone lengganogo yoraga nogo abok aret kin ari wagak yogwe, Eerugun o.

⁵It lambuk togon wim kalu-kalu kwak eerit nogo logonet, Aakumi iniyok tu paga purok amok mbanogo pit nugu mengga kwak, aakumi togop aret eerogo piinet nugwi, Naliku ALA ninom wonage me, It wim eerit nogo logonet, inawim kuda paga kwi'na'nuk nugwi nogo, tebenogo piinet nugwi, Eeko logogun o.

⁶It Yekura paga wiganak mendek nogo inomaawi eeppiige, It aap Yutup paga wiganak mendek inagap ndarogo piige, Eerogo piige logominggirik, Inabuwa nen wogoren iniyokan iname piya woraagin o. Piya wage logominggirik, Naliku inogoba Ala an aret a'nuk, wonage logogin o. Ndi, an mbo piyareegirak kwe, mbo piyoolik negen eerogo piyaagin me, It nggino yo'nugwi iinok, inoone konengge logogin o.

⁷It Eparayim mendek aap wim kalu-kalu kwak ogwe, Anggur amburu nenok, inale'nggen mbakwi kwak, iniki ale'nggen mbakwi, eekwi nogo, Inapuri nen inigen iigo logomenggaarik, it kunduk, inale'nggen mbakwi, At Aliku ALA nen eerogo piigerak ti iya, yinuk, inale'nggen nen ndawi lubuk yogwe, Eeko logogun o.

⁸An abet aret wondet eerogo piyaagin o. Wondet eerogo piige logominggirik, Woraawak nduk neenggi walok yorage, kuwak eerogo piige, Eeke neenok, It aa'nduk wonogogwa kwak, ineebe ambik lombok arugun o.

⁹An nen it ineebe waganogo yi aakumi ndi aakumi inenggela'me nappiyaminggirak kwe, O nda time wonogo logonet, an abe'nako logogun o. It inapuri inom ineebe op aret logomenggaarik, ti'nuk, iniyokan iname woraagun o.

¹⁰O Metit nen iniyokan wogoren wage, O Atiyut nen kuwak eerogo piya wage, Eeke logominggirik, O Nggileyat inom, o Libanon inom, time piinet nagin me, It o time logorak tenak ambi lek yagabit aret arigin o.

¹¹Niyo kole yenggenak laut kilaarak-mogonik eeke kenok, wunda noorak inagabiti mbako mengga kwak, Iniki aaninggin wonogwe iinok, an nen iniki tayenogo piige, Niyo Nin porok yegetak me, iniki te wunda nogo mengga kwak, eerogo piige, Eerigin o. It Atiyut mendek nen, Nit iya o, yinuk, iniki tiyappatit nugwi nogo, an nen tebenogo piige, Ndi, it Metit mendek inambim mbanak ineenggime logonet, inabu'me piinok menggam nogo omaawi lek eerogo pege, Eerigin o.

¹²Naliku ALA an aret me, an napuri inomaawi eeppiige neenok, An nendage kumbunuk, inale'nggen paga eerit nogo logogun o,” yinuk, Aliku ALA nen aret yegerak o.