Read Western Dani Takariya 14 Bible Online

Takariya 14 - Western Dani bible

Takariya 14

¹Kinigen kiigak, kinamendek kugun waganogo tumbukkologo logorak eyom Aliku ALA nen koonogo pereegerak nogo aret ari woraagin o.

²Ne ti paga it o Yerutalem tebenogo puwak nduk, aakumi inanebunu lombok abok aret at nen kuwak eerogo piyamenggerak o kota ti paga kwi'nari unggwogo logonet, o wurik me unggwit nanuk, inamendek kabelogo kologwe, kumi kwa yogwe iigak eeginabit nogwe, eeko logomenggaarik, it kota time wonogwe ando nogo, kugun wogoren o nda piya nogo logonet, it ando o kota time logowak nduk, mbo piyaagun o.

³Ti eekwi iinok, Aliku ALA wundi nanuk, wim eekwi iinok eeke menggi kwak, it yi aakumi ndi aakumi ti, inom wim perenggolaagin o.

⁴Ne ti paga at iyok o Yerutalem oonegen wundi wage menggim pa'nggwe puut Tayitun paga pi wambi wage kagak, puut Tayitun ti, oonegen wundi wage menggim pa'nggwe nen nok, oonegen kilu yi nage menggim pa'nggwe nggoguk ari mbaremenggi, puut peenok nggaganak langgo narok o omarip paga pa'nggwe ari nage, peenok nggaganak nogo langgo narok o ame pa'nggwe ari nage, eeke kagak, oolo time kobak kole aret nonggologo pigin o.

⁵Ti eeke kenok, o kobak nonggologo pemenggerak ti, kota Yerutalem nen nok, o Atat kuli ari nagin me, aap Yekura mendek inowe endagembogut Utiya wonage eyom paga, o mi nuk-nuk eeke kenok, mbaganeegutak togop nogo aret tu ti paga mbaganumunggup o. Mbaganggwi kiigak, Aliku an nogoba Ala nogo, it kikak naka'lek alik leenak menggaarak abok aret inom wambi woraagun o.

⁶Wogwe ne ti eyom paga oonegen eya inom, tut eya inom, laaluguragan eya inom, logogin lek aret kwe, eya eerak mban logogin o.

⁷Ne ti alik lombok eerogo pigin me, o weege, o kiip age, eeke nogo lek age logonet, o liingge mban aret logogin o. Ti eeriyak nogo ti, Aliku ALA eenu menggerak o.

⁸ Ne ti paga niyo ineenik aganake logorak o Yerutalem paga nen wungge logomenggerik, mogonogo ando oonegen lagi wage menggim pa'nggwe laut paga kuni nage, ando oonegen kilu yi nage menggim pa'nggwe laut paga kuni nage, eeke kagak, o kibi age, o mayu wage, eeke logogin o.

⁹Aliku ALA nogo o nggween paga yime abok aret inowe endagembogut a'nuk, wone lengganogo yorage logogin o. Ne ti paga inogoba ambit Aliku ALA aret arigin me, at endage mban yogo logogun o.

¹⁰O Nggeba nen nok, kota Yerutalem ambokan o ame pa'nggwe kota Irimon kuli nggween ti abok aret, o Araba-Yoraran kobak nabunogo pereegi kwak eerogo pigin kwe, o kota Yerutalem perak, tu unggwogo menggam endage, Mbeniyamin, kuli nen nok, tu unggwogo menggam endage, Aa'nduk, kuli nen nok, tu unggwogo menggam, Unggu'me, kuli nen nok, o nggorek wurik Kananen kuli nen nok, aap endagembogut ake anggur aambiranggo menggam kuli, tiyarogon menggerak ndak-ndak aret eerogo pigin o.

¹¹ O kota Yerutalem ti, aa'nduk maluk eerogo pogo nogogwa kwak ambinom eerogo pugun lek mondok nu'lek aret logogin me, o kota time aakumi iniki ugun tayenak wonogo logogun o.

¹²Aliku ALA nen it yi aakumi ndi aakumi abok aret o Yerutalem mendek inom wim namburiyak nduk unggwi woraagun nogo, kugilingga inoba piyaagin nogo yi aret. It awo ineenik nugwi iigak, inagabolo nggono-nggono wangge, inigen alome pili age, inamili pili a'nuk inambeme inobari ndi wuke, aganake logorak mendek inoba kwippiyaagin ti aret.

¹³Ne ti paga Aliku ALA nen it aakumi ti, iniki naga'nuk kobak eerogo piige kenok, inalitik-inalitak inoreewi inom ineenggi pippit a'nuk, wat-wat yogo logogun o.

¹⁴It Yekura mendek kunduk, it Yerutalem mendek inom wim nambuko logogun o. It aakumi inaagan-inambokan wonogwe nogo abok aret inamendek mbuti emas inom, mbuti perak inom, yum inom, ineenggi lingginiyak meek mondok iya lombok kuwak eekkologo logogun o.

¹⁵Kugilingga ti mendek nen kuda inom, kuda mendek bagal inom, unta inom, keledai inom, inaanggumi inawooliyana wonogwe nogo abok aret inoba kwi'narigin o.

¹⁶ Togop aret eeke kenok, it yi aakumi ndi aakumi o Yerutalem wim eeri unggwogo logonet, yumbunogo piyamenggaarak wonogwe nogo, abok aret nen yi tahun ndi tahun paga inowe endagembogut at Omaawi Lombok Menggerak Aliku ALA nogo alut eekwi, inawooliya wurit wogogwaarak aberogo laago lariyak nogo lakwi, eeko logogun o.

¹⁷Ndi, it yi aakumi ndi aakumi o nggween paga yime logogun nogo, inowe endagembogut at Omaawi Lombok Menggerak Aliku ALA alut eeruwok nduk, o Yerutalem wogwe lek iinok perak, it menggam o mayu wambi waga'lek aret logogin o.

¹⁸Ndi, it Metit mendek nogo inom laago lari wogwe lek iinok, it menggam kunduk mayu waga'lek aret logogin mban. It yi aakumi ndi aakumi nen it Iterali mendek inawooliya wurit wogogwaarak aberogo laago lariyak o Yerutalem wogwe lek iinok, Aliku ALA nen kugilingga inoba kwippiyaagin nogo, o Metit mendek kunduk inoba kwippiyaagin o.

¹⁹Ti eerogo piyaagin nogo ti, it Metit mendek inom, yi aakumi ndi aakumi abok aret inom, Iterali mendek inawooliya wurit wogogwaarak aberogo laago lariyak nogo, inom lari wogwe lek iinok, aaninggin inoba kwippiyoorak nogo ti aret.

²⁰Ne ti paga oone lobale eekak kuda paga pugunik nogo paga, Aliku ALA ake leenak o, yinuk, ayo waganogo pugwi, ndi, kuwali-kuwali Aliku ALA awi wurik me wonage nogo ti, togolowak alik leenak ake warogo kani kunggo menggam enaame pugwi kwak, pugwi, eerugun o.

²¹Yi togolowak ndi togolowak lakak o kota Yerutalem wonage inom, o Yekura wonage inom, abok aret at Omaawi Lombok Menggerak Aliku ALA ake leenak logogin me, it aakumi abok aret Ala ake warogo wogoruwok nduk, woraanuk, togolowak ti, waganogo ti paga lako logogun o. Ndi, ne ti paga aap yi mendek ndi mendek kunit nega nogo, at Omaawi Lombok Menggerak Aliku ALA awi wurik me time inamendek kunggo logogun mondok lek aret o.