Read Western Dani Matiyut 15 Bible Online

Matiyut 15 - Western Dani bible

Matiyut 15

¹Ti'nuk, aap Pariti mendek ando inom, Ala wone liiru mbanak unde ando inom, o Yerutalem nen Yetut owagam nogo nogogwaarik, Yetut yogo logonet,

²“Kat koone waganggwi yi, nonggop nduk ninombomini eeko nogogwaarak wandek eekwi nogo taganogo mbo punuk, ineenggi kooka'lek logonet, mbi nonggo menggaarak?”

³Yogo mbareegwa, Yetut nen, “Ndi, kit togon nonggop nduk Ala nen, Yogop ee'nu, ndogop ee'nu, yereegerak wone nogo taganogo mbo punuk, kinombomini eeko nogogwaarak wandek nogo eeko monggotak?

⁴ At Ala nen, Kinagalo-kinogoba inoone liirogon konenggo logonet, inayuk wuko logonip o. Ndi, kinagalo-kinogoba inoone taganggwi kiinok ti, kambumunggup aret o, yinuk, yereegerak kwe,

⁵aap ambi nen agalo a, ogoba a, yoge logonet, Namendek wokkiriyak mbakirak nogo ti, muk Ala wogogirak me, yinuk,

⁶ogoba ayuk wurogo wogoga'lek kagak, kit nen, Ti op aret eekendak o, yogo monggotak ti paga Ala nen, Yogop ee'nu, ndogop ee'nu, yereegerak wone nogo, taganogo punuk, kit kinombomini eeko nogogwaa rak wandek nogo tiyappugwi kiigi o.

⁷Kit kiniki laakot logonet yogo monggotak yi wae. Ala nen yoge kagak yoraga Yetaya nen ari logonet,

⁸ It aakumi yi, inambe paga nen an wogoppanugwi kwe, Iniki perak, ninom ogoorak aret wonogwe o.

⁹It mamunirogo menggaarak ti, aakumi inoone yugu kagak, mamunirogo menggaarak me, Aanom warogo aret nalut ee'nako agaarik o, yinuk, yereegerak, nogo ti, kit yi eekwi kiinok aret yereegerak kagi o,” yoragagerak.

¹⁰Yorage nagagerik, Yetut nen aakumi kuwak aago nogo wiiragagerak wogo mbareegwa, yorage logonet, “Kinaruk konembunuk, liippogo logonip o.

¹¹Nonggo monggotak ti paga maluk eekkinakeelik o. Ata, kinambe me nen wunggetak nogo paga mban maluk eekkinake menggerak o.”

¹²Yorage mbareegi, at oone waganggwi nogo, wogo nogogwaarik, at yogo logonet, “Wone yoragandak nogo ti, it aap Pariti inaruk konembunuk, ineebi kombakwi iigendak a, lek a?”

¹³Yogo mbareegwa, Yetut nen, “Iri'ngga-kale'ngga awi an nogoba mbogut paga mendek nen yarulik kenok ti, mondok kinigin aret o.

¹⁴ It aap inigen mbuk mban-mban ineenggi pit-pit aago nogwe iinok ti, it imbirak aret yigeebu wambugun me, inigen mbuk logonet, tu niigiigwi iinok ti, inobaalombok me, teppiyaanip o.”

¹⁵Yorage mbareegi, at Peterut nen, “Wone eegu laarak yagandak nogo ti, mbinuk-mbenak yo'niret o.”

¹⁶Yoge mbareegi, at Yetut nen, “Kit kunduk awo kiniki liippega'lek logonet, yo'nogo ogotik?

¹⁷Yi mendek ndi mendek nenggaatak inaanogume wangge nagaatik, mbo pi nogo menggaarak nogo kit kineenggo'lek a?

¹⁸ Ndi, kinoone yogo monggotak nogo ti, kinikime nen aret wungge nagaatik, maluk eekkinake menggerak o.

¹⁹Kinikime maluk eeriyak koonggwi inom, aap wakwi inom, kumi kundugume wurinakwi inom, komologwe tawe wurinakwi inom, yogoot waganggwi inom, pilit wone inoba piigwi inom, miyuk-meya eerogo piigwi inom, nogo ti, kinikime nen aret wungge menggerak me,

²⁰kinikime nen wunggetak nogo paga maluk eekkinake menggerak o. Kineenggi kooka'lek logonet, mbi nunggwi ti paga nen maluk eekkinakeelik aret o,” yinuk, yoragagerak.

²¹At Yetut o time teppunuk, o Tirut Tiron nagagerak.

²²Nage mbareegi, kwe Kanan mendek ambi o time nen wundi wage nagagerik, oone nggwok paga at yoge logonet, “Ai, nogoba, Ndawut ombooluk wae! An naagaluk kolaga kugi inikime unggwage nagagerik, abu maluk eeppereegerak me, nabuwa mbaru o.”

²³Yoreegerak kwe, at Yetut onggo wone ambiriluk ambi yorulik puk wonage kagak, at oone waganggwi nogo nen Yetut owagam wogo nogogwaarik, at yogo logonet, “Kwe yi, oone nggwok agan mu'niret wage me, nggarurogon nappu ubi!”

²⁴ Yogo mbareegwa, Yetut nogo nen, “It aap Iterali mendek ndomba kobak ogogwaarak pogom wonogwe nogo mban iya nawak o, yinuk, at Ala nen nappani wagagerak o.”

²⁵Yorage mbareegi, kwe nogo wage nagagerik, ayuk wurogo alut eeke logonet, “Ai, nogoba. Obeelom eeppanu ubi.”

²⁶Yoge mbareegi, Yetut nen, “It elege-aabologwe inambi ineenggi me ndinogo nggeewo wogorogolik o.”

²⁷Yoge mbareegi, kwe nogo nen, “Aret kwe, nogoba o. At nggeewo unde nogo nen ambi nengge kagak, anggen yumbu-yumbu abu'me wanggetak ti, it nggeewo aret nonggo menggaarak nogo o,” yoreegerak.

²⁸Yoge mbareegi, Yetut nen, “Kwe yi wae. Kat abet nombakendak nogo ti, mondok iya lombok me, kiniki mbakendak nogo ndak-ndak aret eekkaki o,” yoge kagak, ti eyom aret aagaluk andi nogo mondok lek aret agagerak.

²⁹At Yetut nogo o time mbo punuk, tu o Nggalileya yi yenggenak ambet paga wage nagagerik, puurom paga lagi nanuk, time kwi'nagagerak.

³⁰Kwi'nagagerak wonage me, it aakumi ambik nen Yetut owagam wogo nogogwaarik, inendop maluk mendek inom, inigen mbuk mendek inom, ineenggi-iniyok nggilik-nggelok aago mendek inom, inoone lek mendek inom, ando kugi andi alik mendek eeginabeegerak nogo inom, wogoret, Yetut abu'me piigo mbareegwa, at nen obeelom eeginabeegerak.

³¹Eeginake mbareegi, inoone lek mendek inoone yogwe, ineenggi-iniyok nggilik-nggelok aago mendek obeelom ogwe, inendop maluk mendek tu nogwe, inigen mbuk mendek inigen kogwe, eekwi it aakumi kuwak aago nogo nen inigen iigo nogogwaarik, “Wi,” yinuk, pi wako logonet, aap Iterali inogoba Ala nogo wogoppereegwaarak.

³²Ala wogoppogo mbareegwa, Yetut nen at oone waganggwi nogo wiiragagerak wogo mbareegwa, yorage logonet, “Wologwe wae. It aakumi ambik yi, ninom nogo kenagan yogo logonet, inambi abu lek agaarak me, inabuwa mbaki o. Mbi nengga'lek tu paga nogo logonet, inambuluk piyoorak me, mbi abu kagak, an nen iname nappiyoorak meek o.”

³³Yorage mbareegi, at Yetut oone waganggwi nogo nen, “O yime aakumi inawi wurik lek me, it aakumi ambik kuwak aago yogop yi, inambi ndak nawak nduk, mbi nggeeme kwaari noorak mbaken o?”

³⁴Yogo mbareegwa, Yetut nen, “Kit roti mande porogo ogotik?” Yorage mbareegi, it nen, “Lek o. We roti 7, ndi, ikan mbuulogwe mbereeret mban inom porogo ogoorik o.”

³⁵Yogo mbareegwa, aakumi ambik kuwak aago nogo nggween paga kwi'naruwak nduk, yorage nagagerik,

³⁶roti 7 inom, ikan inom, eenggi me wagangge nagagerik, “Ala wa!” yinuk, karerogo at oone waganggwi nogo wogorage mbareegi, it nen aakumi ambik kuwak aago nogo tumburirogogwaarak.

³⁷Tumburirogogwaarak nogo nonggo nogogwaarik, ndonggoppiige mbareegi, roti inom, ikan inom, ando ndiinogo pereegwaarak nogo ti, mbirim yum 7 aret eno korok togon yonggologo pereegwaarak.

³⁸Ndi, it roti nunggugwaarak nogo ti, kumi inom, elege mbuulogwe inom, ineebe linggininabulik kwe, aap inalik mban ineebe ti, empat ribu aret wonogogwaarak.

³⁹Ndi, at Yetut nen it aakumi ambik kuwak aago nogo iname nappiige nagagerik, yiiro paga unggunuk, wunda wage nagagerik, o Magaran aret ari wagagerak.