Read Western Dani Takariya 5 Bible Online

Takariya 5 - Western Dani bible

Takariya 5

¹Ti'nuk, ne ambi nena tiya ari nagarik, mbuku pirik-perek aago o oolo ya'i wonok nage nenegen kagarak.

²Kage mbaki, at nen an yo'nege logonet, “Nano mendek kenegen kage agandik?” Yo'nege mbaki, an nen at yoge logonet, “Mbuku pirik-perek aago irip nggorek metet 10, ndi, eebe tabak ti, metet 5 negen wonage me, o oolo ya'i wonok nage kagarak o.”

³Yoge mbaki, at nen an yo'nege logonet, “Mbuku pirik-perek aago abeenok paga mbanak nogo ti, aap yogoot kumaaka o yime nen inenggaawak lek eerogo piyoorak wone mbanak wonage, ndi, abeenok paga it aap pilit kagak, Abet aret o, yinuk, kumbuk mbanggwi nogo, o yime nen inenggaawak lek eerogo piyoorak wone mbanak wonage, eerak me, kenegen kagandak yi ti, pulunogo piyoorak wone nogo aret mbanak me, o yime abok aret wigannarit nage logogin o.

⁴At Omaawi Lombok Menggerak Aliku ALA nen ari logonet, Pulunogo piyoorak wone yi, nappiminggirak it aap kumaaka inawi wurik me inom, it aap an nendage kumbunuk, pilit kagak, Abet aret o, yinuk, kumbuk mbangga inawi wurik me inom, unggwi nanuk, it inawi yinik-minik eerogo pege logonet, eyo inom, yugum inom, pup eerogo pigin, yegerak me, yokkigi o,” yinuk, yo'nege kagarak.

⁵Ti'nuk, at nimbirak wone mbangge malayikat nogo nen wage nagaarik, an yo'nege logonet, “Ti nano kin age kaanok nduk, kena tiya yinuk pekket o.”

⁶Yo'nege mbaki, an nen, “Ti nano?” Yoge mbaki, at nen an yo'nege logonet, “Wakkagak muun yarak aret o.” Yo'nege nagaarik, ambi yo'nege logonet, “Yi ti, aakumi o yime wonogwe inomaluk nogo aret yonggolak kagan o.”

⁷Yo'nege nagaarik, abit mbuti timah mili paga eerak nogo ponggonogo pege mbaki, muun yarak nogome kwe ambi yonggolak kwi'ndak wonage kagarak.

⁸Kage neegak, at nen an yo'nege logonet, “Yi maluk ndi maluk wakkagak kwe yi aret o,” yinuk, ari kagak, kwe nogo pilak yikit nduk eeke me, uut tebenogo pege nagaarik, abit mbuti timah mili paga eerak nogo narogo pege kagarak.

⁹Ti'nuk, nena tiya ari nagarik, kumi mbere ina'naabit towe nggin ina'naabit aago kwak me, ina'naabit wiganogo punuk, o wiya wake kagak, it kumi nen muun yarak nogo wonok, mbogut agi kagak, nggween ogu kagak, o oolo ya'i pi laganggwi iigirak.

¹⁰Iige nagarik, at nimbirak wone mbangge malayikat nogo yoge logonet, “Muun yarak wonok nogwe ti, nggeeme pi nogo agaarik o?”

¹¹Yoge mbaki, at nen, “Kwe ti, awi wurogo puwak nduk, o Mbaben pi nogo agaarik o. At awi time abu wurogo punuk, muun yarak logowam time aret logowak nduk pugun o,” yinuk, an yo'nege kagarak.