Read Western Dani Matiyut 10 Bible Online

Matiyut 10 - Western Dani bible

Matiyut 10

¹At Yetut nen at oone waganggwi ineebe 12 nogo, at owagam woraawak nduk, wiiragagerak wogo mbareegwa, kugi ogole warak aakumi inikime nen nggiginogo wumbiigwi, ndi, kugi alitik-alitak aakumi andi aganabeegerak wonogwe inom, ineebe we andi-pandi aago inom, obeelom eeginakwi, eeginabit nawak nduk, at awone kiliriragagerak.

²It aap 12 nappiyareegerak nogo inendage yi aret. Aa'nduk ti, Timon endage ambi Peterut toonak nogo awot Andereyat imbirak nappiige, Tebereyut aput Yakobut awot Yaya imbirak nappiige,

³Piliput Mbarotolomeyut imbirak nappiige, Tomat aap o unde inake wu kuwak eeka Matiyut nogo imbirak nappiige, Alepeyut aput Yakobut Tareyut imbirak nappiige,

⁴“Ninalik aruwok,” yaga mendek ambi endage Timon, ndi, Yetut onggo mbaneegerak Yurat Ikariyot nogo imbirak nappiige, eereegerak.

⁵At Yetut nen it aap 12 nogo nappiyaakit nduk, inaruk wake logonet, “It aakumi endekem konenggulik mendek wonogwe me, tu ti paga nogwe, ndi, it aakumi Tamariya iname kota-kota unggwogwe, eerugup o.

⁶ Ata, it aakumi Iterali mendek ndomba kobak ogogwaarak pogom wonogwe nogo mban iya nanip o.

⁷Iya nogo logomonggotik, At mbogut paga mendek abu'me pinagarak nogo abu panggo yi wagaarak o, yinuk, yorogo logomunggup o.

⁸It andi wonogwe iinok, obeelom eeginakwi, kanggwi iinok, ineenik agago mippiigwi, inawin aaga'ne kunik wonogwe iinok, obeelom eeginakwi, kugi inikime lik yereegwaarak kenok, nggiginogo wumbiigwi, eerit nugu logomunggup o. Kit onggo lek we aret kologogutak me, onggo lek we aret eeginabit nugu logomunggup o.

⁹ It aap yabu eeppiigwi onggo ti, inambi wogorogo menggaarak aret me, kit kinamendek wu mbuti emas inom, mbuti perak inom, mbuti tembaga inom, nggerenogo punuk, wonok nogwe, ndi, wokkirogwe iinok, yonggoliyak yum inom, kinambogoyum mbere'ndak inom, kiniyogogut yum inom, kinowaanggun inom, wonok nogwe, eerugup o.

¹⁰

¹¹Ndi, kit o kota mbuuluk me, nggwok me, unggwogo logomonggotik, o time aap ambi obaabut obeelom kero, liippogo logomonggotik, ambime awo naga'lek logonet, aap ti, kinom logonuk, wundi nanu o.

¹²Aap iname time unggunuk, keyage warogo kinale'nggen inoba piigo logonu o.

¹³Ndi, it aap time inobaabut obeelom nen liirogon wokkinakwi iinok, kinale'nggen mondok inoba aret logogin o. Ndi, inobaabut maluk iinok perak, wundi nogo logonet, kinale'nggen inoba piyamonggotak nogo, lek eerogo piinok, wundi namunggup o.

¹⁴ Wokkinaka'lek logonet, kinoone inaruk konengga'lek iinok perak, iname time nen wundi nogo logonet, kiniyok paga liirubu aa'ngga eerogo mbo piinok, wundi nanu o.

¹⁵ Peebi inowak looniyak eyom paga it aakumi o Torom inom, Nggomora inom, wonogogwaarak nogo mbuuluk aret inoorigin kwe, it aap o kota time mendek ti, abu nggwok togon inoorigin aret o, yinuk, abet aret yokkiragi o,” yoragagerak.

¹⁶ Wone ambinom yorage logonet, “Kit ndomba kokwak yi, it aakumi nggeewo endekem mendek pogom wonogwe me, inowagam nappinagage agarik o. Nappinagaminggirak inenggela'me logonet, waalo yimela-nimela nege menggi kwak nugu logonet, towe puume enegen waanggo pogom nugu logomunggup o.

¹⁷Aakumi nen it wone amburu mbanggo menggam pikkiren nogwe, Yakuri tamban eeko menggam nen ya'mbiran nggora eerogo kinookwi, eekkinabugun me, liippunuk, kiniki tum wako logomunggup o.

¹⁸Kit nen it aap yo'nggok inom, aap inendagembogut inom, aap endekem mendek inom, an eeke neegotak paganogo yoraabagip nduk, alom an paga inowagam wokkiren nagun o.

¹⁹ Ndi, wokkiren nogwe iinok, wone yoroorak nogo ti eyom ndak-ndak kinogoba Ala koonogo yokkiraagin me, kit nen, Wone ngge yoraamun? Ndi, Wone nonggop negen koonogo yoraamun? yinuk, kiniki piirik noobok o.

²⁰Wone yoroorak ti, kit kinoone lek o. Ata, kinogoba Aberiniki nen wone kinikime yokkirage kagak, yorogo logomunggup o.

²¹Ore ambi waruwak nduk, ore ambi nen eenggi pigogo wogorage, apuluk waruwak nduk, ogoba nen eenggi pigogo wogorage, inapurilogwe nen inagalomini-inogobamini inom ogooppunuk, inooruwak nduk, yorogwe, eerugun o.

²² Aakumi abok aret alom an paga ineebi lombok kinombaremenggaarak kwe, kiniki kwi'ndak nu'lek wonogwe kiigak, o age yobok ari wage paga kinagap ndarigin o.

²³O kota ambime nen piyak-payak eekkinakwi iinok, kole mbaganit o kota alik ambime namunggup o. Kole mbaganit aap Iterali iname kota-kota ando awo unggwit naga'lek kiigak, an aap aret nda'nagagirak nogo, woraagin aret o, yinuk, abet aret yokkiragi o.

²⁴ At wone mamuniraga nogo tebenak kagak, at oone wagangga nogo tiyanak menggaarak lek o. Ndi, ogoba tebenak kagak, ayeloman tiyanak menggerak ti kunduk, lek mban kwe,

²⁵ at wone wagangga ambi nen at wone mamunega nogo imbirak ndak-ndak age kenok perak, op aret o. Ndi, ayeloman nogo nen ogoba nogo imbirak ndak-ndak age kenok ti, op mban o. Aap inowe o unde endage, Mbeletebut o, yogwi iinok, at awuri ti, abunuk yorogo logogun o,” yinuk, yoragagerak.

²⁶ Wone ambinom yorage logonet, “Ti kenok, yi eekwi ndi eekwi nobarak wonage kenok ti, tena'me aret age, ndi, kumaarak wonage kenok ti, pagak ari, eerigin me, it aap ti, kinagabiti inombarugup o.

²⁷An nen oonikiya negen kote kumaarogo yokkirage nogo ti, kit nggwok paga o eya paga yorogwe, ndi, yagakop wone paga yogwe konenggwi nogo ti, o kirin paga laganuk, kuum-keek paga paganogo yorogwe, eeko logonu o.

²⁸It aakumi nen kinagabolo kinooko logonet, kiniki inom kinoorugun lek me, kinagabolo mban kinooko menggaarak nogo paga kinagabiti inombarugup o. Ata, kinagabolo inom, kiniki inom, lek eerogo kani omoonuk wunuk mban ari menggim time pinagarak unde nogo perak, mondok kinagabiti mbako logonip o.

²⁹Rupiah mbuuluk ambit nogo paga towe yiluwe mbere lambuk togon kunggo monggotak nogo lek a? Kunggo monggotak aret kwe, kinogoba, E, mbaka'lek kagak, ambi nggween paga wambigin mondok lek o.

³⁰Ala nen kineeruwak abok aret eenggi lingginik wonage o.

³¹Towe yiluwe mbuulogwe apit-apat ti, iniki kundugu lek negen, ndi, kit perak, iniki kundugu nggwok lombok kinombake me, kinagabiti mbarugup o,” yinuk, yoragagerak.

³²“Kit nen aakumi inenggaanom paga, Yetut ti, ninowe aret o, yinuk, paganggwi kiinok, an kunduk, nogoba mbogut paga mendek enggaanom paga, It aap yi, an nawuri aret o, yinuk, paganigin kwe,

³³ kit nen aakumi inenggaanom paga, Yetut ti, nineenggo'lek aret o, yogwe kiinok perak, an kunduk, nogoba mbogut paga mendek enggaanom paga, It aakumi yi, an neenggo'lek aret, yigin o,” yinuk, yoragagerak.

³⁴ Wone ambinom yorage logonet, “O nggween paga yime aakumi iniki ugun lambunik logorak eep-piyaakit nduk wagagirak mbarugup o. An nen lambunik logorak eeppiyaakit nduk, woroolik o. Ata, Aap ogoba inom, kwe agalo inom, enggelo imbirak inom, ogoorogo piige neenok, wim nggaganuwak nduk, aret wagagirak o.

³⁵

³⁶It aap wim nggaganggwi nogo ti, inawi ambit me mendek nen aret eekwi iyaamunggup o.

³⁷ An kineebi negen nombako logonet, kinagalo a, kinogoba a, kiniki kunik eekwi kiinok ti, an ninom logorak meek aret o. Ndi, an kineebi negen nombako logonet, kinapuluk wulaga a, kolaga a, kiniki kunik eekwi kiinok kunduk, an ninom logorak meek mban aret o.

³⁸ Kit kinagayo karo-karo nabembinagarak nogo, ko'nok ninom noorak mbaka'lek kiinok ti, an ninom logorak meek aret o.

³⁹ Kineebe kinili eekkolamonggotak kenok, kineebe kobak aret arumunggup o. Ndi, an nendage nggwok aruwak nduk, kineebe wondet eerogo patit namonggotak kenok perak, kinili aago aret logomunggup o,” yinuk, yoragagerak.

⁴⁰“ It aakumi nen kit wokkinakwi iinok ti, an aret wo'nakwi, ndi, an wo'nakwi iinok ti, at nappani wagagerak nogo aret waganggwi, eeko menggaarak.

⁴¹Kit nen, Aap yi, Ala nen yoge kagak yo'niraga me, yinuk, aap ti, waganggwi kiinok ti, it aap Ala nen yoge kagak, yoraga onggo waagun nogo ndak-ndak aret kolaamunggup o. Ndi, Aap yi, iniki abe koonak mendek me, yinuk, aap ti waganggwi kiinok ti, it iniki abe koonak mendek onggo waagun nogo ndak-ndak aret kolaamunggup o.

⁴² Ndi, kit nen, Yetut oone waganggwi me, yinuk, wologwe mbuulogwe yi mendek ambi, niyo miin toologo wogogwi kiinok ti, onggo kolaamunggup lek ti lek o. Kolaamunggup aret o, yinuk, abet aret yokkiragi o,” yoragagerak.