Read Western Dani Matiyut 16 Bible Online

Matiyut 16 - Western Dani bible

Matiyut 16

¹ Wage mbareegi, it aap Pariti mendek inom, aap Taruki mendek inom, Yetut ka nogo nogogwaarik, abut mbanuwok nduk yogo logonet, “Nineenu ariyak mbogut paga mendek ambi eeke keyaawi o.”

² Yogo mbareegwa, Yetut nen, “O kiyoma mbogut paga nduguk maa'ngga eeke kenok, kit nen, O kibi arikit nduk, eeke kagi, yinuk, yogwe,

³ndi, o kuubondendok mbogut paga ogum eeke kenok, kit nen, Yogondak o mayu nggwok woraakit nduk, eeke kagi, yinuk, yogwe, eeko monggotak o. Mbogut etenggen eeke yomboonggo nogootik, Ndogop eeke kaagun o, yinuk, yogo monggotak kwe, o yogondak ariyak age ti, kineenu ariyak age kwe, yomboombunuk, Ti ndogop aret eerikit nduk eeke kogo o, yinuk, yuurak meek aret kiigi o.

⁴ Kit aakumi o yogondak wonogwe nogo nen Ala mbo pogo nogootik, maluk lombok eerit nugwi yi, Nineenu ariyak mendek ambi eeke keyaawi o, yo'nugwi kwe, kineenu ariyak nduk, alik ambi eeke neyaamunggup lek o. Ata, at Ala yoge kagak yoraga Yunut nogo nen ineenu ariyak mendek eereegerak nogo mban eeke neyaamunggup o,” yinuk, yorage nagagerik, it aap nogo mbo piinok nagagerak.

⁵It Yetut oone waganggwi nogo, yi wunda nogo nogogwaarik, roti inami a'nuk nogogwaarak me,

⁶ Yetut nen it nogo yorage logonet, “It aap Pariti mendek inom, aap Taruki mendek inom, inoone ti, roti piike menggerak nogo kokwak aret me, waganggwi kiyo, kiniki tum wako logonip o.”

⁷Yorage mbareegi, it nogo ambi yagak ambi yagak yogo logonet, “Roti wonok woroolik kenok yo'nirage kogo o,” yinuk, yogwe

⁸at Yetut yelok iige nagagerik, “Kit kiniki liirogon abet nombaka'lek yi, roti lek kenok nonggop nduk kiniki piirik logonet, wone yogo ogotik?

⁹ Roti 5 kwe, aap ineebe lima ribu tumburirogo nogotik, mbirim yum mande yonggologo pogotak nogo inom, ndi, roti 7 nogo aap ineebe empat ribu tumburirogo nogotik, mbirim yum mande yonggologo pogotak nogo inom, abeka'lek ogotik? Alom ti nduk eekerak, kagi, mba'nuk, ti kunduk, liippanega'lek logonet, yogo ogotik?

¹¹Yi abe roti yinuk, yo'nirage lek o. Ata, it aap Pariti aap Taruki inom inoone nogo ti, roti piike menggerak nogo kokwak aret me, waganggwi niyo, niniki tum wako logowok nduk yo'nirage o, yinuk, yuurak op aret kwe, nonggop nduk liippega'lek ogotik?”

¹²Yoragagerak ti paga it nen, “At Yetut ari ti, roti piiruwak nduk pogo menggaarak nogo mendek kenok, yo'nirage lek o. Ata, it aap Pariti aap Taruki inom nen inoone mamunirogo menggaarak nogo waganggwi niyo, niniki tum wako logowok nduk, yo'nirage kogo o,” yinuk, mbareegwaarak.

¹³At Yetut o Kayitareya Pilipi unggwi nanuk, time nege logonet, at oone waganggwi nogo yorage, “Wologwe! An aap aret nda'nagagirak yi, it aakumi nen ta nomba'nuk yogo agaarik?”

¹⁴ Yorage mbareegi, it nen at yogo logonet, “It ando nen, Yiime Wuppiiga Yaya aret, yogwe, it ando nen, Eliya aret, yogwe, ndi, it ando nen, At Yeremiya ilik, aap Ala nen yoge kagak yoraga mendek ambi a? yinuk, yogwe, eeko agaarik o.”

¹⁵Yogo mbareegwa, “Ndi, kit perak, an ta nomba'nuk yogo ogotik?”

¹⁶ Yorage mbareegi, at Timon Peterut nen, “At eenik menggerak Ala aput Mesias nogo kat aret o.”

¹⁷Yoge mbareegi, Yetut nen, “Yunut aput Timon nore wa. Aakumi nen paganogo yokkirulik o. Ata, an nogoba mbogut paga mendek nen aret paganogo yokkegerak me, kiniki ale'nggen aret mbake logot o.

¹⁸Kat Peterut aret me, yugum ti paga an napuri kuwak eeppiinok, o pogom wukkolaminggirak me, kanggwi alom nen an napuri nogo tebenogo piyaagin mondok lek o.

¹⁹ At mbogut paga mendek abu'me piige menggim tu kunci nogo kat aret wokkiriminggirak me, kat nen nggween paga yime, Eeriyak mage o, ari keenok ti, mbogut paga kunduk eeriyak lek aret kaamunggun o. Ndi, kat nen nggween paga yime, Eeriyak op o, ari keenok ti, mbogut paga kunduk eeriyak aret kaamunggun o, yinuk, yokkigi o.”

²⁰Yoge nagagerik, “An Keritut neegotak nogo aakumi abu yoraagup o,” yinuk, at oone waganggwi nogo inaruk wareegerak.

²¹Inaruk wareegerak ti eyom paga nen at Yetut nogo at oone waganggwi yorage logonet, “An o Yerutalem time noorak agaarak me mondok nage agarik o. Nage neenok, It aap inanggok inom, it Ala unde inoweewi inom, it Ala wone liiru mbanak unde inom, nen noba aaninggin-paaninggin agago paninuk, noorugun o. Nooko mbaremengga, nogo mbere yippunuk, ko'lu Ala nen neenik agago mippanigin o,” yinuk, paganogo yoragagerak.

²²Yorage mbareegi, at Peterut nen Yetut nomorogon wonok nage nagagerik, mberege logonet, “Mage o. Togop eekkaburak mondok lek o, nogoba.”

²³Yoge mbareegi, at Yetut ena logurogon pekkage logonet, Peterut yoge, “Kat Ibilit negen ari yi, Ala iniki mbake nogo eeriyak mba'nuk ari lek o. Ata, aakumi iniki mbakwi nogo eeriyak mbake logonet, an non mbambanege me, mondok nak o,” yoreegerak.

²⁴ Yoge nagagerik, Yetut nen it at oone waganggwi nogo yorage logonet, “Kit an ninom nugu logorak mbakwi kenok, yi eekak ndi eekak eeriyak mbakwi nogo mbo punuk, eyo karo-karo paga nabembinagarak nogo ko'nok, ninom aret nugu logowok o.

²⁵ Kineebe kinili yikkolamonggotak kenok, kineebe kobak aret arumunggup o. Ndi, an nendage tiya yuwak nduk kineebe wondet eerogo patit namonggotak kenok, kineebe kinili aago aret logomunggup o.

²⁶Kit yi awi ndi awi abok aret unde eekkologo logomonggotik, kineebe kobak arumonggotak kenok, ti paga nano eekkoloorak nduk agan nogo logomunggup mbakop? Kineebe kobak arumonggotak kenok, obaane'me nano patiyak?

²⁷ An aap aret nda'nagagirak yi, an nogoba amindik-amendek li'luk eekko'nok, malayikat ninom wogo logomonggoorik, yi aap ndi aap eeko menggaarak onggo ndak-ndak aret wogora woraagun o.

²⁸Kit ando yime wonogwe nogo nen an aap aret nda'nagagirak yi, it aakumi nabu'me piya woroorak nogo awo kinigen neega'lek kiigak, kambumunggup mondok lek o, yinuk, abet aret yokkiragi o,” yoragagerak.