Read Western Dani Maleyaki 3 Bible Online

Maleyaki 3 - Western Dani bible

Maleyaki 3

¹ At Omaawi Lombok Menggerak Aliku ALA nen ari logonet, “An woraawam tu yarogo panuwak nduk, nayonggo nappi wage neyaagun o. Tu yarogo panege kenok, Ninogoba woraawak lak, ao, mbakwi nogo, nawi wurik me time unggwi nage, ndi, at inom wone abuk nggaruk togon koonogo puwak nduk, Nappi woroorak, mbakwi nogo, abera'lek me aret wage, eerigin o,” yinuk, yegerak.

² Woraagin aret me, aap mbuti at mendek mban aruwak nduk kani woraka kwak, aap yum kooka erabun omaawi ambik kwak, eerogo piyaakit nduk woraagin me, wage ti eyom paga aap ta nen ko wappunuk wonage, kin ari wage eyom ti paga aap ta nen ogogumbuk mi'ndak puk wonage, eerigin mbakop? Lek aret o.

³Mbuti perak at mendek mban age, abinak age, eeruwak nduk, aap kani woraka kwak a'nuk, eeppiige logogin o. Mbuti emas inom, mbuti perak inom, enete abinak aruwak nduk, kani worako mengga kwak, it Lewi mendek togop aret eerogo piige kenok, ake wogiri wogwe nogo ti, iniki ale'nggen paga wagangge nogo mendek ake pi wogo logogun o.

⁴Ndi, o maan aa'nduk togon yi tahun ndi tahun eeke kagak, nake warogo wogiri wogwe iinok, ale'nggen nen wagangge nagagi kwak, ne ti eyom paga it Yekura mendek inom, it kota Yerutalem mendek inom, Aliku ALA ake warogo wogiri wogwe ti, ale'nggen nen wagangge logogin o.

⁵“An nen inowak loonogo maluk onggo eeppiyaakit nduk woraagin o. Wage logominggirik, it aap tili pagangga inom, aap kumi ugun-ugun eeginaka inom, pilit pugunogo, Ndogop eeke kagarak, yaga inom, onggo koloorak eyabu eekwi wi-wi eeginaka inom, it aap kumi togwe kunduk, elege moono kunduk, tebenogo piiga inom, it aap nggiru inawone yaga-taga eerogo piiga inom, it an inagabiti nombakulik nogo mendek abok aret, Ndogop eekwi kiigirak o, yinuk, yorage logokit nduk, woraagin o,” yinuk, at Omaawi Lombok Menggerak Aliku ALA nen aret yegerak me, yokkiragi o.

⁶“Naliku an ALA alik ageelik nitok minggirak o. Alom ti paga it Yakup paga wiganak nogo lek eerogo piiga'lek aret wonogo agaarik o.

⁷It inombomini nda'nogogwaarak kuli nen nok, yogondak kuli, eeko logorak wone lengganogo yorage minggirak nogo, ndak-ndak eeka'lek mbo pogo menggaarak me, it yogondak ina koonogo an pe'neegwi iinok, an kunduk, nena koonogo pegiyaagin o,” yinuk, at Omaawi Lombok Menggerak Aliku ALA nen aret yegerak o. “Togop eeko logonet kwe, it nen yogo logonet, Nit nonggop togon ninena koonogo at pekkoorak me, yigi, yinuk, yogwe iigi o. Ti yogwe nogo an yora.

⁸Aap ambi nen an Ala wi-wi ee'naburak op mbakwi ya? Togop ee'naburak meek kwe, it nen aret wi-wi ee'nako agaarik o. It wi-wi ee'nako logonet kwe, Nit nonggop togon agago at wi-wi eekoorak me yigi, yinuk, yo'nugwi iigi o. An wi-wi ee'nakwi nogo ti, inamendek 10 wonage kenok, ambi yendenogo nake leenogo pugwi, nake pi wogwe, eeko logonet, wi-wi ee'nakwi iinok, yagi o.

⁹It abok aret nen an wi-wi ee'nakwi me, it aakumi ti abok aret pulunogo piyareegirak wonogo agaarik o.

¹⁰ Togop eerak logokwak, inamendek 10 wonage kenok, ambi yendenogo punuk, enaani aret an nake pugu pogo menggam pi wogo logowak o. Pi wogwe iinok, an nawi wurik me yabu eeka nogo inambi endak aret nunggo logogun o. Nake pugu nogo it aakumi pi wogo logonet, At nen mbogut paga tu paarogo pit nanuk, ale'nggen nen yi mendek ndi mendek ngginu-ngginu eerogo wuppinani woramenggerak paga niname yagabit age kenok, Eegu ngga patuwi o, yinuk, yuurak ee'ninake kaamun ilik, lek a? yinuk, an nabut mbanggo logonet pi wogo logowak o.

¹¹Ti eekwi iinok, inambi yarak waalo pune nen nenet nugwi, inageyo anggur awi yarak anggen yugu mono-mono wangge, eeke kero, an arum wonage logogin o,” yinuk, at Omaawi Lombok Menggerak Aliku ALA nen aret yegerak o.

¹²“Ti eerogo piminggirak paga it iname time abu obeelom mban wonage kenok, aakumi inanebunu lombok abok aret nen yogo logonet, It inale'nggen paga wonogwe ti kwak ninom op logone, yinuk, yogo logogun o,” yinuk, at Omaawi Lombok Menggerak Aliku ALA nen aret yegerak me, yokkiragi o.

¹³Aliku ALA nen ari logonet, “Inoone andiigwi yo'nogo logonet kwe, Nit ninoone andiigwi ngge yogoorak me, yigi, yinuk, yogwe iigi o.

¹⁴Inoone andiigwi yo'nugwi nogo ti, At ayuk wuko logonet, alut eeko monggoorak nogo ti, we aanom warogo aret eeko monggoorak o. Yogop ee'nu ndogop ee'nu, at yo'nirage nogo eerit nugwi, at Omaawi Lombok Menggerak Aliku ALA enegen kagak, maluk eeko nogogurak paga niniki wakko'net nogwe, eeko monggoorak nogo ti, nano eekkolaawok nduk, eeko ogoorik? Lek aret o.

¹⁵It aap maluk eeko menggaarak ti, ineenggi warak ogwe, it aap nen, Ala maluk eeppanege kaamun ilik? yinuk, maluk eekwi kwe, ineebe op mban wonogwe, eekwi iigwi me, o yogondak nen it aap iniki wogoppakwi ti, inale'nggen mbako menggaarak yogo logogun, yogwe ti paga niniki andi negen eerogo panugo agaarik o,” yinuk, yegerak me, yokkiragi o.

¹⁶Yorage nagagerik, it aap Aliku ALA inagabiti mbako nogogwaarak nogo nen it-it wone mbanggo logonet, it nen yogwi iinok, at Aliku ALA liippege, aruk konengge, eereegerak o. It aap Aliku ALA inagabiti mbakwi, at endage tiyappogo logonet ayuk wukwi, eeko nogogwaarak nogo inendage aberak logowak nduk, at Aliku ALA enggaanom paga mbuku pirik-perek aago paga inendage liiru mbanogo pereegwaarak.

¹⁷Mbanogo pogo mbareegwa, at Omaawi Lombok Menggerak Aliku ALA nen ari logonet, “It aap ti, an napuri aret logogun o. It aakumi koonogo piyoorak wage eyom paga it aap ti, an napuri niniki kundugu aret me, aap ambi aput oone konembunuk eeke kenok, ogoba nogo apuluk abuwa nen ili ari menggi kwak, an togop aret eerogo piyaagin o.

¹⁸Ti eeke neenok, it aakumi iniki abe koonak logonet, eeka inom, inobaabut nggolawe logonet, maluk eeka inom, inalitak eekwi paga eeppiige, ndi, it nayuk wuko logonet, noone mugurok nogwe inom, nayuk wuka'lek noone mbo pugwi inom, inalitak eekwi paga eeppiige, eeke neyaagun o,” yinuk, yegerak me, yokkiragi o.