Read Western Dani Matiyut 2 Bible Online

Matiyut 2 - Western Dani bible

Matiyut 2

¹Aap Keroret endagembogut wonage kagak, Yetut o Yureya tini Mbe'lekem aret nda'nagagerak wonage me, it aap wone mbiningga oonegen lagi wage menggim nen o Yerutalem wogo nogogwaarik, kin waganggo logonet,

² “Aap Yakuri inowe endagembogut nda'nagaarak nogo eebe ngge o? Oonegen lagi wage menggim nen at elaaluguragan wunggerak ninigen kogo nogoorik, ayuk wurogo alut eeruwok nduk wogo o.”

³Yinuk, kin waganggo mbareegwa, aap endagembogut Keroret nogo, aruk konembunuk, agabiti nen aganak nugege mbareegi, it aakumi o Yerutalem menggaarak abok aret inom inaganak wareegerak.

⁴Wake mbareegi, at Keroret nogo nen it Yakuri mendek inogobamini Ala unde inoweewi inom, it Ala wone liiru mbanak unde inom, abok aret kuwak eeppiige nagagerik, “At Ala nen leenogo mippereegerak Mesias nogo, o nggeeme nda'narigin liiru mbanak kogo monggotak o?” yinuk,

⁵ kin wogiige mbareegi, it nen, “At aap Ala yoge kagak yoraga nogo nen ari logonet, It Yekura wonogo menggam tini Mbe'lekem kat yi wae. Kat paga nen aap wone unde ndomba ndegeninako mengga kwak An napuri aakumi Iterali mendek ndegeninake logowak nduk, ambi mi'narigin me, It aap Yekura inawi kota yo'nggok enggela'me kat yaga'lelo Mbe'lekem ti mbuuluk me, meek kombariyak lek o, yinuk, yereegerak liiru mbaneegerak ndak-ndak, at Keritut nogo o Yureya tini Mbe'lekem time aret nda'narigin mbako o,” yinuk, yoreegwaarak.

⁷Yogo mbareegwa, at Keroret nogo nen it aap wone mbiningga mbawok aret wiiragagerak wogo mbareegwa, yorage logonet, “Mandenom laaluguragan tena'me agaarak kogotak? Liirogon yo'ninip o,” yinuk, kin wogiige nagagerik,

⁸o Mbe'lekem nappiige logonet, “Kit elege nogo kinigen pippak kwaari nanip o. Ndi, eebe kwaakkogo logomonggotik kenok, an kunduk, ayuk wurogo alut eeri woraakit nduk, yo'niri wa'nu o,” yoragagerak.

⁹Aap endagembogut yoragagerak nogo inaruk konembunuk, tu paga nogo logonet, “Ie! Laaluguragan oonegen wundi wage menggim time kogoorak nogo, nage yi kaanip o,” yinuk, yogwe iigak, aa'nduk nage nagagerik, elege ndarak nogo wonage me irimbaga taati aret puk ari nagagerak.

¹⁰Ndi, it nen laaluguragan nogo inigen kogo nogogwaarik, iniki ale'nggen nggwok mbarit nogogwaarak.

¹¹Nogo nogogwaarik, oome unggunuk, elege nogo agalo Mariya imbirak iigo nogogwaarik, ineebe tebe yinuk, elege nogo ayuk wureegwaarak. Ayuk wuko nogogwaarik, inamendek obeelom lombok mbuti emas inom, yibinggami inom, eyo mur amburu inom, kilirogo wogoreegwaarak.

¹²Wogo'nuk, nogo yugwi me, at Ala nen, “Aap Keroret wonage me tu kiniyok paga nagup o,” inabi paga kurumbi yorage mbareegi, it nogo tu alik paga iname nogogwaarak.

¹³Iname nogwe iigak, Yutup abi paga Ala yonggo nappiya wage menggerak malayikat ambi nen at owagam wage nagagerik, yoge logonet, “At Keroret nen elege yi wariyak nduk kwaari woraagin me, mi'na'nuk, elege yi agalo imbirak wogoret o Metit time kole nanip o. Namonggotak time wonogwe me, an awo yokkira waga'lek neenok, o taati aret logonu o,” yinuk, yoge kagagerak.

¹⁴Abi paga yoge mbareegi, at Yutup nogo oonikiya aret mi'na'nuk, elege nogo agalo imbirak wogoret o Metit nage nagagerik,

¹⁵ at Keroret nogo awo kangga'lek kenok, time aret puk wonogogwaarak. Ti eereegwaarak nogo ti, Ala yoge kagak yoraga nen yorage logonet, “Naput o Metit time nen woraawak nduk, wiireegirak o,” yinuk, yereegerak, yoragagerak nogo, a'me lik yuwak nduk, eereegwaarak.

¹⁶At Keroret nogo nen, “It aap wone mbiningga nogo nambokan laganggaarak iigi o,” yinuk, anini wu agan nage logonet, it aap wone mbiningga nen, “Laaluguragan o ti eyom paga aret kin age kogoorak o,” yinuk, liirogon yoreegwaarak me, at awuri nen o Mbe'lekem enaagan-ambokan nogome wologwe mbuulogwe ndarak iigak, tahun mbere aago inom, eeka'lek inom, tigitogon inoorit nawak nduk, nappiyareegerak.

¹⁷Ti eereegerak nogo ti, at Ala yoge kagak yoraga Yeremiya nogo nen ari logonet,

¹⁸ “O Arama time iniki abu puru aago logonet, leenggu maake, Oone nggwok paga ai-au ari, Eeke konenggoorak nogo ti, Kwe Araken aagalogwe ineebe lek agaarak me, An le mbannaburak mondok neebi o, mbake logonet, inale ari ti aret o,” yinuk, wone yereegerak, yoragagerak nogo, o ti eyom aret a'me lik yereegerak.

¹⁹Ti'nuk, at Yutup nogo awo o Metit time wonage me, aap Keroret nogo kangge mbareegi, ne ambi paga Yutup abi kage logonet, Ala yonggo nappiya wage menggerak malayikat ambi nen at owagam wage nagagerik, yoge logonet,

²⁰“It aap elege wariyak nduk, kwaarit nagaarak nogo muk kambit nagaarak me, kat mi'na'nuk elege nogo agalo imbirak wogoret aakumi Iterali iname nak o.”

²¹Abi paga yoge mbareegi, mi'na'nuk, elege nogo agalo imbirak wogoret aap Iterali iname wagagerak.

²²Ndi, “At Arikilut ogoba Keroret obaane'me at aret o Yureya aap endagembogut aga o,” yinuk, yogwe nogo, at Yutup aruk konengge nagagerik, time noorak agabiti mbake me, “O Yureya time nagun o,” yinuk, abi paga yoge mbareegi, o Nggalileya time aret nagagerak.

²³ Nage nagagerik, o tini endage Nataret aret puk ari nagagerak. Ti nagagerak nogo ti, it Ala yorage kagak yoraga nogo nen, “At aap Nataret mendek aret yogo logogun o,” yinuk, yereegwaarak nogo, a'me aret agagerak.