Read Western Dani Takariya 4 Bible Online

Takariya 4 - Western Dani bible

Takariya 4

¹Aap ambi nogo yege me, eenik eeppogo mengga kwak, at nimbirak wone mbanggoorak malayikat nogo iyokan ne ambi neya wage nagaarik, an neenik eeppaninuk,

²yo'nege logonet, “Kat nano kenegen kage agandik?” Yo'nege mbaki, an nen at yoge logonet, “Ndi wuninogo pegak ambi mbuti emas paga mban ogobakkigirik me, yigani tookak irip paga kwippugu ti paga ndi wuninggak 7 wonage, ndi, ndi wuninggak 7 alitik-alitak ti paga keele 7 mban pugu wonage,

³ ndi, yigani tookak eeben peenok-peenok paga eyo tayitun ogut aago nabenak wonage, eerak wonage kagarak,” yogirak.

⁴Yoge nagarik, at nimbirak wone mbangge malayikat nogo yoge logonet, “Nogoba o. Eerak abok yi, wone eebe ngge o?”

⁵Yoge mbaki, at nen an yo'nege logonet, “Eerak yi, wone eebe kat keenggo'lek ya?” Yo'nege mbaki, an nen, “Nogoba o. An neenggo'lek aret o.”

⁶ Yoge mbaki, at nen an yo'nege logonet, “At Aliku ALA nen at Terubaben yoriyak yo'negerak nogo yi aret. At alilaakwi paga, at omaawi paga, eerigin lek o. Ata, an Naberiniki paga eeppege neegak eerigin o, yinuk, at Omaawi Lombok Menggerak Aliku ALA nen aret yegerak, yoru o.

⁷Togop me, puut nggorek kat yi wae. An nomaawi ambik, mbake keegak, at Terubaben wage logonet, kat yanggunogo paganuk, kobappaga eerogo pagagin o. Kobappaga eerogo paganuk, yugum aa'nduk lombok ogowa kwippege kagak, aakumi keekok yogo logonet, Ala ale'nggen koba wonage o. Ala ale'nggen koba wonage o, yinuk, at yorugun o,” yinuk, puut nogo yoge kagarak o.

⁸Kage mbaki, Aliku ALA nen an yo'nege logonet,

⁹“At Terubaben nen an nawi yi, ogowa kwippit nagagerak me, at nen aret eebe obaga aret wurogo pigin o. Ti wurogo pege kenok, it an napuri nen, At Omaawi Lombok Menggerak Aliku ALA nen abet aret Takariya wone yo'niraawak nduk, nappi wagaarak kogo o, yinuk, yugun o.

¹⁰ Togop me, It elaambirik wukwi yi, aret wurugun lek kogo o, yinuk, meek mbakwi ti, taani o? Keele wakkagak aap Terubaben eenggime wonage inigen kogo logonet, inale'nggen mbako logogun o,” yinuk, yo'nege kagarak. Ndi, “Ndi wuninggak 7 ti, Aliku ALA enegen o nggween paga yime abok aret looge wonage nogo aret o.”

¹¹ Yo'nege mbaki, an nen at malayikat nogo yoge logonet, “Ndi, ndi wuninogo pegak ogobakkigirik eeben peenok-peenok paga eyo tayitun mbere nabenak ti, wone eebe ngge o?”

¹²Yoge nagarik, ambinom at kin wakkage logonet, “Tayitun amburu toologo ndi paga mambit naga mbuti emas paga ogobakkigirik mbere eraanu, eyo tayitun eno'mbak mbere nogo ti, wone eebe ngge o?”

¹³Yoge mbaki, at nen an yo'nege logonet, “Eyo tayitun eno'mbak mbere nogo, wone eebe kat keenggo'lek ya?” Yo'nege mbaki, an nen, “Nogoba o. Wone ti, eebe an neenggo'lek aret o.”

¹⁴Yoge mbaki, at nen an yo'nege logonet, “Eno'mbak mbere nogo ti, o nggween yi abok aret unde menggerak Aliku ALA ake eeko logowak nduk, amburu eerogo mippiyareegerak aap mbere yi aret o,” yinuk, yo'nege kagarak.