Read Western Dani Matiyut 18 Bible Online

Matiyut 18 - Western Dani bible

Matiyut 18

¹ O ti eyom paga at oone waganggwi nogo nen Yetut owagam wogo nogogwaarik, yogo logonet, “At mbogut paga mendek abu'me piige menggim mondok nggwok lombok logorak ta o?”

²Yogo mbareegwa, Yetut nen elege ambi wiireegerak wage mbareegi, inenggela'me mippunuk, it yorage logonet,

³ “Kit aap yi, kiniki koonggwi ti, lek eerogo punuk, elege mbuulogwe yogop yi arumunggup lek kenok, at mbogut paga mendek abu'me piige menggim unggwi namunggup mondok lek o, yinuk, abet aret yokkiragi o.

⁴Aap ambi nen elege yi pogom iniki tebeppake kenok ti, at mbogut paga mendek abu'me piige menggim mondok nggwok lombok at aret logogin o.

⁵Ndi, aap ambi nen, An Yetut oone wagangge minggirak mendek aret o, yinuk, elege yogop mendek ambi wagangge kenok ti, an aret wo'nake o,” yinuk, yoragagerak.

⁶Wone ambinom yorage logonet, “It aakumi nen elege-aabologwe iniki an noba panggombunuk abet nombako menggaarak yi, maluk eeruwak nduk, inikime manabi wagaatak paga maluk eekwi iinok ti, yugum nggwok gandum yigika waganogo aap ti enggaanok me keele yilinogo punuk, yi yenggenak laut alobok ambik me mbo mambuurak op o.

⁷Kit o nggween paga yime maluk eerumunggup nduk, eekkinake ti, wonage aret me, kinabuwa o. Maluk eeriyak eekkinake nogo ti, logogin aret kwe, it aap nen kit maluk eerumunggup nduk eekkinakwi iinok perak, inabuwa o.

⁸ Kineenggi-kiniyok imbirak wonage kagak, kani omoonuk wunuk mban ari menggim time mbo nappinagarak ti, abu maluk aret me, kineenggi ilik, kiniyok a, nogo paga maluk eeriyak eekkinake kenok, mbanogo nappinip o. Mbanogo nappunuk, kineenggi ilik, kiniyok a, peenok mbanak kagak, ineenik eeginake menggim unggwi noorak ti, op o.

⁹ Ndi, kinigen imbirak wonage kagak, kani omoonuk wunuk mban ari menggim time mbo nappinagarak ti, abu maluk me, kinigen paga maluk eeriyak eekkinake kenok, ambi kilirogo mbo nappinip o. Kilirogo mbo nappunuk, kinigen peenok lek kagak ineenik eeginake menggim noorak op aret o,” yinuk, yoragagerak.

¹⁰Yorage nagagerik, ambinom yorage logonet, “It elege-aabologwe inarum wako menggaarak malayikat nogo nen an nogoba mbogut paga mendek enggaanom paga mondok-mondok paganogo yogo menggaarak me, kit nen elege-aabologwe yi, meek inombakwi kiyo, kiniki liippogo logonip o.

¹²Kit nonggop mbako ogotik? Aap ambi andomba ineebe 100 wonage kwe, ambiret kobak age kenok, ndomba ando 99 nogo, elan me iri'ngga nenet nunggwi iigak, ambiret kobak aremenggerak nogo, kwaari nagin lek mbakop? Lek o. Kwaari nagin aret o.

¹³Ndi, kwaake kenok ti, ndomba 99 kobak arulik nogo paga iniki ale'nggen mbuuluk negen mbake logonet, ambiret kobak aremenggerak kwaarigin nogo paga ale'nggen nggwok lombok mbake menggerak nogo lek a? Mbake menggerak aret me nduk, yokkiragi o.

¹⁴Togop me, kinogoba mbogut paga mendek nogo nen it elege-aabologwe yi, ambiriluk ambi kobak ariyak abu eebi mbake menggerak o,” yinuk, yoragagerak.

¹⁵ Yorage nagagerik, ambinom yorage logonet, “Kinore ambi nen maluk eeppinagage kenok, owagam nogo logomonggotik, Togop eeppinanggendak o, yinuk, kinom kinalik aret wone mbanumunggup o. Ndi, wone mbanumonggotak nogo aruk liirogon konengge kenok, kinom ogoorak wonogotak kwe, lambunik aret logomunggup o.

¹⁶ Ndi, aruk liirogon konengga'lek kenok perak, Aap mbere-kenagan inaruk iigak yogwi iinok, Abet aret, mbako menggaarak me, aap ambit a, mbere a, wogoret, kinom yori nanu o.

¹⁷Ndi, it aap ti, kinom yorumonggotak aruk liirogon konengga'lek mbo pege kenok, it Ala apuri apit kuwak eeppiinok, yoruwak nduk, yoraanu o. Ndi, Ala apuri kuwak aago inoone kunduk konengga'lek kenok, it aap abet mbaka'lek endekem mendek ilik, it aap o unde inake wu kuwak eeka mendek a, nogo pogom, At aret, mba'nuk mbo punu o,” yinuk, yoragagerak.

¹⁸ Wone ambinom yorage logonet, “Kit nen nggween paga yime ambi, Eeriyak mage o, yogwe kiinok ti, mbogut paga kunduk, eeriyak lek aret kaamunggup o. Ndi, kit nen nggween paga yime ambi, Eeriyak op o, yogwe kiinok ti, mbogut paga kunduk, eeriyak aret kaamunggup o, yinuk, abet aret yokkiragi o.

¹⁹Ndi, ambi yi yokkira o. Aap mbere ilik, kenagan a, Nit Yetut oone waganggwi mendek aret o, yinuk, kuwak eekwi kiinok, an kinenggela'me taati ninom aret logogin me, kit o nggween paga yime kinore ambi kimbirak kiniki ambit a'nuk, Ndogop eeppinanu o, yinuk, Ala nggino yogwi kiinok, an nogoba mbogut paga mendek nen eeppinagage aret kaamunggup o,” yinuk, yoragagerak.

²¹ Yorage mbareegi, at Peterut nen Yetut owagam wage nagagerik, yoge logonet, “Nogoba wae. An nore ne mande paga maluk eeppanege kenok, an nen at omaluk nami eerogo puurak o? Ne 7 kuli ilik, ne mande a?”

²²Yoge mbareegi, Yetut nen, “Ne 7 kuli mban lek o. Ata, aakumi apit ineenggi nonggop lingginubok lombok aret maluk eeppagagwi iinok, kami eerogo pege logonok nduk, yokkigi o.

²³Togop me, at mbogut paga mendek abu'me piige menggim nogo ti, aap endagembogut ambi ayeloman mini awu wogoragagerak nogo obaane'me, Wo'niruwak, yinuk, wiiragagerak nogo pogom aret o.

²⁴Wiiragagerak nogo, ambi aa'nduk wage mbareegi, Nawu sepuluh ribu talenta wokkigirak nogo obaane'me wo'niru o, yoreegerak kwe,

²⁵awu lek me, wogoriyak meek aret age mbareegi, aap nggwok nogo nen awuri yorage logonet, Aap yi eebe inom, akwe-apuri inom, amindik-amendek inom, abok aret aakumi kunggolaawak nduk, wogorogo logomonggotik, onggo wu wokkiramenggaarak nogo, an nawu wogoreegirak obaane'me an aret wo'niri wa'nu o.

²⁶Yorage at ayeloman nogo aruk konembunuk, aap nogo abu'me enete wanduk ngginnage logonet, Ai, nogoba o. Nawu wonage kenok abok aret wokkirigin me, kiniki yanggo yinuk puk aru o.

²⁷Yoge mbareegi, ogoba nogo nen at ayeloman nogo abuwa mbake logonet, Obaane'me wo'niriyak neebi aret o, yinuk, teppereegerak.

²⁸Teppereegerak kwe, ayeloman nogo endekem wundi nage nagagerik, oreeluk ambi at anomat wu mbuuluk we 100 dinar wogoreegerak nogo kage nagagerik, enggaanok nggeremborogo logonet, Nawu wokkigirak nogo obaane'me wo'niru o.

²⁹Oone omaawi yoge mbareegi, aap nogo nen abu'me tebe yinuk, oone nabek togon yoge logonet, Ai. Nawu wonage kenok abok aret wokkirigin me, yanggo yinuk puk aru o.

³⁰Yoreegerak kwe, aap nogo nen, Lek o. Nawu obaane'me wo'nege kenok perak, keele piinogo pagarak o, yinuk, keele maarogo mambiigo menggam mambereegerak.

³¹Keele maarogo mambiigo menggam mambereegerak nogo, oreewi nen inigen kogo nogogwaarik, iniki abu maluk a'nuk, aap eereegerak nogo inogoba mbininogo yori nogogwaarak.

³²Yori nogo mbareegwa, inogoba nogo nen aap nogo wiireegerak wage mbareegi, yoge logonet, Kat aap maluk lombok eeke yi, koone nabek togon yo'nege mbaken, nanomat mbanak we aret teppagagirak kwe,

³³an nen kat kabuwa mbakirak pogom koreeluk abuwa mbakembok eekendak ti, nonggop nduk eekendak o?

³⁴Nawu obaane'me wo'nega'lek keegak, mondok-mondok yawi kooko logowak o, yinuk, anini nen it yawi unde menggaarak nogo wogoragagerak o,” yinuk, yoragagerak.

³⁵Yoge nagagerik, “Kit kinoreewi maluk eeppinagagwi nogo, kinalitak lombok abet aret kinami eerogo piigwi lek kiinok, an nogoba mbogut paga mendek nen kit togop aret eekkinabigin o,” yinuk, yoragagerak.